Ubuvumbuli 8 - IBAYIBOLO 2024

Ichimatilo icha seveni

¹ Bo u Mwana uwa ng'ozi amamatula ichimatilo icha seveni, kumwanya kukaba myee ukwa maminiti 30.

² Po nkennya abantumi aba kumwanya seveni bimite pamaso pa Chala, sona bapeghiwe amapati seveni.

³ Uwantumi uyunji yuyo akaba ni chakufukizizya utwakununkila icha golide, akiza nukwimilila pachighemo. Akapeghiwa utwakufukizya utwakununkila utwinji utwakonjelezya inyiputo izya bantu bosi aba Chala, sona umwakuti iyipe pachighemo icha golide chicho chikaba pantazi pachitengo icha bumwene.

⁴ Ilyosi ilya utwakufukizya utwakununkila tuto tukaba munyobe izya wantumi yuyo akimilila pamaso pa Chala likakwela kumwanya poka ni nyiputo izya bantu aba Chala.

⁵ Po uwantumi yula akasenda ichakufukizizya utwakununkila tula nukuchizuzya numoto uwa pachighemo nukuchisumbila pachisu ichapasi. Pakabalilo kalakala kukaba amabingu, ni vyongo nu tumesya, sona na kasenyenta.

Abantumi bakulizya amapati

⁶ Abantumi seveni bala babo bakaba na mapati munyobe zyabo, bakiyannya ukuti balizye amapati ghala.

⁷ Uwantumi uwakwanda akalizya ipati lyache, po kukiza amabwe agha vula numoto uwakonganikilana poka ni banda nukuvisumbila pachisu ichapasi. Ichigaba choka pa vigaba vitatu ivya chisu ichapasi chikapya, sona isote lyosi iteta likapya.

⁸ Po uwantumi uwabubili wepe akalizya ipati lyache. Ichintu chimo chicho chikabonekagha ngati lyo lighamba ikulu nkani lilyo lili pamoto chikasumbiwa panyanja. Ichigaba choka pa vigaba vitatu ivya nyanja chikanduka libanda,

⁹ Ichigaba choka pa vigaba vyosi vitatu icha vipeliwa ivyabumi munyanja, chikafwa, sona ichigaba choka pa vigaba vitatu ivya mabwato amakulu nkani vikananganika.

¹⁰ Po uwantumi uwabutatu akalizya ipati lyache. Ulutondwa ulukulu, lulo lukakagha ngati cho chikoka lukawila pachigaba choka icha vigaba vitatu ivya soko napa mbwibwi izya mizi.

¹¹ Itabwa ilya lutondwa lulalula likaba we “Kubaba.” Ichigaba choka icha vigaba vitatu ivya mizi chikababagha, sona abantu abinji bakafwa, bo bang'wela amizi ghalaghala pakuti ghakababagha nkani.

¹² Uwantumi uwafolo akalizya ipati lyache. Po ichigaba choka icha izuba nu mwezi ni ntondwa pa vigaba vitatu vikananganika, umwakuti ukulama kwabo ichigaba choka pa vigaba vitatu chikaleka pakulama. Kutakabako ulukozyo muchigaba choka pa vigaba vitatu ivya musanya, sona ni chigaba choka pa vigaba vitatu ivya busiku.

¹³ Bo nkwenelezya, nkalyennya izwanga likubuluka mumwanya nukukolomoka nizyu ilya pamwanya ukuti, “Chighune mwee! Chighune mwee! Ichighune ichikulu nkani chikwiza pakubawila abantu babo bakwikala pachisu ichapasi, bo abantumi aba bumalilo batatu bakulizya amapati ghabo!”