Nkuto 1 - IBAYIBOLO 2024

Ichitima icha bantu aba mu Yelusalemu

¹ Mwee, akaya akakulu nkani aka Yelusalemu, kako kale kakizula na bantu ilelo kaba chisami. Ali ngati mukolo umufwilwe, yuyo kale akachindikiwanga muchisu ichapasi. Akaba we mwene umukolo uwa inko izinji zyosi, loli ilelo aba muzya.

² Pabusiku akulila nkani, sona amasozi ghatakumala mumasaya ghache. Atalipo nayumoyumo uwakumusangalusya pakasi pa baghaniwa bache bosi. Abamanyani bache bosi bamusambukiye, sona baba balwani bache.

³ Abantu aba mu Yuda basendiwa pakubuka kuchisu icha buzya, kuko bali mumayimba pachifukwa icha mbombo inkafu. Bakwikala pakasi pa inko izinji, sona batakutuzyapo nalumolumo. Bosi babo bakubachimbizya babalema nukubabika mumayimba nkani.

⁴ Imisebo iyakubukila ku Yelusalemu yikulila, pakuti atalipo nayumoyumo yuyo akubuka kulusekelo. Abalindu babo bakimbagha kulakula ilelo bali mumayimba, sona abaputi bache bakukoloma. Yope imilyango yache yaba visami, sona akaya akakulu nkani aka Yelusalemu kali muntamyo inkulu nkani.

⁵ Babo bamubengite bo babo bali pakumulaghila, sona abalwani bache ivintu vyabo vikubendela akiza. U Mwene amufunda u Yelusalemu pachifukwa icha mbibi zyache inyinji, sona abana bache balemiwa pakuba bazya aba balwani bache.

⁶ Ubuchindamu ubwa kaya akakulu nkani aka Yelusalemu bwepamo. Abalongozi bache baba ngati zyo mbabala, babo batakulyagha nalimolimo isote iteta, sona badedebaye nkani bo abalwani babo bakubachimbizya.

⁷ Pakabalilo aka mayimba nu kwendakwenda kwache, u Yelusalemu akubukumbuka ubukabi bwache bubo akaba nabo bo ivintu vikumwendela akiza. Bo abantu bache balemiwa na balwani, patakabapo nayumoyumo umuntu uwakumwavwa. Abalwani bache bakamwenelezya nukumobezya, pachifukwa icha kunangika kwache.

⁸ U Yelusalemu abomba imbibi, sona inyazya mwene. Bosi babo bakamuchindikagha, ilelo bakumusamula, pakuti bamwennya namumo abeleye nkule. Akukoloma nukuvwinka icheni chache.

⁹ Ubunyazu bwache bukakatiye pamenda ghache, pakuti atakinong'onelaghako nizya lufundo lwache. Ukunanganika kwache kukaba kwakoghofya nkani, umwakuti patakabapo uwakumusangalusya. “Wee Mwene, ennya amayimba ghane, pakuti abalwani bane bampota.”

¹⁰ Umulwani akamufyula ubukabi bwache bosi, sona akazyennya inko izinji zikwinjila mubuzilo bwache ubuzelu, bubo ukazikanizya ukuti batakinjilemo.

¹¹ Abantu bache bosi bakukoloma, bo bali pakulonda ivibama. Bakughulizannya ubukabi bwabo ni chikulya, umwakuti babanje nubumi. “Wee Mwene, unyennye ni chisa, pakuti nkusamuliwa nkani.”

¹² Nkimba chinichi chitakubaswighisya mwebosi mwe mukudumusannya bulo? Po talankannya mwennye nanti ghalipo amayimba aghanji, ghagho ghayanite na mayimba ghane, amayimba ghagho u Mwene akangwisizya pisiku lilyo akankalalila.

¹³ U Mwene akangwisizya umoto uwakumwanya, nukughusumbila mumafupa ghane. Akakuzula ichilepa pakundema po nkawa pasi, sona akandeka nemwene bo indi mububavu ubukulu nkani.

¹⁴ “Azipinyiliye imbibi zyane kwikoli, sona ni nyobe zyache akazipinyilila zyosi poka. Azipinyiliye musingo yane, u Mwene anyefya amaka, sona ambika munyobe izya bantu babo intangalwana nabo.

¹⁵ “U Mwene abakana abasilikali bosi abajivu, babo bali pakasi papane. Abitizya abasilikali pakulwa nane, umwakuti abaghogha abasilikali bane bosi abachilumendo. Muchiliba chache ichakufinyilamo amampesya, u Mwene akabakanyankila abantu aba mu Yuda.

¹⁶ “Ichi cho chifukwa nkulila sona amasozi ghatakukamuka mumaso ghane. Atalipo nayumoyumo uwakunsangalusya, sona nayumo umuntu uwakunkazya. Abana bane baba balanda, pachifukwa ichakuti abalwani bitu batupota.”

¹⁷ U Yelusalemu akugholosya inyobe yache, loli atalipo nayumoyumo umuntu uwakumusangalusya. U Mwene abitizya abalwani kunkuto zyosi, ukuti babavwanile abaluko ulwa Yakobo. Po u Yelusalemu aba chintu chinyazu pakasi papabo.

¹⁸ U Mwene mugholosu, loli intakaghakonka amalamulo ghache. Mwee bantu mwebosi, ivwa kuno, ennya namumo nkuyimbila. Abalumendo na balindu bane balemiwa pakuba bazya.

¹⁹ Nkabitizya abamanyani bane, loli bakansambukila. Abaputi na balongozi bane bosi bazimila mukaya akakulu nkani, bo bali pakulonda ichakulya, umwakuti babanje nubumi.

²⁰ Wee Mwene nkuyimba nkani mumoyo. Mukasi mumwane muli ubwite, sona navulala nkani mumoyo pakuti ne muntu wakusambuka. Mope mumisebo abantu baghoghiwa na bapanga, sona ubufwe bwene buli mo munyumba yane.

²¹ “Abantu bivwa ukukoloma kwane, loli atalipo nayumoyumo uwakunsangalusya. Abalwani bane bosi bazyivwa intamyo zyane, sona bakusekela pazizyo wabomba. Isiku lilyo ukalifumusya ulikwanilisyanje, umwakuti bope babanje ngati mumo imbeleye.

²² “Leka ububibi bwabo bosi bubonekele pamaso papako, ubabombele ukuyana namumo ukambombela, pachifukwa icha mbibi zyane zyosi. Ane nkukoloma nkani, sona indi ni chitima nkani mumoyo wane.”