Nkuto 2 - IBAYIBOLO 2024

U Mwene akumufunda u Yelusalemu

¹ U Mwene amuvwinka u Yelusalemu, ni bingu ilya bukali bwache. Abwefya ubuchindamu ubwa Izilayeli kumwanya nukubusumbila pachisu ichapasi. Atakayikumbuka nalumo Inyumba yache, pisiku lilyo akakalala.

² Umwakusita ichisa u Mwene atuzimizya utwaya tosi utwa Yakobo, mubukalale bwache aghamongolannya amalinga ghosi agha Yuda. Abukozya isoni nukubwisya pasi, ubumwene bwache, poka na balaghili bache bosi.

³ Mubukalale bwache azidumulannya impembe zyosi izya Izilayeli, sona aleka pakutwavwa pamaso pa balwani bache. Akwaka ngati ndimi izya moto pakasi pa Yakobo, ngati moto ghugho ghukulungulizya chosi chicho chili papipi nagho.

⁴ Awesa ubwele bwache ngati po mulwani, sona inyobe yache indilo yiyanizye kale. Ngati mulwani abaghogha bosi babo bakamuhobosya mumaso ghache. Abapungulila ubukali bwache ngati gho moto abakolo bosi aba mu Yelusalemu.

⁵ U Mwene aba ngati mulwani, po amumilite u Izilayeli. Azimongolannya inyumba zyache zyosi izya bumwene, sona aghanangannya amalinga ghache. Po abalizya inkuta ni chililo muchisu icha Yuda.

⁶ Ayimongolannya Inyumba yache pakuba ngati cho chisakasa icha mumughunda, sona abunangannya ubuzilo bwache ubwakukomanilako. U Mwene amupela u Yelusalemu pakughaluvya amasiku ghache agha lusekelo sona nu lusekelo ulwa Isiku Ilyakutuzya, mubukalale bwache akabasamula abamwene poka na baputi.

⁷ U Mwene achisulannya ichighemo chache, sona abukana ubuzilo bwache ubuzelu. Avibika munyobe izya balwani, ivibumba ivya nyumba zyache izya bumwene. Ichongo chikivwika mu Nyumba iya Mwene, nkaninkani pisiku ilya lusekelo.

⁸ U Mwene akadumula pakulunangannya ulupaso, lulo lukazyunguliye akaya akakulu nkani aka Yelusalemu. Akakapima nu lukusa, sona atakaleka pakukanangannya. Akapela inkuta mukaya mulamula po vyosi vikananganika.

⁹ Imilyango yache yadwiba pasi, sona zyope ni mpingwi zyache zyananganika. Abamwene bache poka na makambala ghache bali kubuzya pakasi pa inko izinji. Batakuzikonka nalumo indaghilo, bope abalaghuzi bache batakwennya nalumolumo ivisetuka ivya Mwene.

¹⁰ Abasongosongo bosi aba mu Yelusalemu bikaye bulo pasi myee, sona bikupulila ulufumbi pamitu yabo Bavwalite amasaka pachifukwa icha chitima, sona abakolo aba mu Yelusalemu bakotamizye imitu yabo pasi.

¹¹ Amaso ghane ghizuye pachifukwa icha kulila, sona mukasi muli ubwite. Ghope umoyo wane wavulala, pachifukwa ichakunanganika ukwa bantu bane. Pakuti abana na babonda bakuzililika mumisebo iya kaya akakulu nkani.

¹² Bakubalilila abanyina bakuti, “Nkimba ivibama nu vinyo vili ko kwiyi?” Bakuzililika bulo mumisebo iya kaya akakulu nkani ngati bantu babo bavulaye, bo ubumi bwabo bukumala panandipanandi munyobe izya banyina.

¹³ Wee Yelusalemu, nkimba ningakubuzya ichoni sona ningakufwanikizya ni choni? Wee Yelusalemu, nkimba ningakufwanikizya ni choni, umwakuti nkusangulusyanje? Inkonko yako nyibizu nkani ngati yo nyanja, po nkimba wewenu angakupozya?

¹⁴ Ivisetuka ivya balaghuzi binyu vikaba vyabumyasi, sona vitakaba ni mbombo nayimoyimo. Bakazivumbula imbibi zyako umwakuti ivintu vikwendelaye akiza. Amazyu aghabulaghuzi ghakaba ghabumyasi sona ghakabasovyanga bulo abantu.

¹⁵ Bosi babo bakudumusannya bakukuseka. Bakumobezya nukupukunnya imitu yabo pachifukwa icha zizyo zyamuwila u Yelusalemu. Bakuti, “Nkimba aka ko kaya akakulu nkani kako kakitiziwanga ukuti ko kasayiwa, kako kakabahobosyanga abantu pachisu chosi icha ichapasi?”

¹⁶ Abalwani bako bosi bakwasamiye umulomo, bakukobezya nukukumemenela amino, sona bakuti, “Twamumila. Isiku lilyo twalindililagha lyakwana, sona tuli nubumi ukuti tulyennyanje isiku linili.”

¹⁷ U Mwene abomba zizyo akabatika, sona akwanilisya amazyu ghache ghagho akanena kale. Po akunangannya umwakusita ichisa, abapela abalwani bako ukuti bakusekaye, abapiye abalwani bako amaka.

¹⁸ Amoyo agha bantu ghakumulilila u Mwene! Mwee bakolo aba mu Yelusalemu, leka amasozi ghinyu ghendaye pabusiku na pamusanya ngati zyo soko, Mutakatuzyanje, sona amasozi ghinyu ghatakalekaye, awe.

¹⁹ Nyamuka pabusiku nukulila, bo abalindilili bakwanda bulo imbombo yabo, sona mubuzye u Mwene vyosi ivya kusingo. Gholosezya inyobe zyinyu kwa Mwene pachifukwa icha bumi ubwa bana binyu babo bakufwa nizala mumisebo.

²⁰ Wee Mwene, ennya sona winong'onayepo zimo. “Nkimba wewenu umubombeyepo lumo bunubu? Fwandi abakolo balyanje abana babo, abana babo babasungagha bene? Nkimba abaputi na balaghuzi, baghogheliwanje Mubuzilo Ubuzelu ubwa Mwene?

²¹ “Abanandi na baghosi bulo bali lambalala palufumbi mumisebo, abalumendo poka na balindu baghoghiwa nupanga. Ukabaghogha pisiku lilyo ukakalala, sona utakabapelela ichisa pakubaghogha.

²² “Ukabitizya abalwani bane kunkuto zyosi ngati mumo ukubitizizya abantu kulusekelo. Pisiku lilyo u Mwene akakalala, atakabapo nayumoyumo uwakupona pamo uwakusyala mumi. Bosi babo nkabapakatapo nukubalela, abalwani bakabaghogha.”