Nehemiya 3 - IBAYIBOLO 2024

Bakuzenga sona ulupaso ulwa Yelusalemu

¹ Po umuputi usongo u Eliyashibu, poka na baputi abamwabo bakazenga sona Umulyango uwa Ng'ozi. Akaghupaghula nukubikapo inyiyi sona bakazenga mupaka pachitembe icha 100 nukufika pachitembe icha Hananeli.

² Abantu aba mu Yeliko bakazenga sona ichigaba choka sona pakakonkapo u Zakuli umwana uwa Imuli, wepe akazenga sona ichigaba choka.

³ Pakakonkapo abana aba Hasena, bope bakazenga sona Umulyango uwaswi nukubikapo intatikilo zyache ni nyiyi ni vyakupinyila ivya chela sona ni mpingwi zyache.

⁴ Pakakonkapo u Melemoti umwana uwa Uliya, umwizukulu uwa Hakozi, wepe akazenga sona ichigaba choka. Pakakonkapo u Meshulamu umwana uwa Belekiya, umwizukulu uwa Meshezabeli, wepe akazenga sona ichigaba choka. Pakakonkapo u Zadoki umwana uwa Baana, wepe akazenga sona ichagaba choka.

⁵ Pakakonkapo abantu aba mu Tekowa, bope bakazenga sona ichigaba choka. Loli abalongozi babo bakakana pakubomba imbombo yiyo abakapitawa babo bakabapa.

⁶ Pakakonkapo u Yoyada, umwana uwa Paseya nu Meshulamu umwana uwa Besodeya, bope bakazenga sona Umulyango uwa Yeshana nukubika intaliko ni nyiyi ni vyakupinyila ivya chela sona ni mpingwi zyache.

⁷ Pakakonkapo abantu aba mu Gibeyoni naba mu Mizipa, kokuti u Melatiya umu Gibeyoni nu Yadoni uwamu Melono, bope bakazenga sona ichigaba choka mupaka pa nyumba iya mulaghili uwa chigaba icha kwisila ilya lusoko ulwa Yufuleti.

⁸ Pakakonkapo u Uziyeli umwana uwa Halihaya, umusyana golide, wepe akazenga sona ichigaba choka. Pakakonkapo u Hananiya, yuyo akengagha amafuta aghakununkila, wepe akazenga sona ichigaba choka. Bakazenga sona akaya akakulu nkani aka Yelusalemu mupaka pa Lubumba Ulukulu.

⁹ Pakakonkapo u Lefaya umwana uwa Huli, umulaghili uwa chigaba chimo icha mu Yelusalemu, wepe akazenga sona ichigaba choka.

¹⁰ Pakakonkapo u Yedaya, umwana uwa Halumafi, wepe akazenga sona ichigaba ichakwenannya ni nyumba yache. Pakakonkapo u Hatushi umwana uwa Hashabineya, wepe akazenga sona ichigaba choka.

¹¹ Pakakonkapo u Malikiya, umwana uwa Halimu nu Hashubi umwana uwa Pahati Mowabu, bope bakazenga sona ichigaba choka, ni chitembe icha Mivuno.

¹² Pakakonkapo u Shalumu umwana uwa Haloheshi, umulaghili uwa chigaba chimo icha mu Yelusalemu, wepe poka na bana bache abalindu, bakazenga sona ichigaba choka.

¹³ Pakakonkapo u Hanuni poka na bantu aba mu Zanowa, bope bakazenga sona Umulyango uwa Kwikombe nukubikapo inyiyi, ni vyakupinyila ivya chela sona ni mpingwi zyache. Bakazenga sona ulupaso amamita 400 mupaka pa Mulyango uwa Sakwi.

¹⁴ Pakakonkapo u Malikiya umwana uwa Lekabu, umulaghili uwa chigaba icha Beti Hakelemu, wepe akazenga sona Umulyango uwa Sakwi nukubikapo inyiyi ni vyakupinyila ivya chela sona ni mpingwi zyache.

¹⁵ Pakakonkapo u Shalumu umwana uwa Kolihoze, umulaghili uwa Mizipa, wepe akazenga sona Umulyango uwa Mbwibwi. Akaghuzengela ichisonje nukubikapo inyiyi ni vyakupinyila ivya chela sona ni mpingwi zyache. Akazenga sona ulupaso ulwa Chiziba icha Silowamu papipi nu mughunda uwa mwene, mupaka pamakwelelo aghakwikila kukaya akakulu nkani aka Devedi.

¹⁶ Pakakonkapo u Nehemiya umwana uwa Azibuki, umulaghili uwa chigaba chimo icha Beti Zuli, wepe akazenga sona ichigaba ichakwenannya na mapumpa agha Devedi, mupaka pachiziba ichakukumba sona na panyumba iya basilikali.

¹⁷ Pakakonkapo aba Levi umwakulongoziwa nu Lehumu umwana uwa Bani, bope bakazenga sona ichigaba choka. Pakakonkapo u Hashabiya, umulaghili uwa chigaba chimo icha Keyila, wepe akazenga sona ichigaba choka.

¹⁸ Pakakonkapo abakamu bache umwakulongoziwa nu Binuyi umwana uwa Henadadi, umulaghili uwa muchigaba chimo icha Keyila.

¹⁹ Pakakonkapo u Ezeli umwana uwa Yeshuwa, umulaghili uwamu Mizipa, wepe akazenga sona ichigaba ichakwenannya ni chikwezya ichakubukila kunyumba yakusungilako ivilwilo ivya bwite mupaka pankuto.

²⁰ Pakakonkapo u Baluki umwana uwa Zabayi, wepe akazenga sona ichigaba choka, ukwandila pankuto mupaka pamulyango uwa nyumba iya muputi usongo u Eliyashibu.

²¹ Pakakonkapo u Melemoti umwana uwa Uliya, umwana uwa Hakozi, wepe akazenga sona ichigaba choka, ukwandila pamulyango ulwa nyumba iya Eliyashibu mupaka kubumalilo.

²² Pakakonkapo abaputi, babo bakazenga sona ichigaba ichipalamani.

²³ Pakakonkapo u Benjamini nu Hashubi, bope bakazenga sona ichigaba ichakwenannya ni nyumba zyabo. Pakakonkapo u Azaliya umwana uwa Maseya, umwana uwa Ananiya, wepe akazenga sona ichigaba icha papipi ni nyumba yache.

²⁴ Pakakonkapo u Binuyi umwana uwa Henadadi, wepe akazenga sona ichigaba choka, ukwandila panyumba iya Azaliya mupaka pankuto.

²⁵ Pakakonkapo u Palali umwana uwa Uzayi, wepe akazenga sona ichigaba ichakwenannya ni nkuto sona ni chitembe icha panyumba yamumwanya iya mwene papipi ni nyumba iya balindilili. Pakakonkapo u Pedaya, umwana uwa Paloshi,

²⁶ sona na babombi aba mu Nyumba iya Chala, babo bakikalagha pighamba iya Ofeli, bope bakazenga sona ichigaba ichakwenannya nu Mulyango uwa Mizi kubufumilo bwizuba, sona ni chitembe ichitali chila.

²⁷ Pakakonkapo abantu aba mu Tekowa, bope bakazenga sona ichigaba ichakwenannya ni chitembe ichitali icha Nyumba iya Chala mupaka papipi nu Ofeli.

²⁸ Abaputi bakazenga sona ichigaba choka, ukwandila pa Mulyango uwa Falasi, umuntu wesi akazenga sona kuntazi ukwa nyumba yache.

²⁹ Pakakonkapo u Zadoki u mwana uwa Imeli, wepe akazenga sona ichigaba ichakwenannya ni nyumba yache. Pakakonkapo u Shemaya umwana uwa Shekaniya, yuyo akaba mulindilili uwa pa Mulyango uwakubufumilo bwizuba.

³⁰ Pakakonkapo u Hananiya umwana uwa Shelemiya nu Hanuni umwana wasikisi uwa Zalafu. Pakakonkapo u Meshulamu umwana uwa Belekiya, wepe akazenga sona ichigaba ichakwenannya ni nyumba yache.

³¹ Pakakonkapo u Malikiya umusyana golide, wepe akazenga sona ichigaba choka mupaka kunyumba iya babombi aba mu Nyumba iya Chala, niya baghulizi, iyakwenannya nu mulyango uwa balindilili, mupaka pachipinda ichapamwanya icha pankuto.

³² Pakakonkapo abasyani aba golide sona baghulizi, bope bakazenga sona ichigaba ichabumalilo, ukwandila pachipinda ichapamwanya icha pankuto mupaka pa Mulyango uwa Ng'ozi.