Ubuvumbuli 19 - IBAYIBOLO 2024

¹ Pisinda pazinizi nkivwa ukubuluma ngati chilundilo icha bantu kumwanya kukuti, “U Chala apaliwanje! Ubupoki nu buchindamu na maka vya Chala witu!

² Ubulongi bwache bugholosu sona bwanaloli! U Chala amulonga umukolo umalaya yuyo akachinangannya ichisu ichapasi nu bwamalaya bwache. Amufunda pachifukwa ichakuti akaghogha ababombi bache.”

³ Bakakolomoka sona nkani bakati, “U Chala apaliwanje! Ilyosi ilya moto ghugho ghukukalungulizya akaya akakulu nkani kala likufukila mumwanya bwila na bwila!”

⁴ Abasongo 24 ni vipeliwa ivyabumi folo vikawa pasi nukumwiputa u Chala, yuyo akikala pachitengo icha bumwene bakati, “Ameni! U Chala apaliwanje!”

Nizya lusekelo ulwa sendwa iya Mwana uwa ng'ozi

⁵ Pisinda pache nkivwa izyu ku chitengo icha bumwene likuti, “Mumupalaye u Chala witu, amwe mwe babombi bache mwebosi, amwe mwe mukumuchindika, amwe mwe basongosongo namwe bana abanandi!”

⁶ Po nkivwa ichongo chicho chikivwika ngati cho chilundilo icha bantu, ngati kupoma ukwa mizi, sona ngati kujilimisya ukwa vula. Izyu lila likati, “U Chala apaliwanje! Pakuti u Mwene, u Chala witu, Uwamaka Ghosi, we Mwene!

⁷ Zagha tuhobokaye nukusekela, zagha tumuchindikaye u Chala! Pakuti akabalilo aka lusekelo ulwa sendwa iya Mwana uwa ng'ozi kakwana, sona yuyo akusendwa iyanizye kale nizya sendwa yiniyi.

⁸ Yuyo akusendwa apeghiwe amenda amaswepu, sona ghagho ghasoniwe akiza ukuti avwalaye.” (Amenda amaswepu ghakwimilila imbombo inyiza izya bantu abazelu aba Chala.)

⁹ Palapala uwantumi yula akambuzya akati, “Simba uti, ‘Basayiwa abantu babo bitiziwe kulusekelo ulwa sendwa iya Mwana uwa ng'ozi!’ ” Uwantumi yula akonjelezya sona pakunena ukuti, “Agha gho mazyu aghanaloli agha Chala.”

¹⁰ Panapa nkawa munyayo zyache ukuti imwipute. Loli akambuzya akati, “Utakazibombaye zinizi! Ane ne wambombo bulo ngati wewe, sona ngati bo bawamwinyu babo bakaboni aba Yesu. Mumwiputaye u Chala! Pakuti ubwanaloli ubwa bulaghuzi lo lusimikizyo nizya Yesu.”

Nizya yuyo akukwela pafalasi inswepu

¹¹ Pisinda pache nkennya kumwanya kwighukite, po nkennya ifalasi inswepu. Uwakukwelapo akaba we Musubiliwa sona Wanaloli. Akulonga nukulwa ubwite bwache mubwanaloli.

¹² Amaso ghache ghakaba chee ngati zyo ndimi izya moto, sona akavwala impumpu inyinji nkani kumutu wache. Akasimbiwa itabwa papache, lilyo nayumo umuntu yuyo akalimanyagha, loli mwene bulo.

¹³ Inkazo yiyo akavwala yikazubikiwa mwibanda. Yunuyu itabwa lyache we Mazyu agha Chala.

¹⁴ Abasilikali aba kumwanya bakamukonka yuyo akakwela pa falasi inswepu, bo bavwalite amenda amaswepu, sona amatonte.

¹⁵ Mumulomo wache mukafuma upanga yuyo akwete nkani, uwakupotela abantu aba inko izyakulekanalekana. Akwiza pakubalaghila ni ndisa yache iya chela, sona akwiza pakukanyannya amampesya muchiliba ichakukanyilamo amampesya icha bukali ubwa Chala Uwamaka Ghosi.

¹⁶ Pa nkazo yache sona na pantapatapa pakasimbiwapo itabwa ilyakuti, “Umwene uwa bamwene, sona Umulaghili uwa balaghili.”

¹⁷ Po nkamwennya uwantumi imiliye pizuba. Akakolomoka nkani nukuvibuzya iviyuni vyosi vivyo vikabulukagha mumwanyamwanya akati, “Zagha, mubungane poka pa lusekelo ulukulu nkani ulwa Chala!

¹⁸ Zagha, mulye amabili agha bamwene, nagha basongo ababwite nagha basilikali nagha falasi nagha bakukwelapo nagha bantu bosi abazya na bantu abasatuke abasongo na banandi bulo!”

¹⁹ Pisinda pache nkennya ichinyamana chila na bamwene aba muchisu ichapasi na basilikali babo bakubungana ukuti balwe ubwite na yuyo akwelite pafalasi, poka na basilikali bache.

²⁰ Loli ichinyamana chikalemiwa poka nu mulaghuzi umumyasi, yuyo akabombagha iviswigho pantazi papache. Ni viswigho vilavila akabazimbula abantu babo bakadindiwa ni chidindo icha chinyamana, sona na bantu babo batakachiputa ichifwani icha chinyamana chila. Ichinyamana poka nu mulaghuzi umumyasi yula, bosi babili aba bakasumbiwa bumi munyanja iya moto uwa sulufule.

²¹ Abasilikali babo bakaghoghiwa nupanga uwakufuma mumulomo uwa yuyo akakwela pafalasi. Po iviyuni vyosi vikasong'ompola amabili ghabo mosi mumo vikalondelagha.