Ubwandilo 10 - IBAYIBOLO 2024

Abaluko ulwa bana aba Nowa

¹ Ulu lo lubatiko ulwa baluko ulwa bana aba Nowa: U Shemu nu Hamu nu Yafeti. Abana batatu banaba bakapapa abana babo bo amizi aghakwizula ghamala.

² Abana aba Yafeti bakaba bo aba: U Gomeli nu Magogi nu Madayi nu Yavani nu Tubali nu Mesheki sona nu Tilasi.

³ Abana aba Gomeli bakaba bo aba: U Ashikenazi nu Lifati sona nu Togalima.

⁴ Abana aba Yavani bakaba bo aba: U Elisha nu Talishishi nu Sayipulasi sona nu Lodanimu.

⁵ Banaba bakaba banyenya aba bantu bosi babo bakikalagha mulubazu ulwa nyanja na mutusungo utwa nyanja. Banaba bo baluko ulwa Yafeti. Uluko lwabo lukaba lwakulekanalekana, po bakikalagha muvyisu ivyakulekanalekana. Uluko losi lukaba ni neno iyabo ni yabo.

⁶ Abana aba Hamu bakaba bo aba: U Kushi nu Ijiputi nu Puti, sona nu Kenani.

⁷ Abana aba Kushi bakaba bo aba: U Seba nu Havila nu Sabita nu Lama sona nu Sabuteka. Abana aba Lama bakaba bo aba: U Sheba nu Dedani.

⁸ U Kushi akapapa u Nimulodi, yuyo akaba muntu wakwanda pakuba musilikali uwamaka nkani pachisu ichapasi.

⁹ Akaba sona mubingi uwapamwanya nkani pamaso pa Mwene. Ichi cho chifukwa abantu bakunena ichili ichakuti, “Awe we mubingi uwapamwanya pamaso pa Mwene ngati we Nimulodi.”

¹⁰ Pakwanda impaka iya ubumwene bwache yikafika mupaka ku Babiloni, naku Eleki sona naku Akadi. Utwaya tosi tutatu tunutu tukaba mu Babiloni.

¹¹ Ukufuma kulakula akabuka mu Asiliya nukuzenga akaya akakulu nkani aka Ninive naka Lehoboti naka Kala

¹² sona naka Leseni, kako kali pakasi pa kaya akakulu nkani aka Ninive naka Kala.

¹³ Abaluko ulwa Ijiputi bakaba bantu aba mu Lidiya naba mu Anamu naba mu Lehabu naba mu Nafitu

¹⁴ naba mu Patilusi naba mu Kasilu naba mu Kileti, mumo mukufuma uluko ulwa ba Filisiti.

¹⁵ Abana aba Kenani bakaba bo aba: Ukatote akaba we Sidoni nu Hiti.

¹⁶ U Kenani akaba sona munyenya uwa ba Yebusi nuwa ba Amoli nuwa ba Giligashi

¹⁷ nuwa ba Hivi nuwa ba Aliki nuwa ba Sini

¹⁸ nuwa ba Alivadi nuwa ba Zemali sona nuwa ba Hamati. Pisinda pache inko izyakulekanalekana izya Kenani zikanyampana.

¹⁹ Impaka izya Kenani zikonjelela ukwanda ku Sidoni mupaka kuntende ku Gelala nukufika ku Gaza, kubufumilo bwizuba ku Sodomu nu Gomola nu Adima sona nu Zeboyimu, kupipi nu Lasha.

²⁰ Banaba bo baluko ulwa Hamu babo bakikalagha muvyisu ni vigaba vyabo ukuyana ninko zyabo izyakulekanalekana. Uluko losi lukaba ni neno iyabo ni yabo.

²¹ U Shemu akaba munyenya uwa bana bosi aba Ebeli. U Shemu akaba mukulu uwa Yafeti, yuyo akaba munyenya uwa ba Ebeli bosi.

²² Abana aba Shemu bo aba: U Elamu nu Ashuli nu Alipakishadi nu Ludi nu Alamu.

²³ Abaluko aba Alamu bo aba: U Uzi nu Huli nu Geteli sona nu Mesheki.

²⁴ U Alipakishadi akapapa: U Shela. U Shela akapapa: U Ebeli.

²⁵ U Ebeli akapapa abana abalumendo babili. Weka akaba we Pelegi. Bakamwita itabwa ili pachifukwa ichakuti pakabalilo kache kukaba ukugabinkana pakasi pabantu bosi aba muchisu ichapasi. Umuzuna wache akaba we Yokotani.

²⁶ Abaluko ulwa Yokotani bo aba: U Alimodadi nu Shelefu nu Hazalimaveti nu Yela

²⁷ nu Hadolamu nu Uzali nu Dikila

²⁸ nu Obali nu Abimayeli nu Sheba

²⁹ nu Ofili nu Havila sona nu Yobabu. Bosi banaba bakaba baluko ulwa Yokotani.

³⁰ Ichisu chicho bakikalaghamo chikafuma ku Mesha mupaka ku Sefa kubufumilo bwizuba, ichisu icha mumaghamba.

³¹ Banaba bo baluko ulwa Shemu babo bakikalagha muvyisu ni vigaba vyabo ukuyana ninko zyabo izyakulekanalekana. Uluko losi lukaba ni neno iyabo ni yabo.

³² Abantu bosi banaba bakaba abaluko ulwa Nowa, ukuyana ninko zyabo mumo bakafuma. Abantu aba inko zyosi izya muchisu ichapasi bakafuma mwa Nowa, bo amizi aghakwizula ghamala.