Ubuvumbuli 9 - IBAYIBOLO 2024

¹ Palapala uwantumi uwafayivi akalizya ipati lyache. Po nkennya lutondwa ulwa kumwanya lulo lukawila pachisu ichapasi. Lukapeghiwa inyighulilo iyakwighulila muchibanka ichibizu nkani.

² Ulutondwa lula lukighula ichibanka, po ilyosi likasuka muchibanka ngati po likufuma mung'anjo iya moto. Izuba na mumwanya vikafita ni lyosi ilyakufuma muchibanka ichibizu nkani chila.

³ Umakanta akafuma mu lyosi lilalila nukwiza muchisu ichapasi, po akapeghiwa ulubolela lulo lukayana nulwa nkonya.

⁴ Akabuziwa ukuti atakanangannye isote pamo amakwi, pamo kosi akamelwa. Loli akitikiziwa ukuti anangannye abantu bene babo bate ni chidindo icha Chala pa vyeni vyabo.

⁵ Umakanta yula atakitikiziwa ukuti abaghoghe abantu banaba, loli kwene pakubayivya amezi fayivi. Ububavu bwache bukayana bulo nu bubavu ubwa nkonya.

⁶ Mumasiku ghalaghala abantu bakwiza pakunena ukuti chizapo pakufwa, loli batakwiza pakufwa. Bakwiza pakulonda nkani ukuti bafwe, loli ubufwe bukwiza pakubachimbila.

⁷ Umakanta uyu akabonekagha ngati zyo falasi zizyo baziyanizye pakubuka kubwite. Pamitu yabo pakaba ichintu chimo chicho chikabonekagha ngati yo mpumpu iya golide, sona ivyeni vyabo vikaba ngati vyeni ivya bantu.

⁸ Isisi zyabo zikaba ngati zyo sisi izya bakolo, amino ghabo ghakaba ngati gho mino agha nkalamu.

⁹ Pavifuba vyabo bakavwala ichela, sona ichongo icha vipapande vyabo chikaba ngati cho chongo icha falasi ni ngolo izya bwite inyinji nkani izyakuchimbilila kubwite.

¹⁰ Umakanta yula akaba ni misinda nu tubolela ngati twa bankonya, sona imisinda yabo yo yiyo yikaba na maka aghakuvulazizya abantu amezi fayivi.

¹¹ U mwene wabo akaba wantumi yuyo akaba mulaghili uwa chibanka ichibizu nkani chila. Itabwa lyache mu Chihebeli akaba we Abadoni; mu Chigiliki akaba we Apoliyoni chicho chikung'anamula ukuti, “Uwakunangannya.”

¹² Intamyo iyakwanda yamala, loli pisinda pa yiniyi pachili pali izinji zibili zizyo zibaghiye pakwiza.

¹³ Po uwantumi wasikisi akalizya ipati lyache. Po nkivwa izyu kunkuto folo izya chighemo icha golide, chicho chikaba pamaso pa Chala.

¹⁴ Izyu lilalila likamubuzya uwantumi uwasikisi yula likati, “Basatule abantumi folo bala babo bapinyiwe pa lusoko ulukulu ulwa Yufuleti!”

¹⁵ Abantumi folo bala bakabayanizya zila akabalilo kalakala, ni siku lilalila nu mwezi ghulaghula sona nu mwaka ghulaghula. Ilelo bakasatuliwa ukuti baghoghe ichigaba choka pa vigaba vitatu ivya bantu bosi.

¹⁶ Nkabuziwa ukuti ubwinji ubwa basilikali abakukwela ifalasi bukaba amamiliyoni 200.

¹⁷ Muchisetuka chane nkennya ifalasi na bakukwelapo bache. Pa vifuba vyabo bakavwala ivyela ivichesamu ngati gho moto, ni vyabulu ngati lyo lyosi, sona ni vyakayinja ngati we sulufule. Imitu iya falasi zila yikaba ngati iya nkalamu, sona mumalomo ghabo mukafumagha umoto ni lyosi nu sulufule.

¹⁸ Ichigaba choka pa vigaba vitatu ivya bantu chikaghoghiwa ni viwaya vitatu: Umoto ni lyosi, sona nu sulufule vivyo vikafumagha mumalomo agha falasi zila.

¹⁹ Pakuti amaka agha falasi ghali mumalomo ghabo, sona na ku misinda yabo. Imisinda yabo yili ngati zyo njoka zizyo zili ni mitu yiyo zikubombezya pakuvulazya abantu.

²⁰ Abantu bosi abanji babo batakaghoghiwa ni viwaya vilavila, pope bulo batakapinduka nukuvileka vivyo bakabombagha ni nyobe zyabo. Batakaleka pakwiputa imizimu imibibi ni vifwani ivya golide nivya siliva nivya mabwe nivya ikwi vivyo vitangennya pamo ukwivwa pamo ukwenda, awe.

²¹ Abantu bala batakaleka pakughogha kwabo pamo amayele ghabo, pamo ubwamalaya bwabo, pamo ubwiba bwabo.