Ubuvumbuli 13 - IBAYIBOLO 2024

Nizya vinyamana vibili

¹ Pisinda pache nkennya ichinyamana chikuzubuka munyanja. Chikaba ni mpembe 10 sona ni mitu seveni. Pa lupembe loka pakaba impumpu iya bumwene, sona pamutu wache ghosi pakasimbiwapo itabwa ilyakumusamula u Chala.

² Ichinyamana chila chikabonekagha ngati we zyela, sona inyayo zyache zikabonekagha ngati zyo nyayo izya labwe. Umulomo wache ghukabonekagha ngati gho mulomo uwa nkalamu. Inyivwila yikachipa ichinyamana chila amaka ghache, ni chitengo chache icha bumwene, sona nu bulaghili ubukulu nkani.

³ Umutu ghoka mu mitu iya chinyamana chila ghukabonekagha ngati ghuli ni nkonko. Loli inkonko yila yikaba ukuti yapola, sona abantu bosi bakaswigha nkani nukuchikonka ichinyamana chila.

⁴ Abantu bosi bakayiputa inyivwila yila, pachifukwa ichakuti yikachipa ubulaghili bwache ichinyamana chila. Bakachiputa sona ichinyamana chila ukuti, “Wewenu yuyo ayanite ni chinyamana chinichi? Wewenu yuyo angalwana nacho?”

⁵ Ichinyamana chila chikitikiziwa pakunena amazyu aghamituvyo, sona na ghakumusamula u Chala. Chikitikiziwa sona pakuba nu bulaghili amezi 42.

⁶ Chikanda pakumusamula u Chala, pakulituka itabwa lyache, pakubutuka ubuzilo bwache bubo akwikalapo, sona nukubatuka abantu bosi babo bakwikala kumwanya.

⁷ Chikitikiziwa pakulwa ubwite na bantu aba Chala nukubapota. Chikapeghiwa ubulaghili pakubalaghila abantu bosi, na baluko losi, na bantu aba inko zyosi, sona na bantu abaneno zyosi.

⁸ Abantu abakwikala muchisu ichapasi bakwiza pakuchiputa ichinyamana chila, abantu bosi babo amatabwa ghabo ghatasimbiwe mwibuku ilya bumi ilya Mwana uwa ng'ozi, yuyo akaboliwa yula.

⁹ Umuntu wesi yuyo ali na makutu aghakwivwila, ivwe!

¹⁰ Umuntu wesi yuyo abaghiye pakuba muzya naloli akwiza pakuba muzya. Umuntu wesi yuyo abaghiye pakuboliwa nupanga, akwiza pakuboliwa naloli nupanga. Po panapa pakulonda ukuti abantu aba Chala babanje bakujimba nukuba bamaka mulwitiko.

¹¹ Po nkennya sona ichinyamana ichinji chicho chikafuma pasi pachisu. Chikaba ni mpembe zibili ngati zyo mpembe izya Mwana uwa ng'ozi, sona chikanenagha ngati yo nyivwila.

¹² Chikabombezya ubulaghili bosi ubwa chinyamana ichakwanda chila, sona abantu bosi babo bakikalagha muchisu ichapasi bakafyengiwa bulo pakuchiputa ichinyamana ichakwanda chila chicho inkonko yache yikapola.

¹³ Ichinyamana ichabubili chila chikapela iviswigho ivikulu nkani. Chikapela umoto ukuti wike pachisu ichapasi, bo abantu bosi bakwennya.

¹⁴ Chikabazimbula abantu bosi abakwikala muchisu ichapasi pakupela iviswigho vivyo chikitikiziwa ukuti chibombaye pamaso pa chinyamana ichakwanda chila. Ichinyamana chila chikababuzya abantu ukuti babize ichifwani ichakuchindikila ichinyamana chicho chikavulaziwa nupanga, loli pope bulo chikaba nubumi.

¹⁵ Ichinyamana ichabubili chikitikiziwa pakuchifutila umuyi ichifwani icha chinyamana ichakwanda chila, umwakuti ichifwani chila chinene nukubaghogha abantu babo batakuchiputa.

¹⁶ Ichinyamana ichi chikabafyenga abantu bosi, abanandi na bantu abasongo na bantu abakabi na bantu abapina na bazya na bantu ababuke ukuti badindiwe ichidindo panyobe indilo pamo pa vyeni vyabo.

¹⁷ Chikabomba bunubu ukuti patakabepo nayumo umuntu uwakughula pamo uwakughulizya, nanti ate ni chidindo, kokuti itabwa ilya chinyamana ichakwanda chila, pamo inambala iya litabwa lyache.

¹⁸ Panapa pakulondiwa amahala. Umuntu wesi yuyo ali na mahala, abelengele inambala iya chinyamana pakuti inambala yikwimilila itabwa ilya muntu. Inambala yache we 666.