Ubuvumbuli 22 - IBAYIBOLO 2024

¹ Po uwantumi yula akandanjizya ulusoko ulwa mizi amapela bumi, ulwakunyezimila ngati lyo ligalasi, lulo lukufuma kuchitengo icha bumwene ubwa Chala nicha Mwana uwa ng'ozi.

² Lukadumusannyanga pakasi na pakasi pamusebo uwa akaya akakulu nkani. Kulubazu losi ulwa lusoko lula kukaba ikwi ilya bumi, lilyo likwela ivikomwa aka 12 pa mwaka, umwezi nu mwezi, sona amani ghache ghakuposezya nagho inko izya bantu.

³ Nachimochimo chicho chighuniwe nu Chala chingaghiwa mukaya mulamula. Ichitengo icha bumwene icha Chala nicha Mwana uwa ng'ozi chikwiza pakuba mukaya mulamula, sona ababombi bache bakwiza pakumwiputa.

⁴ Bakwiza pakwennya icheni chache, sona itabwa lyache likwiza pakusimbiwa pa vyeni vyabo.

⁵ Kulakula kutakwiza pakubako sona ubusiku. Ukulama ukwa nyale pamo izuba kutakwiza pakulondiwapo nalumo, pakuti u Mwene u Chala akwiza pakuba lukozyo lwabo, sona bakwiza pakuba bamwene bwila na bwila.

Ukwiza ukwa Mwana uwa Muntu

⁶ Pisinda pache uwantumi yula akambuzya akati, “Amazyu agha ghanaloli, sona masubiliwa. U Mwene u Chala, yuyo akubapa umuzimu wache abalaghuzi, amutuma uwantumi wache pakubalanjizya ababombi bache ivintu vivyo vibaghiye pakubombiwa lunulu.”

⁷ U Yesu akuti, “Ivwa kuno! Nkwiza lunulu! Basayiwa abantu babo bakughivwila amazyu aghabulaghuzi ghagho ghali mwibuku linili.”

⁸ Ane ne Yohani, nivwa nukwennya ivintu vinivi. Bo navyivwa nukuvyennya, nkawa pasi munyayo izya wantumi yuyo akandanjizya ivintu vinivi, po nkamwiputa.

⁹ Loli akambuzya akati, “Utakabombaye bunubu! Ane ne wambombo bulo ngati wewe, sona ngati bo bakamu bako babo balaghuzi, sona na bantu bosi babo bakughivwila amazyu ghagho ghali mwibuku linili. Mumwiputaye u Chala!”

¹⁰ Akambuzya sona akati, “Utakafise amazyu aghabulaghuzi agha mwibuku linili, pakuti akabalilo kali papipi akakuti ivintu vyosi vinivi vibombiwe.

¹¹ Umuntu wesi yuyo akubomba ububibi, endelele pakubomba ububibi bwache. Umuntu wesi yuyo munyazu, endelele pakuba munyazu. Umuntu wesi yuyo mugholosu, endelele pakuba mugholosu, sona umuntu wesi yuyo muzelu, endelele pakuba muzelu.”

¹² U Yesu akati, “Ivwa kuno! Nkwiza lunulu! Nkwiza nu muvwalo wane pakumupa umuntu wesi ukuyana ni mbombo zyache.

¹³ Ane ne Alefa nu Omega. Ane ne Wakwanda nu Wakumalila. Ane ne Bwandilo nu Bumalilo.

¹⁴ “Basayiwa abantu babo bakuchapa inkazo zyabo umwakuti babanje nu bulaghili ubwakulyela ivikomwa ivya mwikwi ilya bumi nukwinjila mukaya akakulu nkani ukwendela pamilyango.

¹⁵ Loli kuzi ukwa kaya akakulu nkani kuli imbwa na bamayele na bamalaya na baghoghi na bakwiputa ivifwani sona na babo babughanite ubumyasi.

¹⁶ “Ane ne Yesu, nabatumila amwe uwantumi wane pakufumusya nizya vintu vinivi muvipanga. Ane ne waluko ulwa Devedi. Ane ne lutondwa ulwakulama kubuche nkani.”

¹⁷ U Muzimu Umuzelu nu mukolo yuyo akusendwa bakuti, “Zagha!” Umuntu wesi yuyo akwivwa zinizi, wepe anene ati, “Zagha!” Umuntu wesi yuyo ali ni nyota, ize. Umuntu wesi yuyo akughalonda, muleke asende pabulo amizi amapela bumi.

Amazyu aghabumalilo

¹⁸ Ane ne Yohani, nkumusoka umuntu wesi yuyo akwivwa amazyu aghabulaghuzi mwibuku linili. Nanti umuntu yumo akonjelezyapo chimo, u Chala wepe akwiza pakumonjelezyapo iviwaya vivyo visimbiwe mwibuku linili.

¹⁹ Sona nanti umuntu yumo akwefyapo chimo pa mazyu aghabulaghuzi mwibuku linili, u Chala wepe akwiza pakwefyapo ichigaba chache chimo pikwi ilya bumi, sona nilya Kaya Akakulu nkani Akazelu, chicho chisimbiwe mwibuku linili.

²⁰ Yuyo akusimikizya ivintu vyosi vinivi akuti, “Naloli! Nkwiza lunulu.” Ameni! Mwene Yesu, zagha!

²¹ Ichisa icha Mwene u Yesu chibanje namwe mwebosi. Ameni.