Nehemiya 2 - IBAYIBOLO 2024

U Yelemiya akubuka ku Yelusalemu

¹ Mumwezi uwa Nisani, mumwaka uwa 20 bo u mwene u Alitakiselesesi akulaghila sona bo ali pakulya, nkamupa uvinyo u mwene. Loli ntakasulumannyapo nalumo pamaso papache.

² Po u mwene akandalusya akati, “Nkimba choni chicho usulumanizye. Awe utabinite, loli kokuti chilipo ichintu chimo chicho utahobokite nacho?” Po nkanyilagha nkani.

³ Loli nkamwamula u mwene nkati, “Wee mwene, nkukulondela ubumi ubutali. Nkimba choni chicho ntangasulumannya, bo akaya akakulu nkani mumo muli amapumpa agha banyenya bane kaba chisami sona imilyango yache yochiwe?”

⁴ U mwene akandalusya akati, “Nkimba ukulonda pakundaba ichoni?” Nkiputa kwa Chala uwakumwanya,

⁵ po nkamwamula nkati, “Wee mwene wane, nanti chingakuhobosya, sona nanti ungampelela ichisa ne mubombi wako, unyitikizye ukuti imbukaye kukaya akakulu nkani mu Yuda, kuko kuli amapumpa agha banyenya bane umwakuti nkazenge sona akaya akakulu nkani kala.”

⁶ Palapala u mwene yula, bo umuchi wache ikaye palubazu, akandalusya akati, “Nkimba ukwiza pakumalako amasiku malinga, sona ukwiza pakunyokako liyi?” Nkamubuzya akabalilo kache akenecho, po akanyitikizya ukuti imbukaye.

⁷ Nkamubuzya u mwene nkati, “Wee mwene, nanti chingakuhobosya ubasimbile ukalata abalaghili aba kwisila ilya lusoko ulwa Yufuleti, ukuti banyitikizye pakudumusannya muchigaba chabo mupaka infike ku Yuda.

⁸ Umpe sona ukalata uyunji ukuti imupe u Asafu, ukapitawa uwakwenelezya umusitu uwa mwene, ukuti ampe amatabwa aghakupangila intaliko izya milyango iya kaya akakulu nkani, kako kali papipi ni Nyumba iya Chala, na matabwa agha lupaso, sona ni nyumba yane yiyo nkwiza pakwikalamo.” Pachifukwa ichakuti u Chala akampelela ichisa, u mwene akampa vivyo nkamulaba.

⁹ Po nkabuka ku balaghili aba kwisila ilya lusoko ulwa Yufuleti nukubapa abakalata babo u mwene akampa. U mwene akabatuma abasongo aba basilikali, sona na bantu abakukwela pafalasi ukuti bansindikile.

¹⁰ Loli bo u Sanibalati uwamu Holoni nu Tobiya umu Amoni bivwa zinizi, batakahoboka pakwennya ukuti umuntu yumo izite pakubabombela aba Izilayeli ivintu ivyiza.

¹¹ Bo nafika mu Yelusalemu nkikala kulakula amasiku matatu.

¹² Intakamubuzyapo nayumoyumo umuntu zizyo u Chala akabika munyining'ono zyane izyakuti nkabombele akaya akakulu nkani aka Yelusalemu. Po nkanyamuka pabusiku poka na bantu bamo. Tutakaba ni chitekwa nachimochimo, loli yene impunda yiyo nkakwelaghapo bulo.

¹³ Nkafuma kuzi pabusiku napa Mulyango uwa Kwikombe nukubuka ku Chiziba icha Nyivwila, sona nu Mulyango uwa Sakwi pakwendela ulupaso ulwa Yelusalemu, lulo lukamongonkana, poka ni milyango yache yiyo yikochiwa.

¹⁴ Pisinda pache nkafika pa Mulyango uwa Mbwibwi sona napa Chiziba icha Mwene, loli patakabapo ubuzilo ubwakukwana ubwakuti impunda yane yidumusannyepo.

¹⁵ Po nkenda pabusiku ukudumusannya mwikombe ukuti nennye namumo ulupaso lubeleye. Pabumalilo nkanyokela nukwinjila sona pa Mulyango uwa Kwikombe.

¹⁶ Amakambala ghatakamanya kuko nkabuka, pamo zizyo nkabombagha pakuti ntakababuzyapo nachimochimo aba Yuda pamo abaputi pamo abantu abamanyikwe pamo amakambala pamo abantu bosi nizya mbombo yiyo umuntu wesi angabomba.

¹⁷ Po nkababuzya nkati, “Amwe mukuzyennya intamyo zizyo tukukomana nazyo. Akaya akakulu nkani aka Yelusalemu kaba chisami sona imilyango yache yochiwa. Zagha tuzenge sona ulupaso ulwa kaya akakulu nkani aka Yelusalemu, po tutangakoziwa sona isoni.”

¹⁸ Nkababuzya sona namumo u Chala akampelela ichisa sona na zizyo u mwene akambuzyanga. Po bakamula bakati, “Zagha twande pakuzenga sona.” Po bakanda pakubomba imbombo inyiza iyi.

¹⁹ Loli bo u Sanibalati uwamu Holoni nu Tobiya umu Amoni, sona nu Geshemu umu Alabu bivwa zinizi, bakatuseka nukutobezya ukuti, “Nkimba mukubomba ichoni? Nkimba mumusambukiye u mwene?”

²⁰ Nkabamula nkati, “U Chala uwakumwanya akwiza pakutwavwa ukuti ivintu vitwendelaye akiza. Aswe twe babombi bache tukwiza pakwanda imbombo iyakuzenga sona. Loli amwe mute ni chigaba, pamo ubulaghili, pamo imbili nayimoyimo mu Yelusalemu muno.”