Nehemiya 9 - IBAYIBOLO 2024

Aba Izilayeli bakwilata imbibi zyabo

¹ Pisiku ilya 24 ilya mwezi ghulaghula, aba Izilayeli bakabungana poka. Bakatuzya pakulya nukuvwala amasaka sona bakinyafila ulufumbi pamitu yabo pachifukwa icha chitima.

² Aba Izilayeli bakipaghula pakasi pa bayeni, po bakilata imbibi zyabo sona nukunanga ukwa banyenya babo.

³ Abantu bakimilila papo bakaba, po ama awala matatu bakateghelezyanga bo Ibuku ilya Ndaghilo izya Mwene likubelengiwa. Ama awala aghanji matatu abantu bala bakilatagha imbimbi zyabo nukumwiputa u Mwene u Chala wabo.

⁴ Aba Levi bakimilila pamakwelelo. Palapala pakabapo u Yeshuwa nu Bani nu Kadimiyeli nu Shebaniya nu Buni nu Shelebiya nu Bani sona nu Kenani. Bosi banaba bakamwiputagha u Mwene u Chala wabo umwakukolomoka nkani.

⁵ Po Aba Levi kokuti u Yeshuwa nu Kadimiyeli nu Bani nu Hashabineya nu Shelebiya nu Hodiya nu Shebaniya sona nu Petahiya bakati, “Imilila, mumupalaye u Mwene u Chala winyu, yuyo aliko bwila na bwila. “Lipaliwanje itabwa lyako lyabuchindamu, lilyo abantu batangalikwezya nukulichindika umwakufikapo.

⁶ Awe we Mwene mpela. Ukapela kumwanya sona na kumwanya nkani ni ntondwa zyosi ni chisu ichapasi poka na vyosi vivyo vili mulamula ni nyanja poka na vyosi vivyo vili mulamula. Awe ukavipa ubumi ivintu vyosi, sona vyosi ivya kumwanya vikukwiputa.

⁷ “Awe we Mwene u Chala wewe ukamusala u Abulamu nukumwefyamo muchisu icha Uli mu Babiloni nukumwita ukuti we Abulahamu.

⁸ U Abulahamu akaba muntu umusubiliwa pamaso papako, umwakuti ukafingana nawe pakubapa abaluko lwache ichisu icha ba Kenani nicha ba Hiti nicha ba Amoli nicha ba Pelezi nicha ba Yebusi sona nicha ba Giligashi. Awe ukabomba zizyo ukabalayizya pachifukwa ichakuti we mugholosu.

⁹ “Ukaghennya amayimba ghagho abanyenya bitu bakakomana nagho mu Ijiputi sona ukivwa ukulila kwabo pa Nyanja Inchesamu pala.

¹⁰ Ukabomba ivyika ni viswigho pamaso pa Falabo na makambala ghache ghosi sona na bantu bosi aba muchisu chila, pachifukwa ichakuti ukabennya namumo bakabayivizizyanga aba Ijiputi. Ichi cho chifukwa imbili yako yichili yilipo mupaka nilelo bulo.

¹¹ Ukagaba inyanja pamaso papabo ukuti badumusannye pachisu ichumizu, loli ukabibizya munyanja abalwani babo bakabachimbizyanga, umwakuti bakadwiba pasi ngati libwe mumizi aghamaka nkani.

¹² Pamusanya ukabalongozyanga ni bingu, sona pabusiku ukabalongozyanga ni mpanda iya moto umwakuti ubalamilaye muzila yiyo bakendaghamo.

¹³ “Ukika pighamba ilya Sinayi sona ukanenagha nabo bo uli kumwanya. Ukabapa indaghilo ingolosu na malamulo aghakufikapo, sona ni vimanyisyo ivyiza.

¹⁴ Ukabamanyisyanga pakusungilila Isiku izelu Ilyakutuzya sona ukabapa amalamulo, ni vimanyisyo, sona ni ndaghilo ukwendela mu mubombi wako u Mozesi.

¹⁵ Bo bali nizala ukubapa ichibama icha kumwanya sona bo bali ni nyota ukubapa amizi aghakufuma kwibwe. Ukababuzya ukuti babukaye pakuchifyula ichisu chicho ukabalayizya na maka ghako amakulu ukuti ukwiza pakubapa.”

¹⁶ “Loli abanyenya bitu bakitutumula nukuba na moyo amakafu, po batakaghakonkagha amalamulo ghako.

¹⁷ Batakivwila sona bakaluvya ivyika vivyo ukabomba pakasi papabo. Bakaba na moyo amakafu nkani sona bakasambuka pakusala abalongozi ukuti banyokele kubukayidi mu Ijiputi. Loli awe we Chala, we waluhobokelo, we wachisa, sona we wachililizi, utakukalala lubilolubilo, sona we walughano nkani. Po utakabakana,

¹⁸ napapo bakipangila bene ichifwani icha ngwata nukuti, ‘Uyu we chala winyu, yuyo akabefyamo mu Ijiputi! Bakakusamula pakubomba ichintu ichibibi nkani.’

¹⁹ “Pachifukwa icha chisa chako ichikulu nkani utakabaleka bene munkolongo mula. Pamusanya ibingu litakalekapo nalumo pakubalongozya, sona pabusiku impanda iya moto yikabalamilagha pakubalanjizya izila.

²⁰ Ukabapanga Umuzimu wako umwiza pakubamanyisya, po utakalekapo nalumo pakubapa umana ukuti balyanje sona ukubapanga amizi aghakung'wela.

²¹ Ukabasungililagha akiza nkani munkolongo amaka 40, sona batakasobelwapo ichintu nachimochimo. Amenda ghabo ghatakazepunkana, sona inyayo zyabo zitakizula.

²² “Ukabapa amaka aghakupotela abamwene, ninko izinji sona ni vyisu ivipalamani. Bakachifyula ichisu icha mwene u Sihoni uwamu Heshiboni sona ni icha mwene u Ogi uwamu Bashani.

²³ Ukabapa abaluko abinji nkani ngati mumo zibeleye intondwa nukubinjizya muchisu chicho ukabalayizya abanyenya babo ukuti chikwiza pakuba chabo.

²⁴ Abaluko lwabo bakinjila muchisu chila nukwikala mulamula. Ukabapota aba Kenani pamaso papabo, babo bakikalagha mulamula. Ukababika aba Kenani poka na bamwene babo, ninko zizyo zikikalagha mulamula munyobe zyabo ukuti bazibombelaye chosi chicho bakalondagha.

²⁵ Bakatufyula utwaya utukulu nkani utwa malinga ni chisu chabo icha mboto, ni nyumba zyabo inyizule ni vintu ivyiza ivyakulekanalekana ni viziba ivikumbe na maghunda ghabo agha mampesya na makwi agha misyunguti sona na makwi agha seke. Bakalyanga nukwikuta, sona bakina nkani. Bakilaghagha nkani ivintu vyosi ivyiza vivyo ukabapanga.

²⁶ “Pope bulo batakivwilagha sona bakakusambukila nukuzisulannya indaghilo zyako. Bakabaghogha abalaghuzi bako, babo bakabasokagha ukuti banyokele kukwako. Bakakusamula pakubomba ichintu ichibibi nkani.

²⁷ Po ukababika munyobe izya balwani, babo bakabayivya nkani. Loli bo bayimba nkani, bakakulilila. Po kumwanya uko ukabivwa sona pachifukwa icha chisa chako ukabatumila abantu pakubapoka munyobe izya balwani babo.

²⁸ “Loli bo bali mumutende bakanda sona pakubomba ivintu ivibibi pamaso papako. Ukababika munyobe izya balwani babo, umwakuti babalaghilaye. Bo bakulilila sona, ukabivwa kumwanya uko po ukabapokagha akabalilo na kabalilo pachifukwa icha chililizi chako.

²⁹ “Ukabasoka ukuti bande sona pakuzikonka indaghilo zyako, loli bakitutumula nukughasulannya amalamulo ghako. Bakavikana ivimanyisyo vyako, vivyo vikumupa umuntu ubumi nanti akuvikonka. Pachifukwa icha moyo ghabo amakafu, bakakupa inkonto, sona bakakana pakukwivwila.

³⁰ Awe ukabafisila ilyoyo amaka aminji nkani. Ukababuzya abalaghuzi bako ukwendela mu Muzimu wako ukuti babasokaye. Pope bulo abantu bako bakaba na mapuli, po ukababika munyobe izya bantu aba inko izinji.

³¹ Loli pachifukwa icha chisa chako ichikulu utakabazimizya abantu bako pamo ukubaleka, pakuti we Chala uwachisa sona uwachililizi.

³² “Polelo wee Chala witu, we wamaka nkani sona nu wakoghofya, wewe ukusunga ulufingo lwako ulwa lughano, utakitikizyanje ukuti amayimba ghitu ghanagha ghabonekaye mapepe kukwako. Amayimba ghatuwila aswe na bamwene bitu na balongozi bitu na baputi bitu na balaghuzi bitu na banyenya bitu sona na bantu bako bosi ukwandila pakabalilo aka bamwene aba mu Asiliya mupaka nilelo bulo.

³³ Awe wame we mugholosu bulo, napapo ivintu vyosi ivibibi vinivi vyatuwilagha. Awe wame we musubiliwa, loli aswe tukananga.

³⁴ Abamwene bitu na balongozi bitu na baputi bitu sona na banyenya bitu batakazikonkagha indaghilo zyako. Bakaghasulannya amalamulo ghako napapo ukabasokagha.

³⁵ Napapo bakilaghilagha bene nukwilagha ivintu ivyiza muchisu ichikulu ni chamboto chicho ukabapa, pope bulo batakakubombela pamo ukuleka imbombo zyabo imbibi.

³⁶ “Ennya, ilelo aswe twe bazya muchisu chicho ukabapa abanyenya bitu umwakuti balyanje ivikomwa vyache sona ni vyiza vyosi vivyo vili mulamula.

³⁷ Pachifukwa icha mbibi zyitu, ivyakulya ivyinji ivya muchisu chilachila vikupeghiwa ku bamwene babo bakutulaghila. Bakughalaghila amabili ghitu sona ni ng'ombe zyitu ukuyana namumo bakulondela. Naloli aswe tuli muntamyo inkulu nkani.

Abantu basimbilana ulwivwano

³⁸ “Pachifukwa icha vyosi vinivi aswe tukufinga ulufingo ulusimbe. Po abalongozi bitu naba Levi bitu sona na baputi bitu bakudindapo ichidindo chabo.”