Ubwandilo 11 - IBAYIBOLO 2024

Ichitembe icha Babiloni

¹ Pakwanda abantu bosi aba pachisu ichapasi bakaba ni neno yoka, sona bakabombezyanga amazyu ghoka.

² Bo bali pakwendakwenda bulo kubufumilo bwizuba, bakiza mwikombe limo mu Babiloni nukwikala mulamula.

³ Bakanenezannya benebene bakati, “Zagha tukome injelwa nukuzyocha akiza.” Bakabombezya injelwa mubuzilo ubwa mabwe, ni mpula mubuzilo ubwa litope.

⁴ Po bakati, “Zagha twizengele akaya akakulu nkani, ni chitembe ichitali ichakufika kumwanya. Pakubomba bunubu itabwa lyitu likwiza pakumanyikwa, sona tutakwiza pakunyampana pachisu chosi ichapasi.”

⁵ Po u Mwene akika kumwanya pakwennya akaya akakulu nkani, sona ni chitembe ichitali chicho abantu bala bakazengagha.

⁶ Po akati, “Ennya abantu aba baba muntu weka, sona bali ni neno yoka! Zizyo bakubomba bo bwandilo bulo ubwa zizyo bakwiza pakubombagha. Pisinda pache bakwiza pakubomba chosi chicho bakuchilonda.

⁷ Zagha twike nukuvulungannya ineno yabo, umwakuti batakivwanaye bo bakunena.”

⁸ U Mwene akabanyampanizizya muchisu chosi ichapasi, po bakaleka pakuzenga akaya kabo akakulu nkani kala.

⁹ Akaya akakulu nkani kalakala kakitiziwanga ukuti Babiloni, pachifukwa ichakuti u Mwene akavulungannya ineno iya bantu bosi. Po ukwandila palapala u Chala akabanyampanizizya abantu pachisu chosi ichapasi.

Abaluko ulwa Shemu

¹⁰ Abaluko ulwa Shemu bo aba. Bo ghachilapo amaka mabili, bo amizi aghakwizula ghamala, sona bo u Shemu ali na maka 100, akapapa u Alipakishadi.

¹¹ Pisinda pache u Shemu akikala sona amaka aghanji 500, nukupapa abana abanji abanavuli na bakolo.

¹² Bo u Alipakishadi ali na maka 35, akapapa u Shela.

¹³ Pisinda pache u Alipakishadi akikala sona amaka aghanji 403, nukupapa sona abana abanji abanavuli na balindu.

¹⁴ Bo u Shela ali na maka 30, akapapa u Ebeli.

¹⁵ Pisinda pache u Shela akikala sona amaka aghanji 403 nukupapa abana abanji abalumendo na balindu.

¹⁶ Bo u Ebeli ali na maka 34, akapapa u Pelegi.

¹⁷ Pisinda pache u Pelegi, akikala sona amaka aghanji 430 nukupapa abana abanji abalumendo na balindu.

¹⁸ Bo u Pelegi ali na maka 30, akapapa u Lebu.

¹⁹ Pisinda pache u Pelegi akikala sona amaka aghanji 209 nukupapa abana abanji abalumendo na balindu.

²⁰ Bo u Lebu ali na maka 32, akapapa u Selugi.

²¹ Pisinda pache u Lebu akikala sona amaka aghanji 207 nukupapa abana abanji abalumendo na balindu.

²² Bo u Selugi ali na maka 30, akapapa u Naholi.

²³ Pisinda pache u Selugi akikala sona amaka aghanji 200 nukupapa abana abanji abalumendo na balindu.

²⁴ Bo u Naholi ali na maka 29, akapapa u Tela.

²⁵ Pisinda pache u Naholi akikala sona amaka aghanji 119 nukupapa abana abanji abalumendo na balindu.

²⁶ Bo u Tela ali na maka 70, akapapa u Abulamu nu Naholi nu Halani.

Abaluko ulwa Tela

²⁷ Abaluko ulwa Tela bo aba: U Tela akapapa u Abulamu nu Naholi nu Halani. U Halani akapapa u Loti.

²⁸ U Halani akafwila mukaya kache kako bakatinji Uli muchisu icha Babiloni, bo uwise achili mumi.

²⁹ U Abulamu akasenda u Salayi, po u Naholi akasenda u Milika umwana uwa Halani, yuyo akaba we wise uwa Isika.

³⁰ U Salayi atakaba na bana pachifukwa ichakuti akaba mughumba.

³¹ U Tela akamusenda umwana wache u Abulamu nu Loti umwizukulu wache, yuyo akaba mwana uwa Halani. Akamusenda sona u Salayi umulasagha wache yuyo akaba muchi uwa Abulamu nukufumamo mukaya akakulu nkani aka Uli, muchisu icha Babiloni. Bakabuka ku Kenani muchisu icha Halani nukwikala kulakula.

³² Po u Tela akafwila kulakula, bo ali na maka 205.