Ubuvumbuli 6 - IBAYIBOLO 2024

Nizya vimatilo seveni

¹ Po nkennya u Mwana uwa ng'ozi akumamatula ichimatilo choka muvimatilo seveni vila nukwivwa ichipeliwa ichabumi choka muvipeliwa ivyabumi folo chikunena nizyu lilyo likivwika ngati kupaya ukwa vula ukuti, “Zagha.”

² Po nkenelezya nukuyennya ifalasi inswepu. Uwakukwelapo akalema ubwele munyobe zyache, sona akapeghiwa impumpu iya bumwene. Akaba mupoti yuyo akabuka pakupota.

³ Bo u Mwana uwa ng'ozi amamatula ichimatilo ichabubili, nkivwa ichipeliwa ichabumi ichabubili chikuti, “Zagha!”

⁴ Po ifalasi iyinji inchesamu yikaboneka. Uwakukwelapo akapeghiwa amaka aghakulwila ubwite pachisu ichapasi, umwakuti abantu baghoghanaye benebene, sona akapeghiwa upanga umukulu nkani.

⁵ Bo u Mwana uwa ng'ozi amamatula ichimatilo ichabutatu, nkivwa ichipeliwa ichabumi ichabutatu, chikuti, “Zagha!” Nkenelezya nukuyennya ifalasi infitu. Uwakukwelapo akalema ichakupimila munyobe zyache.

⁶ Po nkivwa ngati lyo lizyu likunena mukasi muvipeliwa ivyabumi folo likuti, “Akampepe koka bulo aka vilombe, gho malipilo agha muntu pisiku lyoka, sona utumpepe tutatu bulo utwa malezi, gho malipilo agha muntu pisiku lyoka, loli utakanangannye amafuta gha syunguti nu vinyo!”

⁷ Bo u Mwana uwa ng'ozi amamatula ichimatilo ichafolo, nkivwa ichipeliwa ichabumi ichafolo chikuti, “Zagha.”

⁸ Nkenelezya nukuyennya ifalasi imbufu. Uwakukwelapo akaba we bufwe, sona ichisu icha bantu abafwe chikamukonkagha mwisinda. Bakapeghiwa ubulaghili pachigaba choka icha vigaba folo ivya chisu ichapasi ukuti baghoghe nupanga, nizala, ni chiwaya, sona ni vinyamana ivikali ivya muchisu ichapasi.

⁹ Bo u Mwana uwa ng'ozi amamatula ichimatilo ichafayivi, nkennya imizimu iya bantu muntende mwa chighemo, babo bakaghoghiwa pachifukwa icha mazyu agha Chala, sona nu lusimikizyo lwabo ulwamaka.

¹⁰ Bakakolomoka nkani bakati, “Mwene, Uwamaka Ghosi, umuzelu nu wanaloli, nkimba choni chicho ukukaba pakubalonga abantu aba muchisu ichapasi nukubafunda babo bakatughogha?”

¹¹ Po umuntu wesi akapeghiwa inkazo inswepu, sona bakabuziwa ukuti batuzye panandi bulo mupaka ubwinji ubwa bambombo abanji nu bwinji ubwa bakamu babo bukwane, babo bope baghoghiwanje ngati bo babo.

¹² Bo u Mwana uwa ng'ozi amamatula ichimatilo ichasikisi, pakaba akasenyenta akakulu. Izuba likaba lifitu ngati gho mwenda umufitu, umwezi ghosi ghukachesama ngati lyo libanda.

¹³ Intondwa izya kumwanya zikalaghala pachisu ichapasi ukuyana namumo amakuyu amabisi ghakulaghalila mwikwi, bo impepo iyamaka yikuliyingannya.

¹⁴ Kumwanya kukazyebeluka ukuyana namumo ibuku likunnyengiwa, sona amaghamba ghosi nu tusungo tosi vikepapo pabuzilo bwache.

¹⁵ Po abamwene aba muchisu ichapasi na balaghili na basongo ababwite, na bantu abakabi, na bantu abamaka, na bantu abanji bosi, na bazya poka na bantu ababuke bakavwama bene mumpako na kusi ukwa mabwe agha mumaghamba.

¹⁶ Bakaghitizya amaghamba na mabwe bakati, “Mutuwile, mutufise pamaso pa yuyo ikaye pachitengo icha bumwene, mutufise ku bukali ubwa Mwana uwa ng'ozi.

¹⁷ Pakuti isiku ilyakoghofya ilyakufundiwa kwabo lyafika, po nkimba wewenu angajimba?”