Ubuvumbuli 7 - IBAYIBOLO 2024

Nizya bantu 144,000 aba Izilayeli

¹ Pisinda pazinizi nkennya abantumi aba kumwanya folo bimiliye pankuto folo izya chisu ichapasi. Bakalema impepo folo umwakuti kutakabeko nayimoyimo impepo iyakukuka muchisu ichapasi pamo panyanja pamo pikwi lyosi.

² Po nkennya sona uwantumi uwakumwanya uyunji akukwela kubufumilo bwizuba ali ni chidindo icha Chala umumi. Akabitizya abantumi folo bala nizyu ilya pamwanya nkani, babo u Chala akabapa amaka aghakunanganizizya ichisu ichapasi ni nyanja.

³ Uwantumi yula akati, “Utakanangaye ichisu ichapasi, pamo inyanja, pamo amakwi mupaka papo twabadinda ni chidindo pa vyeni ababombi aba Chala witu.”

⁴ Po nkabuziwa ukuti ubwinji ubwa bantu babo badindiwa pa vyeni vyabo bukaba 144,000. Abantu bosi banaba bakaba inko 12 izya ba Izilayeli.

⁵ Abantu abaluko ulwa Yuda, babo bakadindiwa ni chidindo bakabapo 12,000. Abantu abaluko ulwa Lubeni, babo bakadindiwa ni chidindo bakabapo 12,000. Abantu abaluko ulwa Gadi, babo bakadindiwa ni chidindo bakabapo 12,000.

⁶ Abantu abaluko ulwa Asheli, babo bakadindiwa ni chidindo bakabapo 12,000. Abantu abaluko ulwa Nafutali, babo bakadindiwa ni chidindo bakabapo 12,000. Abantu abaluko ulwa Manase, babo bakadindiwa ni chidindo bakabapo 12,000. Abantu abaluko ulwa Levi, babo bakadindiwa ni chidindo bakabapo 12,000.

⁷ Abantu abaluko ulwa Simiyoni, babo bakadindiwa ni chidindo bakabapo 12,000. Abantu abaluko ulwa Levi, babo bakadindiwa ni chidindo bakabapo 12,000. Abantu abaluko ulwa Isakala, babo bakadindiwa ni chidindo bakabapo 12,000.

⁸ Abantu abaluko ulwa Zebuloni, babo bakadindiwa ni chidindo bakabapo 12,000. Abantu abaluko ulwa Yosefu, babo bakadindiwa ni chidindo 12,000. Abantu abaluko ulwa Benjamini, babo bakadindiwa ni chidindo bakabapo 12,000.

Nizya chilundilo ichikulu icha bantu

⁹ Pisinda pazinizi nkenelezya, po nkennya ichilundilo ichikulu icha bantu ichakuti nayumo umuntu yuyo angabelenga. Bakaba bantu aba muchisu chosi, na bantu abaluko losi, na bantu abaneno zyosi nukwimilila pantazi pachitengo icha bumwene, sona na pamaso pa Mwana uwa ng'ozi. Bakavwala inkazo inswepu nukulema isamba izya mabale munyobe zyabo.

¹⁰ Bakakolomoka nkani bakati, “Ubupoki bukufuma kwa Chala witu, yuyo akwikala pachitengo icha bumwene, na ku Mwana uwa ng'ozi!”

¹¹ Abantumi bosi bakimilila umwakuzyungulila ichitengo icha bumwene, na basongo, ni vipeliwa ivyabumi folo vila. Bakakupamila pasi pantazi pachitengo icha bumwene chila nukumwiputa u Chala.

¹² Bakanena bakati, “Ameni! Amapalo nu muchizi nu buchindamu, na mahala nu bulaghili, sona na maka vya Chala witu bwila na bwila! Ameni!”

¹³ Weka uwa basongo bala akandalusya akati, “Nkimba bantu boni banaba, babo bavwalite inkazo inswepu, sona bafuma kwiyi?”

¹⁴ Nkamwamula nkati, “Mwene wane, wewe uzimenye.” Po akambuzya akati, “Aba bo bantu babo bapona pakuvwimiwa ukukulu nkani. Bachapite inkazo zyabo nukwiswefya bene ni banda ilya Mwana uwa ng'ozi.

¹⁵ Ichi cho chifukwa bakwimilila pantazi, pachitengo icha bumwene icha Chala nukumubombela umusanya nu busiku munyumba yache. Yuyo akwikala pachitengo icha bumwene akwiza pakubafukatila.

¹⁶ Batakwiza pakubapo nizala nalumo, pamo inyota. Batakwiza pakupya ni zuba pamo numoto napo panandi.

¹⁷ Pakuti u Mwana uwa ng'ozi, yuyo ali pakasi na pakasi pachitengo icha bumwene akwiza pakuba mudimi wabo. Akwiza pakubalongolela ku mbwibwi iya mizi amapela bumi. U Chala umwenecho akwiza pakubasyumula amasozi ghosi.”