Nehemiya 8 - IBAYIBOLO 2024

¹ Abantu bosi bakabungana poka nu moyo ghoka palubinjilo kuntazi ukwa Mulyango uwa Mizi. Palapala u Ezila akamubuzya umusimbi ukuti ize ni Buku ilya Ndaghilo izya Mozesi zizyo u Mwene akabapa aba Izilayeli.

² Pisiku ilyakwanda ilya mwezi waseveni umuputi u Ezila akiza ni Buku ilya Ndaghilo pamaso pa chilundilo, papo pakaba abanavuli na bakolo sona na bantu bosi babo bangivwisya.

³ Akabelenga Ibuku ilya Ndaghilo lila umwakwivwika nkani pamaso pa banavuli na bakolo, na bantu abanji babo bangivwisya, babo bakabungana palubinjilo kuntazi ukwa Mulyango uwa Mizi ukwanda pandabindabi mupaka pamusanya. Abantu bosi bakateghelezyanga nkani bo Ibuku ilya Ndaghilo likubelengiwa.

⁴ Umusimbi u Ezila akimilila pachighemo ichitali icha matabwa chicho abantu bakazenga ukuti chibombaye imbombo pakabalilo kalakala. Kunyobe yache indilo kukimilila u Matitiya nu Shema nu Anaya nu Uliya nu Hilikiya sona nu Maseya. Kunyobe yache iyamongo kukimilila u Pedaya nu Misheyeli nu Malikiya nu Hashumu nu Hashabadana nu Zekaliya sona nu Meshulamu.

⁵ U Ezila akighula Ibuku ilya Ndaghilo lila. Abantu bosi bakamwennyanga, pachifukwa ichakuti akimilila pamwanya. Bo akwighula Ibuku lila, abantu bosi bakimilila.

⁶ U Ezila akamupala u Mwene u Chala umukulu, po abantu bosi bakakwezya inyobe zyabo mumwanya nukwamula ukuti, “Ameni! Ameni!” Bakafughama nukumwiputa u Mwene bo ivyeni vyabo vikotamiye pasi.

⁷ Po Aba Levi kokuti u Yeshuwa nu Bani nu Shelebiya nu Yamini nu Akubu nu Shabetayi nu Hodiya nu Maseya nu Kelita nu Azaliya nu Yozabadi nu Hanani sona nu Pelaya bakabavwa abantu bala pakubalingannya Indaghilo zila, bo abantu bimiliye.

⁸ Bakabelenga Ibuku ilya Ndaghilo izya Chala nukubalingannya abantu iching'anamulo chache, umwakuti abantu bala bivwisye akiza vivyo vikabelengiwa.

⁹ Po umulaghili uwa chisu u Nehemiya nu muputi u Ezila, yuyo akaba sona umusimbi, naba Levi babo bakalingannyanga abantu bakati, “Isiku ili lipaghuliwa kwa Mwene u Chala winyu. Mutakalilaye.” Pakuti abantu bosi bakalilagha, bo bakuteghelezya ukubelengiwa ukwa Ndaghilo zila.

¹⁰ U Nehemiya akati, “Bukagha pakusekela kunyumba zyinyu. Mugabanaye na bantu babo bate ni chakulya pamo uvinyo uwakukwana. Isiku ili lipaghuliwa kwa Mwene. Po mutakabanje ni chitima, pakuti Mwene weyuyo akubapa amaka aghakuti muhobokaye.”

¹¹ Aba Levi bakabapumizya abantu bala bakati, “Puma, pakuti ili lisiku lipaghuliwa. Mutakabanje ni chitima, awe.”

¹² Po abantu bosi bakabwela pakulya nukung'wela, sona bakagabana na bantu abanji ivintu vivyo bakaba navyo, pachifukwa ichakuti bakivwisya vivyo vikabelengiwa.

¹³ Pisiku ilyabubili ilya mwezi ghulaghula, abalongozi abanyumba, poka na baputi, sona naba Levi bakabuka kwa musimbi u Ezila pakumanyila ivimanyisyo ivya Ndaghilo.

¹⁴ Mu Ndaghilo mula bakaghamo zizyo u Mwene akamulamula u Mozesi ukuti aba Izilayeli bikalaye muvisakasa pakabalilo aka lusekelo mumwezi uwaseveni,

¹⁵ bafumusyanje amazyu ghanagha mutwaya twabo tosi na mu Yelusalemu ukuti, “Bukagha kuchisu icha maghamba pakudumula isamba izya misyunguti, nizya ntumbusya nizya mabale sona nizya makwi ghagho ghavwinkite ukuti muzenge ivisakasa ukuyana namumo zisimbiliwe mu Ndaghilo.”

¹⁶ Po abantu bakabuka pakudumula isamba nukuzengela ivisakasa palubinjilo ulwa nyumba zyabo ni ntanda zyabo sona nu lubinjilo ulwa Nyumba iya Chala sona nu lubinjilo ulwa pa Mulyango uwa Mizi sona napa Mulyango uwa Efulayimu.

¹⁷ Ichilundilo chosi icha bantu babo bakanyokako kubuzya bakazenga ivisakasa nukwikala mulamula. Ukwanda pakabalilo aka Yoshwa umwana uwa Nuni mupaka pisiku lilalila, aba Izilayeli batakabapo nu lusekelo ngati lunulu. Po bakahoboka nkani.

¹⁸ Isiku ni siku, ukwanda pisiku ilyakwanda mupaka ilyabumalilo, u Ezila akabelengagha Ibuku ilya Ndaghilo izya Chala. Bakaba nu lusekelo amasiku seveni, po pisiku ilya eyiti bakaba nulukomano ukuyana nu lulaghilo lwache.