Ubuvumbuli 16 - IBAYIBOLO 2024

Imbako izya bukali ubwa Chala

¹ Po nkivwa izyu ilyamaka mu Nyumba iya Chala likunena na bantumi seveni bala likuti, “Kakupulile pachisu ichapasi ubukali ubwa Chala, bubo buli mumbako seveni zila.”

² Uwantumi uwakwanda akabuka nukukupulila vivyo vikaba mulubako lwache pachisu ichapasi, po ivilonda ivibibi ni vibozu vikaboneka pabantu babo bakaba ni chidindo icha chinyamana, sona na pabantu babo bakachiputagha ichifwani chache.

³ Po uwantumi uwabubili akakupulila vivyo vikaba mulubako lwache panyanja. Amizi ghakanduka libanda, ghagho ghakaba ngati lyo libanda ilya muntu umufwe, sona ivipeliwa ivyabumi vyosi munyanja mula vikafwa.

⁴ Uwantumi uwabutatu akakupulila vivyo vikaba mulubako lwache musoko na mu mbwibwi izya mizi. Po amizi ghala ghakanduka libanda.

⁵ Po nkivwa uwantumi yuyo akaba nu bulaghili pamizi akuti, “Awe we Mugholosu, sona we Muzelu awe uliko, sona ukabako pakuti wavilonga ivintu vinivi.

⁶ Bakakupula ibanda ilya bantu abazelu na balaghuzi, po wabapa ibanda ukuti bang'wele, ukuyana namumo chikababaghilila.”

⁷ Po nkivwa izyu pachighemo likuti, “Mwene Chala Uwamaka Ghosi! Ubulongi bwako bwanaloli, sona bugholosu!”

⁸ Uwantumi wafolo akakupulila vivyo vikaba mulubako lwache pizuba, po izuba likapeghiwa amaka aghakubochela abantu numoto.

⁹ Po ichitukivu ichikali chikabocha abantu bala, po abantu bala bakalighuna itabwa ilya Chala, yuyo ali nu bulaghili pa viwaya. Loli batakapinduka nukuzileka imbibi zyabo pamo pakumupala u Chala.

¹⁰ Uwantumi uwafayivi akakupulila vivyo vikaba mulubako lwache pachitengo icha bumwene icha chinyamana. Ichisi chikawila pabumwene ubwa chinyamana chila, po abantu bakilumannya indimi zyabo pachifukwa icha bubavu.

¹¹ Bakamughuna u Chala uwakumwanya pachifukwa icha bubavu ni vilonda vyabo. Loli batakapinduka pamo ukuzileka imbombo zyabo imbibi zizyo bakabombagha.

¹² Uwantumi wasikisi akakupulila vivyo vikaba mulubako lwache mulusoko ulwa Yufuleti. Ulusoko lukapwa pakubayanizizya izila abamwene abakubufumilo bwizuba.

¹³ Po nkennya imizimu imibibi mitatu, yiyo yikabonekagha ngati bo bachula yikufuma mumulomo uwa nyivwila ni chinyamana, sona na mumulomo uwa mulaghuzi umumyasi.

¹⁴ Iyi mizimu imibibi yiyo yikupela iviswigho. Imizimu mitatu iyi yikubuka pakubabungannya abamwene bosi aba muchisu ichapasi ukuti balwe ubwite pisiku ikulu nkani ilya Chala Uwamaka Ghosi.

¹⁵ “Ennya! Nkwiza ngati ne mwiba! Musayiwa umuntu wesi yuyo akuba maso nukughasunga amenda ghache, umwakuti atakwiza pakwenda nkule nukusamuliwa pachilundilo!”

¹⁶ Po imizimu yila yikababugannya poka abamwene pabuzilo bubo mu Chihebeli bukwitiziwa ukuti Alamagedoni.

¹⁷ Uwantumi uwaseveni akakupulila vivyo vikaba mulubako lwache mumwanya. Izyu ilya pamwanya likivwika ukufuma muchitengo icha bumwene mu Nyumba iya Chala likati, “Kwamala!”

¹⁸ Po kukabako utumesya, ukujilimisya nukupaya ukwa vula, sona na kasenyenta akakoghofya. Kutakabako akasenyenta ngati ko aka ukwandila pakabalilo kako abantu bakapeliwanga. Aka kakaba kasenyenta akabibi patosi.

¹⁹ Akaya akakulu nkani aka Babiloni kakagabinkana patatu, sona nutwaya utukulu nkani utwa vyisu vyosi tukamongoliwa. U Chala akamung'wesya u Babiloni umukulu nkani yula uvinyo uwa mulubako lwache, lulo lukizula nu bukali bwache ubukulu.

²⁰ Utusungo tosi tukazyebeluka, sona na maghamba bulo ghakazimila.

²¹ Amabwe amakulu aghavula ghagho ubung'wamu ubwa libwe lyoka bukabanga amakilogalamu 50, ghakabawila abantu ukufuma kumwanya. Loli pope bulo abantu banaba bakamughuna u Chala pachifukwa icha mabwe aghavula ghala, pakuti chikaba chiwaya ichikulu nkani.