Ubuvumbuli 3 - IBAYIBOLO 2024

Akuchisimbila ichipanga icha mu Salidisi

¹ “Uwantumi uwa muchipanga icha mu Salidisi umusimbile uti, “Amazyu ghagho ghaneniwa na yuyo ali ni mizimu seveni iya Chala, sona yuyo ali ni ntondwa seveni gho agha: “Invimenye vyosi vivyo ukubomba. Napapo umanyikitwe ukuti we mumi, loli inzimenye ukuti we mufwe.

² Lamusya nukuvikazya vyosi vivyo visyalite, vivyo vili papipi pakuzililika, pakuti nkwennya ukuti imbombo zyako zite zyakufikapo pamaso pa Chala wane.

³ Po ukumbuke zizyo ukamanyisiwa, sona na zizyo ukivwa. Uzyivwile, upinduke nukuzileka imbibi zyako. Nanti utakulamusya, nkwiza pakukwizila ngati ne mwiba, sona utakwiza pakukamanya akabalilo kako nkwiza pakukwizila.

⁴ Loli uli na bantu abanandi bulo mu Salidisi, babo batanyazizye amenda ghabo. Abantu banaba bakwiza pakwenda poka nane, bo bavwalite amenda amaswepu pakuti babaghiye.

⁵ Umuntu wesi yuyo akupota, akwiza pakuvwikiwa amenda amaswepu. Ntakwiza pakuzimya itabwa lyache mwibuku ilya bumi. Nkwiza pakumwitika pamaso pa Tata wane, sona napa bantumi bache.

⁶ “Umuntu wesi yuyo ali na makutu, ivwe zizyo u Muzimu Umuzelu akuvibuzya ivipanga.

Akuchisimbila ichipanga icha mu Filadefiya

⁷ “Uwantumi uwa muchipanga icha mu Filadefiya umusimbile uti, “Amazyu ghagho ghaneniwa na yuyo muzelu sona wanaloli, yuyo ali ni chighulilo icha Devedi; nanti ighula, nayumo umuntu yuyo angighalila, sona nanti ighalila, nayumo umuntu yuyo angighula, gho agha:

⁸ “Invimenye vyosi vivyo ukubomba. Inzimenye ukuti amaka ghako manandi, loli wasungilila amazyu ghane, sona utalikana itabwa lyane. Nighula umulyango pantazi papako ghugho nayumo umuntu yuyo angighalila.

⁹ Balipo abantu bamo muchipanga icha Satana, babo bakwinena bene ukuti ba Yuda, loli bate ba Yuda, awe. Abantu banaba nkwiza pakubapela ukuti bize kukwako nukulamba pasi pa nyayo zyako. Bosi bakwiza pakumanya ukuti ane nkughanite.

¹⁰ Pakuti wasungilila amazyu ghane aghakuti ujimbaye, po nane nkwiza pakukusungilila pakabalilo aka njelo, kako kakwiza pachisu chosi ichapasi pakubayela abantu babo bakwikalamo.

¹¹ Nkwiza losi ulu. Ulemezye nkani chicho uli nacho, umwakuti atakabepo nayumo umuntu uwakukufyula impumpu yako.

¹² Umuntu yuyo akupota nkwiza pakumupela pakuba mpanda iya Nyumba iya Chala wane, sona atakwiza pakufumapo nalumolumo kuzi. Nkwiza pakusimba itabwa ilya Chala wane papache, sona ni tabwa ilya kaya akakulu nkani aka Chala, u Yelusalemu umupya, yuyo akwiza pakwika kumwanya kwa Chala wane.

¹³ “Umuntu wesi yuyo ali na makutu, ivwe zizyo u Muzimu Umuzelu akuvibuzya ivipanga.

Akuchisimbila ichipanga icha mu Labodikiya

¹⁴ “Uwantumi uwa muchipanga icha mu Labodikiya umusimbile uti, “Amazyu ghagho ghaneniwa na yuyo akwitiziwa ukuti we Ameni, umusubiliwa, sona nu kaboni uwanaloli, yuyo we chifumo icha vipeliwa vyosi ivya Chala, gho agha:

¹⁵ “Invimenye vyosi vivyo ukubomba ukuti awe ute we mukatazu, pamo we mutukizu. Chikaba chizapo ngali wabanga mukatazu pamo mutukizu.

¹⁶ Loli pachifukwa ichakuti utukiye bulo, ute we mupye pamo mukatazu, nkwiza pakukufwina.

¹⁷ Pakuti ukunena ukuti, ‘Ane ne mukabi, indi navyo vyosi, sona ntakusobelwapo nachimochimo.’ Loli utazimenye ukuti we wantamyo, we mupelachisa, we mupina, we mufwamaso, sona uli nkule.

¹⁸ Polelo nkukubuzya ukuti ughule kukwane ugolide yuyo asyaniwe numoto, ukuti ubanje we mukabi. Ughule sona amenda amaswepu, uvwale ukuti ufise inkule yako nkozyasoni. Ughule umulembo, upake mumaso ghako, umwakuti ungennya.

¹⁹ Nkumuchemela nukumufunda umuntu wesi yuyo imughanite. Polelo lamusya, upinduke nukuzileka imbibi zyako.

²⁰ Ennya, nimiliye pamulyango nkukong'osya, nanti umuntu ivwa izyu lyane nukwighula umulyango, ane nkwiza pakwinjila nukulya poka nawe, sona wepe akwiza pakulya poka nane.

²¹ Umuntu yuyo akupota, nkwiza pakumwitikizya ukwikala nane pachitengo icha bumwene, ukuyana namumo nane nkapotela nukwikala nu Tata pachitengo chache icha ubumwene.

²² “Umuntu wesi yuyo ali na makutu, ivwe zizyo u Muzimu Umuzelu akuvibuzya ivipanga.”