Nehemiya 6 - IBAYIBOLO 2024

Abalwani bakumubombela ichibibi u Nehemiya

¹ Bo Sanibalati nu Tobiya nu Geshemu umu Alabu sona na balwani bitu abanji bosi, bivwa ukuti nazenga sona ulupaso nukwighalila mosi mumo mukamongonkana, napapo nkaba inchili intabikiye inyiyi pamilyango,

² u Sanibalati nu Geshemu bakantumila amazyu aghakuti, “Zagha tukomane mukaya kamo mwikombe ilya Ono.” Loli bakalondagha pakumbombela chimo ichintu ichibibi.

³ Po nkatuma intumi pakubabuzya ukuti, “Ane indi pakubomba imbombo inkulu nkani sona ntangabukako. Ane intangalekelezya imbombo ukuti nize pakukomana namwe?”

⁴ Bakantumila amazyu ghalaghala ka folo, po ane nkabamula ngati mumo nkabamulila pakwanda.

⁵ Po aka fayivi u Sanibalati akantumila intumi iyinji nu kalata, loli ukalata yula akaba mwighule,

⁶ yuyo akasimbiwa ukuti, “Pali ipangwi pakasi pabantu babo te ba Yuda sona u Geshemu ansimikizya ukuti awe poka naba Yuda mukulonda pakusambuka. Ichi cho chifukwa muli pakuzenga sona ulupaso. Ukuyana ni pangwi ili chikulanjizya ukuti awe ukulonda pakuba we mwene wabo.

⁷ Awe wabimika abalaghuzi ukuti bafumusyanje mu Yelusalemu nizya awe ukuti, ‘Ichisu icha Yuda chili nu mwene!’ U mwene akwiza pakwivwa ipangwi ili, po zagha tunenezannye.”

⁸ Nkamwamula nkati, “Pazyosi zizyo ukunena nachimochimo chicho chibombiwepo. Zyosi zinizi izya mumutu wako.”

⁹ Abantu banaba bakalondagha bulo ukuti batoghofye nukwinong'ona ukuti, “Aba Yuda bakwiza pakutetema sona bakwiza pakuleka pakubomba imbombo, po batakwiza pakuyimalizya.” Loli nkiputa nkati, “Wee Chala, losi ulu mpanga amaka.”

¹⁰ Isiku limo nkabuka kunyumba iya Shemaya, umwana uwa Delaya, umwizukulu uwa Mehetabeli, yuyo bakamwighalila munyumba yache. Po akati, “Twende tukomane mu Nyumba iya Chala nukwighalila inyiyi, pachifukwa ichakuti abantu bakwiza pakukughogha. Naloli bakwiza pabusiku pakukughogha.”

¹¹ Loli nkamula nkati, “Nkimba ane ne muntu uwakuti ningachimbila? Nkimba ane ne muntu uwakuti ningavwama mu Nyumba iya Chala, ukuti impone? Awe intakubukako!”

¹² Po nkazyaghannya ukuti atakaba we Chala yuyo akamutuma, loli akalaghula umwakususannya nane pachifukwa ichakuti u Tobiya nu Sanibalati bo babo bakamubeka.

¹³ Bakamubeka ukuti anyoghofye umwakuti inange nanti nabomba bunubu, umwakuti banangannye imbili yane.

¹⁴ Po nkiputa nkati, “Wee Chala wane, utakaluvyanje zizyo ukamubombela u Tobiya nu Sanibalati. Utakaluvyanje sona zizyo ukamubombela umulaghuzi umukolo u Nowadiya sona na balaghuzi abanji bosi, babo bakalondagha pakunyoghofya.”

Ulupaso lwamala pakuzengiwa

¹⁵ Pakachilapo amasiku 52, po pisiku ilya 25 ilya mwezi uwa Eluli, ulupaso lula lukamala pakuzengiwa.

¹⁶ Bo abalwani bitu bosi, sona ninko impalamani bivwa zinizi, bakanyila nkani, sona amaka ghakabawila, pachifukwa ichakuti bakazyaghannya ukuti u Chala akaba weyuyo akatwavwa pakubomba imbombo yiniyi.

¹⁷ Pakabalilo kosi kalakala, abalongozi aba mu Yuda bakasimbilanagha abakalata nu Tobiya.

¹⁸ Pakuti aba Yuda abinji bakalapa ukuti bakwiza pakumwivwila, pachifukwa ichakuti akaba mukwalima uwa Shekaniya, umwana uwa Ala. Po umwana wache u Yehohanani akamusenda umwana uwa Meshulamu, umwizukulu uwa Belekiya.

¹⁹ Ukonjelezyapo, abantu bakambuzyanga imbombo inyiza izya Tobiya sona bope bakamubuzyanga zizyo nanena. Po u Tobiya akantumila abakalata ukuti anyoghofye.