Nkuto 5 - IBAYIBOLO 2024

Ulwiputo ulwakulaba ichisa

¹ Wee Mwene kumbuka zizyo zyatuwila, sona ennya namumo bakutukozezya isoni.

² Ichilingo chapeghiwa ku bayeni, sona inyumba zyitu zipeghiwe kubendazila.

³ Twaba twe balanda, sona tute na batata, po abamayi baba bakolo abafwilwe.

⁴ Tukughulagha amizi ghagho tukung'wela. Zyope inkwi izyakupembela umoto tughulaye.

⁵ Ikoli lili pasingo zyitu, sona tukuchimbiziwa nkani, twalita po batakutwikizya pakutuzyapo.

⁶ Tukababombela aba Ijiputi naba Asiliya, ukuti batupeko ichakulya ichakukwana.

⁷ Abanyenya bitu bakananga, po bazimila, aswe tukufundiwa pachifukwa icha imbibi zyabo.

⁸ Abazya bakutulaghila, sona atalipo nayumoyumo uwakutupoka munyobe zyabo.

⁹ Pakuchagha ichakulya tukukomanagha nu bupalapala nkani, pachifukwa icha babo bakubaghogha abanji munkolongo.

¹⁰ Amabili ghitu ghapiye nkani ngati muvuno, pachifukwa icha kubaba ukwa zala.

¹¹ Mu Yelusalemu abakolo balemiwe pamaka, sona mope mutwaya utwa Yuda abalindu balemiwe pamaka.

¹² Abalongozi bakubapayika pakubapinya inyobe zyabo, batakubachindika napo panandi abasongosongo.

¹³ Abalumendo bakubafyenga pakusya palwala, tope utulumendo tukutantalila ni mizigho iyankwi.

¹⁴ Abasongosongo bakepapo pamulyango uwakaya akakulu nkani, abalumendo inyimbo zitakwivwika sona.

¹⁵ Ukusekela kwitu kwepa mumoyo ghitu, ukujina kwitu kwanduka pakuba chililo.

¹⁶ Impumpu yitu yawa kumitu yitu, sona twaghuniwa pachifukwa ichakuti twananga nkani!

¹⁷ Pachifukwa cha zinizi, amoyo ghitu ghadedebaye nkani. Pachifukwa cha zinizi, amaso ghitu ghakwennya akafobela.

¹⁸ Pakuti akaya akakulu nkani aka Yelusalemu kaba chisami, sona abakabila bakunyelanyelamo mulamula.

¹⁹ Wee Mwene laghilagha bwila na bwila, ichitengo chako chibanjeko mupaka inkulilo zyosi.

²⁰ Nkimba choni chicho akabalilo kosi ukutuluvyanga, sona choni chicho watuleka twebene ukwa kabalilo akatali nkani?

²¹ Wee Mwene tunyosezye kukwako, umwakuti tunyokelemo sona, amasiku ghitu ghabanje ngati gho ghakale ghala.

²² Nkimba watukanila zila, sona watukalaliye umwakufikapo?