Ubuvumbuli 15 - IBAYIBOLO 2024

Nizya bantumi seveni ni viwaya seveni ivya bumalilo

¹ Pisinda pache nkennya ichiswigho ichikulu ichinji, kumwanya. Pakaba abantumi seveni babo bakaba ni viwaya seveni, vivyo vikaba vyabumalilo ivyakulanjizya ubukali ubwabumalilo ubwa Chala.

² Po nkennya chicho chikaboneka ngati yo nyanja iya galasi yonganikiye numoto. Nkennya sona abantu babo bakachipota ichinyamana ni chifwani chache, sona ni nambala iya litabwa lyache. Bakimagha papipi ni nyanja iya galasi, bo balemite munyobe amalonji ghagho u Chala akabapa.

³ Bakimba ulwimbo ulwa Mozesi, umubombi uwa Chala, sona nu lwimbo ulwa Mwana uwa ng'ozi ukuti, “Wee Mwene Chala Uwamaka Ghosi, imbombo zyako nkulu sona zyakuswighisya nkani! Wee Mwene uwa inko zyosi, izila zyako zyanaloli sona ngolosu.

⁴ Wee Mwene, nkimba wewenu atangakunyila nukulichindika itabwa lyako? Pakuti awe wemwene we Muzelu. Abantu abaluko losi bakwiza pakukwiputa, pachifukwa ichakuti imbombo zyako ngolosu zikuboneka pabuzelu na bantu bosi.”

⁵ Pisinda pache nkenelezya nukwennya Inyumba iya Chala, sona Ichisakasa icha lusimikizyo kumwanya likaba lyighuke.

⁶ Abantumi seveni aba Chala babo bakaba ni viwaya seveni bakafuma mu Nyumba iya Chala, bo bavwalite amenda amaswepu aghakunyezimila, sona na balamba aba golide pavifuba vyabo.

⁷ Po choka icha vipeliwa ivyabumi folo vila chikabapa abantumi seveni bala ulubako ulwa golide lulo lukizula nu bukali ubwa Chala, yuyo mumi bwila na bwila.

⁸ Inyumba iya Chala yikizula ni lyosi ilya buchindamu na maka agha Chala. Nayumo umuntu yuyo anginjilamo mu Nyumba iya Chala mupaka papo abantumi seveni bala bamala pakukupula iviwaya seveni vila.