Ubuvumbuli 18 - IBAYIBOLO 2024

Ukumongonkana ukwa kaya akakulu aka Babiloni

¹ Bo vyachilapo vinivi, nkennya uwantumi akwika kumwanya. Akaba nu bulaghili ubukulu nkani, sona ubuchindamu bwache bukalamila ichisu chosi icha ichapasi.

² Akakolomoka nizyu ilya pamwanya nkani akati, “Kamala mwee! Kamala mwee! Kamala akaya akakulu nkani aka Babiloni! Ipelite mwene pakuba buzilo ubwa mizimu imibibi. Ipelite pakuba chivulumbo icha viyuni vyosi ivinyazu pakuba buzilo ubwa vinyamana ivilwani.

³ Ivyisu vyosi vyang'wela uvinyo wache, uvinyo umukali uwa bwamalaya bwache. Abamwene aba muchisu ichapasi bakalowa nawe, sona abaghulizi aba muchisu ichapasi bakaba bakabi pachifukwa icha bumi bwache ubwamwalwemwalwe.”

⁴ Pisinda pache nkivwa izyu ilinji kumwanya likuti, “Mwee bantu bane, epamo mukaya kache, umwakuti mutakagabane nawe imbibi zyache ukuti mutasendepo ichigaba muviwaya vivyo vikwiza pakumuwila.

⁵ Pakuti imbibi zyache zyalundinkana pakufika kumwanya, u Chala akumufunda pachifukwa icha bubibi bwache.

⁶ Umubombelaye bulo vivyo wepe akakubombela, umutanizikizyanje kabili pa zizyo abomba. Izuzya kabili ulubako lwache ulwa ntamyo zizyo wepe akwiza pakuyimba nazyo.

⁷ Mumuyivye nkani nukumupelela intamyo inkulu nkani ukuyana nu buchindamu bwache nubumi bwache ubwakwilagha. Pakuti akwituvya mumoyo wache akuti, ‘Nkwikala pano ngati we mwene umukolo. Ane inte ne mufwilwe, sona ntakwiza pakusulumannyapo nalumo.’

⁸ Pachifukwa icha zinizi, iviwaya vikwiza pakumuwila pisiku lyoka, iviwaya ivya bubine nukulila, sona nizala. Akwiza pakulunguliziwa numoto pakuti u Mwene u Chala, yuyo akumulonga wamaka.

⁹ “Abamwene aba muchisu ichapasi babo bakalowa nawe bakwiza pakukalilila nukukafwifwitilila akaya akakulu nkani kala, bo bakulyennya ilyosi ilya moto ghugho ghukumulungulizya.

¹⁰ Bakwiza pakwimilila pabutalipo pachifukwa ichabogha nintamyo zyache. Bakwiza pakunena ukuti, ‘Intamyo mwee! Intamyo mwee! Intamyo wee akaya akakulu nkani aka Babiloni, akaya akamanyikwe, sona akamaka! Awe wafundiwa mwa awala weka bulo.’

¹¹ “Bope abaghulizi aba muchisu ichapasi bakumulilila nukufwifwitila, pachifukwa ichakuti nayumo umuntu yuyo akubaghulapo sona ukatundu wabo.

¹² Nayumo umuntu yuyo akughula ugolide nu siliva wabo nutumabwe utwamutengo na mambo na amenda amaswepu na machesamile na amenda amatonte na menda amachesamu namakwi aghamutengo ni vintu vyosi ivyakulekanalekana ivya mpembe izya zovu na amakwi aghamutengo ni vintu ivya mukuba ni chela na mabwe amiza,

¹³ ivyakunonezya ivyakulya ni vyakununkila ivya mila, uvinyo na mafuta nu busu ubutinye ni ngano ni ing'ombe ni ng'oz ni ifalasi ni ngolo na bazya sona na bantu bulo.

¹⁴ “Abaghulizi bala bakwiza pakunena ukuti, ‘Ivyakwilagha vivyo umoyo wako ghukavinyonywanga, ilelo vyakumalila sona ubukabi nu buchindamu bwako bosi bwakumalila utakwiza pakuvyaghapo nalumo.’

¹⁵ Abaghulizi babo bakaba bakabi pachifukwa ichakughulizya ivintu vyabo mukaya kalakala, bakwiza pakwimilila pabutalipo pachifukwa ichabogha nintamyo zyache. Bakwiza pakulila nukufwifwitila,

¹⁶ bakanena bakati, ‘Intamyo mwee! Intamyo mwee! Intamyo wee akaya akakulu nkani. Ukavwala amenda amaswepu na machesamile sona na machesamu. Ukavwala ivintu ivya golide na mabwe aghamutengo, sona na mambo agha pamwanya.

¹⁷ Mwa awala weka bulo ubukabi bosi bwananganika!’ “Abenecho bosi aba bwato ubukulu nkani na bendazila na bakapitawa aba bwato ubukulu nkani na bantu abanji bosi abaghulizi panyanja bakimilila pabutalipo.

¹⁸ Bo balyennya ilyosi ilya moto ghugho ghukumulungulizya, bakakolomoka nkani bakati, ‘Kataliko sona akaya akanji kako kayanite nakaya akakulu nkani aka!’

¹⁹ Bakikupulila ulufumbi pamitu yabo pachifukwa icha chitima ichikulu nkani, bakalila nukufwifwitila nukuti, ‘Intamyo mwee! Intamyo mwee! Intamyo wee akaya akakulu nkani, akaya kako abenecho aba mabwato amakulu nkani panyanja bakaba bakabi ukwendela mu bukabi bwache. Loli vyosi vikananganika mwa awala bulo weka.’

²⁰ Hobokagha we chisu icha kumwanya, hobokagha mwe bantu abazelu aba Chala, na batumiwa, sona na balaghuzi! Pakuti u Chala amususya ukuyana bulo namumo akabombelagha!”

²¹ Po uwantumi uwamaka akanyamula ibwe lilyo ubukulu bwache likayana nu lwala ulukulu nkani, akalisumbila munyanja nukuti, “Umu momumo akaya akakulu nkani aka Babiloni kakwiza pakusumbiliwa. Katakwiza pakubonekapo nalumo.

²² Mumwako mutakwiza pakwivwikapo nalumo ukulila ukwa chinanda ni nyimbo izya bantu, na malongi na mapati. Mumwako mutakwiza pakwaghiwamo sona abafundi abambombo zyosi. Ichongo icha lwala lula chitakwiza pakwivwikapo nalumolumo mumwako.

²³ Mutakwiza pakubonekapo nalumolumo ukulama ukwa nyale mumwako. Mumwako mutakwiza pakwivwikapo nalumo izyu ilya mwenesendwa nilya yuyo akusendwa. Abaghulizi bako bakaba bamaka nkani muchisu ichapasi. Ukabazimbula abantu bosi aba muchisu ichapasi na mayele ghako aghabumyasi.

²⁴ Akaya aka Babiloni kakufundiwa pachifukwa icha libanda ilya balaghuzi, nilya bantu abazelu aba Chala sona nilya bantu bosi babo bakaboliwa muchisu ichapasi.”