Ubuvumbuli 10 - IBAYIBOLO 2024

Uwantumi ni buku ilyakunnyengiwa inandi

¹ Pisinda pache nkamwennya uwantumi uyunji uwamaka akwika kumwanya. Akavwinkiwa mwibingu, sona kumutu wache kukaba umupingopingo uwa vula. Icheni chache chikaba ngati lyo lizuba, sona ivinama vyache vikaba ngati zyo mpanda izya moto.

² Akalema ibuku ilyakunnyengiwa inandi ilizungulule munyobe yache. Ichinama chache ichandilo akakanya panyanja, po ichamongo akakanya pisila.

³ Uwantumi yula akakolomoka nkani ukuyana namumo inkalamu zikubulumila. Bo akolomoka bulo, ukupaya seveni ukwa vula kukivwika.

⁴ Bo ivula yapaya, nkaba papipi pakusimba. Loli nkivwa izyu kumwanya likuti, “Utakavumbulaye zizyo ukupaya ukwa vula kwanena, sona utakazisimbe!”

⁵ Po uwantumi yuyo nkamwennya akanyite panyanja na pisila akakwezya inyobe yache indilo mumwanya.

⁶ Po akalapa mwitabwa ilya Chala yuyo akubangako bwila na bwila, yuyo akapela kumwanya ni chisu ichapasi, ni nyanja, sona na vyosi vivyo vili mumo. Uwantumi yula akati, “Kutakwiza pakuba sona ukukaba!

⁷ Loli bo uwantumi waseveni alizya ipati lyache, izya kubusyefu zizyo u Chala akayanizya zila zikwiza pakubombiwa, ukuyana namumo akafumusikizya pakasi pa bambombo bache abalaghuzi!”

⁸ Po izyu lilyo ivwa kumwanya likanena sona kukwane likati, “Kasende ibuku, lilyo lili munyobe iya wantumi yuyo akanyite panyanja na pisila.”

⁹ Nkabuka ku wantumi yula nukumulaba ukuti ampe ibuku inandi lila. Akambuzya akati, “Lisende nukulilya. Likwiza pakubaba mulwanda lwako, loli mumulomo wako likwiza pakunona ngati bo buchi.”

¹⁰ Po nkasenda ibuku inandi lila munyobe iya wantumi nukulilya, po likanona ngati bo buchi mumulomo wane. Loli bo namila, likanda pakubaba mulwanda lwane.

¹¹ Po nkabuziwa ukuti, “Ubaghiye ufumusye sona amazyu agha Chala ghagho ghakunena nizya bantu abinji ninko izyakulekanalekana ni neno inyinji sona na bamwene.”