Nehemiya 5 - IBAYIBOLO 2024

U Nehemiya akubavwa abapina

¹ Pakabalilo kalakala abanavuli poka na bachi babo bakanda pakwilumbusya nkani pachifukwa icha ba Yuda abamwabo.

² Abanji bakatinji, “Aswe poka na bana bitu abalumendo na balindu twabala nkani, umwakuti tukulonda ingano ukuti tulyanje nukuba nubumi.”

³ Po abanji sona bakatinji, “Aswe tukubika amaghunda ghitu nagha mampesya sona ni nyumba zyitu pakuba chikole, umwakuti tuyaghe ingano pakabalilo aka zala aka.”

⁴ Abanji sona bakatinji, “Aswe twakopa indalama ukuti tusonke umusonko kwa mwene pachifukwa icha maghunda ghitu na maghunda ghitu agha mampesya.

⁵ Napapo aswe twe banamuntu sona napapo abana bitu bayanite bulo na bana babo, pope bulo tukubafyenga abana bitu abalumendo na balindu pakuba bazya. Abana bitu abalindu abanji balemiwa kale pakuba bazya, aswe tute na maka, pachifukwa ichakuti amaghunda ghitu sona na maghunda agha mampesya ghali munyobe izya bantu abanji.”

⁶ Bo nivwa amilumbusyo ghabo nkakalala nkani.

⁷ Nkadumula ukuti imbombepo zimo, umwakuti nkabachemela abalongozi na makambala nkati, “Amwe mukubakanyilila aba Yuda abamwinyu pakubanyosezya indalama izyakukabilapo pandalama zizyo bakakopa!” Po nkitizya ulukomano ulukulu nkani ukuti imazye intamyo yiniyi.

⁸ Nkababuzya nkati, “Aswe twabatabula aba Yuda abawamwitu, babo bakaghuliziwa ku bantu babo te ba Yuda. Polelo mukubafyenga bulo abawamwinyu ukuti bighulizye kukwinyu.” Po abantu bala bakaba bulo myee, pakuti batakaba ni chakunena nachimochimo.

⁹ Po nkababuzya sona nkati, “Ivintu vivyo mukubomba te vyiza, awe. Nkimba mutangamunyila u Chala umwakuti abalwani bitu babo te ba Yuda batakatusamulaye?

¹⁰ Nane bulo na bawamwitu sona na bambombo bane tukubakopezya abantu indalama ni ngano. Po muleke pakubanyosezya indalama izyakukabilapo pandalama zizyo bakopa.

¹¹ Losi ulu mubanyosekezye amaghunda ghabo, na maghunda ghabo agha mampesya na maghunda agha misyunguti ni nyumba zyabo sona ni ndalama izyakukabilapo ni ngano nu vinyo sona na mafuta agha misyunguti vivyo bakopa.”

¹² Po bakamula bakati, “Eee tukwiza pakubanyosezya sona tutakwiza pakupokelapo nalumo ichintu chimo.” Panapo nkabitizya abalongozi na makambala nukubalapizya pamaso pa baputi ukuti bakwiza pakubomba zizyo bakalayizyanga.

¹³ Nkakung'unta inkazo yane sona nkati, “Umwakuyana bulo u Chala amukung'untaye umuntu wesi yuyo atakusunga ilayizyo lyache. Amufyulaye inyumba yache, poka nu katundu wache wesi yuyo ali nawe nukumuleka nyobe zyene.” Ichilundilo chosi chila chikamula chikati, “Ameni!” Bakamupala u Mwene. Po abantu bala bakabomba zizyo bakalayizyanga.

Ukusita ukwiyighana ukwa Nehemiya

¹⁴ Mumwaka uwa 12 mupaka mumwaka uwa 32 bo u mwene u Alitakiselesesi akulaghila, nkasaliwa pakuba ne mulaghili uwa muchisu icha Yuda. Po ane pamo abakamu bane tutakasendapo indalama zizyo zikaba zyakughulila ichakulya icha mulaghili uwa chisu.

¹⁵ Loli abalaghili babo nkabapyana bakabanyamulizyanga abantu ukatundu umung'wamu nkani sona bakabafyenga abantu pakubika isalabazya 40 izya siliva pamwanya pa chakulya nu vinyo. Bope abambombo babo bakabanyamulizyanga abantu ukatundu umung'wamu, loli ane intakazibombapo nalumo, pachifukwa ichakuti nkamunyilagha u Chala.

¹⁶ Loli nkiyula nkani pambombo iyakuzenga ulupaso ulu sona intakalondagha pakukaba amaghunda. Abantu bane bosi bakabungana palapala pakubomba imbombo.

¹⁷ Ukonjelezyapo, nkalyanga poka pitebulo lyane naba Yuda 150 na makambala, poka na bayeni aba muvyisu ivipalamani.

¹⁸ Ivyakulya vivyo bakanjanizizyanga pisiku lyoka vikaba vyo ivi: Ing'ombe yoka ni ng'ozi inyine sikisi sona ni nkuku inyinji nkani nu vinyo umwinji nkani mumasiku teni ghosi. Loli pope bulo intakasendapo indalama zizyo zikaba zyakughulila ichakulya icha mulaghili, pachifukwa ichakuti ukatundu uyu akaba mung'wamu nkani pabantu.

¹⁹ Wee Chala wane, unsaye pachifukwa icha vintu vyosi vivyo nababombela abantu banaba.