Obadiya 1 - IBAYIBOLO 2024

¹ Ichisetuka icha Obadiya. Agha gho mazyu agha Mwene Uwamaka Ghosi ghagho ghakunena nizya chisu icha Edomu gho agha: Twivuye amazyu aghakufuma kwa Mwene. Intumi yikatumiwa ku inko izinji na mazyu aghakuti, “Nyamuka, twende pakulwa ubwite, na bantu aba mu Edomu.”

U Mwene akwiza pakuchifunda ichisu icha Edomu

² U Mwene akuchibuzya ichisu icha Edomu akuti, “Nkwiza pakubapela pakuba banandi bulo pakasi pa inko, sona mukwiza pakusuliwa.

³ Ukwituvya ukwa moyo wako kwakuzimbula, awe we ukwikala mumpako izya mabwe, nukuzenga inyumba yako, pabuzilo ubwapamwanya, nukunena wemwene ukuti, ‘Nkimba wewenu yuyo anganyisya pasi?’

⁴ Napapo ukubuluka ngati lizwanga, nukuluka ichivulumbo chako, pakasi pantondwa pope bulo nkwiza pakukwisya.” U Mwene anena.

⁵ “Nanti abiba biza pabusiku pakwiba, bakusenda vyosi vivyo bakuvilonda, abakuyaba amampesya bakughalekako ghamo, loli abalwani binyu bakubibila umwakufikapo.

⁶ Loli ubukabi ubwa Esabu bwafyuliwa, sona ichuma chache chibiwe!

⁷ Abamanyani binyu bakubazimbula babo bakubachimbizyamo muchisu chinyu, babo bakaba pamutende namwe babapota. Abamanyani babo bakulya poka namwe bakubategha nivipingo, loli amwe mutakuchimanya.

⁸ “Nkimba mwisiku lila ntakwiza pakubanangannya abantu, abamahala aba mu Edomu, nukumazya ubumanyi ubwa luko ulwa Esabu?

⁹ Wee Temani, abasilikali bako bakwiza pakukunyila, sona umuntu wesi akwiza pakughoghiwa pighamba ilya Esabu.

¹⁰ Pachifukwa icha lombwa ku mukamu wako u Yakobo, ukwiza pakukoziwa isoni, nukukunangannya bwila na bwila.

¹¹ Pisiku lila ukimilila bulo pabutali, bo abayeni bakusenda ubukabi bwabo, sona bo bakwinjila pamilyango, nukupanga amayele mu Yelusalemu, ukaba ngati weyumo uwababo.

¹² Loli amwe mutakituvyanje pisiku ilya ntamyo izya bamwinyu, pamo ukusekela pisiku ilya kughoghiwa ukwa ba Yuda, pamo ukwituvya pisiku ilya ntamyo zyabo.

¹³ Mutakinjilaye pamilyango iya bantu bane, nukwituvizya muntamyo zyabo, pamo ukufyula ubukabi bwabo pisiku ilya ntamyo zyabo.

¹⁴ Mutakalindililaye pazila indekana nukubaghogha babo bakachimbilamo, pamo ukubabika munyobe izya balwani, babo bakapona pisiku lyabo ilya ntamyo.

U Mwene akuzilonga inko

¹⁵ “Isiku ilya Mwene lipalamiye ku inko zyosi. Wee Edomu, ngati mumo wabombela, zikwiza pakubombiwa nakukwako bulo, vivyo wabomba vikwiza pakunyokela pamutu wako.

¹⁶ Ngati mumo ukang'welela pighamba lyane ipaghuliwa, momumo inko zikwiza pakung'welela ukusita kulekapo, sona nukuba ngati batang'welitepo.

¹⁷ Loli pighamba ilya Ziyoni bakwiza pakwikalapo abapokiwa, sona abaluko ulwa Yakobo bakwiza pakuba nichilingo ichabo.

¹⁸ Abaluko ulwa Yakobo bakwiza pakuba ngati moto, sona abaluko ulwa Yosefu bakwiza pakuba ngati ndimi iya moto. Loli abaluko ulwa Esabu bakwiza pakupya, ngati mumo umoto ghukochela ivizinka. Atakwiza pakubako nayumo uwakupona pabaluko ulwa Esabu.” U Mwene anena.

¹⁹ “Abantu aba muchigaba icha Negebu, bobabo bakwiza pakwikala pighamba ilya Esabu, po aba mumakombe agha Shefala ichisu icha ba Filisiti chikwiza pakuba chabo. Bakwiza pakwikala muvyisu ivya Efulayimu nu Samaliya, po aba Benjamini bakwiza pakufyula ichisu icha Giliyadi.

²⁰ Aba Izilayeli babo bakalemiwa pakuba bakayidi, bakwiza pakuchifyula ichisu icha Kenani pakuba chabo, mupaka kumpaka iyakumitu kwa Zalefati. Aba ku Yelusalemu babo bakaba bakayidi mu Sefaladi, bakwiza pakufyula utwaya utukulu utwa Negebu.

²¹ Abakupona bakwiza pakukwela ighamba, ilya Ziyoni pakulaghila pighamba ilya Esabu. Sona ubumwene bukwiza pakuba bwa Mwene.”