Nkuto 4 - IBAYIBOLO 2024

¹ Mwee, ugolide yula anyalite nkani, ugolide umwenecho yula ananganikite. Amabwe aghamutengo ghala agha mu Nyumba iya Chala yanyampana, kunkuto zyosi izya mumisebo.

² Abakolo aba mu Yelusalemu babo bakaba bapamwanya ngati we golide, ilelo bali ngati zyo sonta bulo, zizyo zimatiwe nu mumatasonta.

³ Abakambwe bamenye pakonkezya utwana twabo, loli abantu bane bali na moyo amakafu ngati ntibatiba.

⁴ Pachifukwa icha nyota, ululimi ulwa mwana wache lulematiye ichikende. Abana babo bakulonda ivibama, loli atalipo nayumoyumo umuntu uwakubapa.

⁵ Abantu babo bakalyanga ivinonu, ilelo bakusebaseba bulo mumisebo. Abantu babo bakavwalagha amenda aghamutengo ilelo bali pachintuntululu pakulonda ichakulya.

⁶ Abantu bane bafundiwa nkani, ukuchila namumo bakafundiliwanga abantu aba mu Sodomu, Abantu banaba bakafundiwa mukabalilo akapimpa bulo sona patakabapo nayumoyumo umuntu uwakubavwa.

⁷ Abamwene bache bakalamagha nkani ukuchila ukabefu, sona nukuluchila ulukama. Ghope amabili ghabo ghakaba machesamu nkani, ukughachila amabwe agha Lubi, sona bakabonekagha ngati we safile.

⁸ Loli ilelo bali bulo fii ngati mazimwa, abantu batakubaghannya mumisebo. Ghope amabili ghabo ghakakatiye kumafupa ghabo, ghumiliye ngati chizinka ichumizu.

⁹ Abantu babo bakughoghiwa nupanga bizapo, ukubachila babo bakufwa nizala. Bakaghandagha sona bakazililikagha pachifukwa icha zala.

¹⁰ Abakolo abachililizi bakapiya abana babo pakuba chakulya chabo, bakaba chakulya bo abantu bache bakunanganika.

¹¹ U Mwene akakalala nkani, po akapungula ubukali bwache ubwakwaka. Akakozya umoto mu Yelusalemu ghugho ghukalungulizya ulwalo lwache.

¹² Abamwene aba pachisu ichapasi batakuzisubila sona wepe umuntu wesi uwa muchisu ichapasi atakuzisubila ukuti abalwani bakinjila pamilyango iya kaya akakulu nkani aka Yelusalemu.

¹³ Loli chikabombiwa pachifukwa icha mbibi izya balaghuzi bache, sona pachifukwa icha kunanga ukwa baputi bache, babo bakabaghogha abantu abagholosu mulamula.

¹⁴ Ilelo bakupapasyapapasya bulo mumisebo, ngati po bafwamaso. Binyazya bene ni banda umwakuti atalipo nayumo uwakujimba pakupalamasya inkazo zyabo.

¹⁵ Abantu bakukolomoka bakutinji, “Epapo pano, mwee bantu abanyazu! Epapo! Epapo, mutakatupalamasyanje!” Nanti bakuchimbila nukwendakwenda, inko izinji zikubabuzya ukuti, “Tutakubitikizya pakwikala sona kuno.”

¹⁶ U Mwene umwenecho abanyampanizye, sona atakubabelengela sona. Bope abaputi batakubalanjizya sona umuchizi, abasongosongo babo batakubapelela sona ichisa.

¹⁷ Amaso ghitu ghakalita pakubulindilila ubwavwilizi bwako. Tukalindilililagha inko yiyo yitangatupoka.

¹⁸ Bakakonkezyanga inyayo zyitu ngati zyo mbwa, umwakuti tutakendagha na mumusebo bulo. Po amasiku ghitu ghakamala kale, sona bope ubumalilo bwitu bwafika.

¹⁹ Abakutuchimbizya bakaba bengo nkani, ukughachila amazwanga, Bakatuchimbizyanga mumaghamba, po bakatuvwamilila munkolongo.

²⁰ Bakamughogha ni chipingo umupakiwa uwa Mwene, yuyo muyi witu uwenecho uwa bumi bwitu. Po tukinong'onagha ukuti aswe twe tukwikala pakasi inko izinji, tukwiza pakwavwiliziwa.

²¹ Mwee bantu ba mu Edomu, mwe mukwikala muchisu icha Uzi, sekelagha sona hobokagha, Namwe bulo ulubako lunulu lukwiza pakubizilagha, po mukwiza pakukolwa nalo nukuvula amenda.

²² Mwee bantu aba mu Yelusalemu, ulufundo lwinyu lwamala, po ubuzya bwinyu te bwendelele. Loli amwe, mwe bantu aba mu Edomu akwiza pakubafunda, pachifukwa icha mbibi zyinyu sona nukunanga kwinyu.