Nkuto 3 - IBAYIBOLO 2024

Nizya lufundo nukupinduka, sona nu luhobokelo

¹ Ane ne muntu yuyo akomana na mayimba, nafundiwa ni ndisa iya bukali ubwa Chala.

² Anchimbizya nukunyendezya muchisi, mumo mute ulukozyo nalumolumo.

³ Naloli ankoma ni nyobe yache, akinjikinji bulo isiku lyosi.

⁴ Aghuvulazya umubili wane ghosi, sona aghapyolannya amafupa ghane.

⁵ Anzyunguliye nintamyo kosi na kosi sona ni vintu ivipalapala.

⁶ Anyikazya muchisi, ngati po ne yuyo akafwa kale.

⁷ Anyighaliye mulupaso umwakuti ntangachimbila, sona ampinya nkani nu bunyololo.

⁸ Napapo nkukolomoka ukuti anyavwe, loli atakwivwa ulwiputo lwane.

⁹ Ayizighila izila na mabwe, sona ayipela pakuba nyonganu.

¹⁰ Ngati mumo ulabwe pamo inkalamu yikuvwamilila,

¹¹ momumo akanyefyezya muzila, sona akanzepulannya nukundeka.

¹² Akawesa ubwele bwache nukulasa utulasilo kukwane.

¹³ Akaghulasa umoyo wane nu tulasilo tosi, tuto tukaba muchakubikilamo chache.

¹⁴ Nkaba ne chakusesya icha bantu bane bosi, sona bakimbagha inyimbo izyakunsamula isiku lyosi.

¹⁵ U Mwene ampiye intamyo impalapala, pakuba chakulya chane sona ni chakung'wela chane.

¹⁶ Ankula amino ghane na mabwe, sona ankanyankila pulufumbi.

¹⁷ Ane inte nu mutende naghumoghumo mumoyo wane, sona induvizye ukuti ubuhobosu cho choni.

¹⁸ Po nkuti, “Ubuchindamu bwane bwamala, sona na chitalipo nachimochimo chicho nkuchilindilila Mwene.”

¹⁹ Nkughakumbuka amayimba ghane nu kwendakwenda kwane kosi, sona ni vyakubaba vivyo nkang'wela nintamyo zyane.

²⁰ Nanti navikumbuka vyosi vinivi, nkutamiwa nkani mumoyo wane.

²¹ Loli chilipo chimo chicho nkuchikumbuka, chicho chikumpa nkani ulusubilo:

²² U Mwene atughanite nkani, cho chifukwa aswe tutakunanganika, sona ichisa chache chitakumalaghapo nalumo.

²³ Ichisa chache chikubanga chipya pandabindabi posi, sona we musubiliwa umwakufikapo.

²⁴ Ane nkanena nemwene nkati, “U Mwene weyuyo nkumulonda, po nkwiza pakumusubila.”

²⁵ U Mwene mwiza ku bantu babo bamusubiye, sona bosi babo bakubomba ubwighane bwache.

²⁶ Pakuti chiza pakubanga bulo myee, pakubulindilila ubupoki ubwa Mwene.

²⁷ Chiza nkani ukuti umuntu anyamulaye ikoli, bo achili mulumendo.

²⁸ Muleke ikalaye bulo myee, pakuti we Mwene yuyo akumunyamulizya ikoli lilalila.

²⁹ Muleke alambalalaye pasi palufumbi, lumo angalwagha ulusubilo.

³⁰ Muleke amupanje ulusaya umuntu yuyo angamukoma, umwakuti akoziwanje isoni.

³¹ U Mwene atakubapapo lumo abantu bache inkonto.

³² Napapo angabisizya abantu intamyo, loli akubanga ni chililizi, pakuti ulughano lwache lulo lutakupotwangapo nalumolumo lukulu nkani.

³³ Pakuti chitakumuhobosya pakubisizya abantu amayimba pamo ukumuyivya umuntu wesi, awe.

³⁴ Pakubayivya abakayidi bosi muchisu,

³⁵ pakukana pakumubombela umuntu ubwanaloli pamaso agha Wakumwanya Nkani.

³⁶ Nanti mukubunyongannya ubwanaloli panongwa, nkimba u Mwene atakuzyennya zinizi?

³⁷ Nkimba wewenu angalamula ukuti ichi pamo chila chibombiwanje, nanti u Mwene atitikizizye?

³⁸ Pakuti ulusayo ni chighune, vyosi vikufuma mumulomo uwa Wakumwanya Nkani.

³⁹ Nkimba choni chicho umuntu ilumbusyanje, nanti akufundiwa pachifukwa icha mbibi zyache?

⁴⁰ Zagha tuyipimaye inkalo yitu, po twende tunyokelaye kwa Mwene.

⁴¹ Zagha twinusizye amoyo ghitu nukukwezya inyobe zyitu, kwa Chala kumwanya nukuti:

⁴² “Aswe twananga sona twasambuka, po utakatuhobokele, awe.

⁴³ “Awe watudwibizya nu bukali bwako, watuchimbizya nukutughogha umwakusita ichisa.

⁴⁴ Wivwinkite wemwene ni bingu, umwakuti inyiputo zitakafikaye kukwako.

⁴⁵ Watupela pakuba twe mintu, sona banyazu pakasi pa inko izinji.

⁴⁶ “Abalwani bitu bosi bighuye amalomo ghabo pakutobezya.

⁴⁷ Aswe tuli nubogha, sona twawila muchiliba, twananganika sona twazimila.

⁴⁸ Isoko izya masozi zikwenda bulo mumaso ghane, pachifukwa ichakuti abantu bane bananganika.

⁴⁹ “Amasozi ghatakukamukapo nalumo mumaso ghane, sona ntakwiza pakutuzya,

⁵⁰ mupaka papo u Mwene ennya pachisu ichapasi ukufuma kumwanya.

⁵¹ Zizyo nkuzyennya zikunyizila cho chitima mumoyo wane, pachifukwa icha bakolo bosi aba mukaya kane akakulu nkani.

⁵² “Abantu babo bakaba balwani bane, apasita ichifukwa, bakumbinga ngati po ne chiyuni.

⁵³ Bakansumbila muchiliba bo ne mumi, sona bakansumbagha na mabwe.

⁵⁴ Amizi ghakandwibizya mupaka kumutu, po nkinong'onagha ukuti indi papipi pakufwa.

⁵⁵ “Wee Mwene, nkakwitizya bo indi muchiliba ichibizu chila.

⁵⁶ Ukivwa ukulambilizya kwane bo nkuti, ‘Utakampanje inkonto, bo nkulaba ukuti unyavwe.’

⁵⁷ Bo nakwitizya ukapalamila, po ukambuzya ukati, ‘Utakanyilaye.’

⁵⁸ “Wee Mwene unyavwe panongwa yane, nukubupoka ubumi bwane.

⁵⁹ Wee Mwene, wavyennya ivibibi vivyo abantu bambombelagha, po undongelaye inongwa yane.

⁶⁰ Awe wabennya namumo bantanizizyanga, sona na vyosi vivyo babatikite pakumbombela.

⁶¹ “Wee Mwene, wawivwa umusamu wabo, sona na vyosi vivyo babatikite pakumbombela.

⁶² Awe ukivwa ukuteketa kosi ukwa balwani, sona namumo bakivwanilana pakumbombela ivibibi.

⁶³ Bennye posi papo bikaye sona posi papo bimiliye bakwimbagha inyimbo izyakunsamula.

⁶⁴ “Wee Mwene ubatanizyanje zizyo zibabaghiye, sona ukuyana na zizyo babomba ni nyobe zyabo.

⁶⁵ Ughavwinkaye amoyo ghabo ni chakuvwinka, sona ubaghunaye.

⁶⁶ Mubukali bwako ubachimbizyanje sona ubanyunkulaye pachisu ichapasi.”