Nehemiya 13 - IBAYIBOLO 2024

U Nehemiya akuyannya ivintu akabumalilo

¹ Pisiku lilalila Indaghilo izya Mozesi zikabelengiwa umwakwivwika nkani, bo abantu bakuteghelezya sona bakagha papo pakasimbiwa ukuti patakaghiwepo nayumoyumo umu Amoni pamo umu Mowabu pakasi pabantu aba Chala,

² pachifukwa ichakuti batakabapa aba Izilayeli ichakulya na mizi, bo bakwepamo mu Ijiputi. Loli bakamulipila u Balamu indalama ukuti abaghune aba Izilayeli. Pope bulo u Chala witu akachandula ichighune chila pakuba lusayo.

³ Bo aba Izilayeli bivwa ululaghilo ulu, bakabefya abayeni bosi babo bakaba pakasi papabo.

Zizyo u Nehemiya andula

⁴ Bo zinizi zichili pakubombiwa, umuputi u Eliyashibu akaba weyuyo akenelezyanga ivipinda ivyakusungilamo ivintu mu Nyumba iya Chala. Po akabombagha poka nu Tobiya,

⁵ umwakuti akamwitikizya pakubombezya ichipinda ichikulu, chicho bakasungilaghamo ivyakwiyipa ivya busu nu twakufukizya utwakununkila ni vibombelo ivya mu Nyumba iya Chala sona ni chigaba choka pavigaba teni ivya ngano nu vinyo umupya na mafuta agha misyunguti ukuti vibanje vya ba Levi na bimbi na balindilili aba pamulyango sona na baputi.

⁶ Loli pakabalilo kalakala, ane ntakaba mu Yelusalemu, pachifukwa ichakuti mumwaka uwa 32 bo u mwene u Alitakiselesesi uwamu Babiloni akulaghila, ane nkabuka pakukomana nawe. Bo pachilapo akabalilo nkamulaba ukuti anyitikizye

⁷ pakunyokela ku Yelusalemu. Kulakula nkazyaghannya ukuti u Eliyashibu akabombagha ichintu ichibibi nkani pakumwitikizizya u Tobiya ukuti abombezye ichipinda muntanda iya Nyumba iya Chala.

⁸ Nkakalala nkani, umwakuti nkamusumbila kuzi ukatundu wesi uwa Tobiya yuyo akaba muchipinda chila.

⁹ Nkalamula ukuti baviswefye ivipinda vila, po nkavinyosezya ivibombelo ivya mu Nyumba iya Chala poka ni vyakwiyipa ivya busu sona nu twakufukizya utwakununkila.

¹⁰ Po nkagha sona ukuti aba Levi batakapokelagha ivigaba vyabo, vivyo babaghiye pakupokela sona nukuti aba Levi na bimbi bosi, babo babaghiye pakulongozya abantu pachiputo, bakanyokela kumaghunda ghabo pakubomba imbombo.

¹¹ Nkaghachemela amakambala nukughalalusya ukuti, “Nkimba choni chicho mwayisulannya Inyumba iya Chala?” Po nkabitizya poka abantu bosi nukubabika mubuzilo bwabo.

¹² Po abantu bosi aba mu Yuda bakanda sona pakusangula ichigaba choka pavigaba teni ivya ngano nu vinyo umupya sona na mafuta agha misyunguti nukwiza navyo kuvipinda ivyakusungilamo ivintu.

¹³ Nkamusala umuputi u Shelemiya nu musimbi u Zadoki sona nu Pedaya umu Levi ukuti babanje bakapitawa aba vipinda ivyakusungilamo ivintu. Nkamusala sona u Hanani umwana uwa Zakuli, umwizukulu uwa Mataniya pakuba mwavwilizi wabo pachifukwa ichakuti abanavuli banaba bakaba basubiliwa nkani. Po bakapeghiwa imbombo iyakubagabila abakamu babo ivyakulya.

¹⁴ Wee Chala wane, unkumbukaye pazyosi zinizi sona utakaluvyanje imbombo zyane inyiza, zizyo nabomba pa Nyumba iya Chala wane pakukubombela mubusubiliwa.

¹⁵ Mumasiku ghalaghala, nkabennya abantu aba Yuda bali pakukanyankila amampesya Pisiku Ilyakutuzya. Bamo bakizagha na malezi pampunda zyabo nu vinyo na mampesya na makuyu sona nu katundu uwakulekanalekana. Bakizagha navyo vyosi vinivi ku Yelusalemu Pisiku Ilyakutuzya. Po nkabasoka ukuti batakaghulizyanje ivyakulya pisiku lilalila.

¹⁶ Abantu aba mu Tile, babo bakikalagha mu Yelusalemu bakizagha mu Yelusalemu pakughulizya iswi nu katundu uwakulekanalekana Pisiku Ilyakutuzya nukubaghulizizya abantu aba mu Yuda.

¹⁷ Po nkabachemela abalongozi aba ba Yuda nkati, “Nkimba mutakuzyaghannya ukuti mukubomba ichintu ichibibi nkani pakulinyazya Isiku Ilyakutuzya?

¹⁸ Umu momumo abanyenya binyu bakabombelagha, po u Chala witu akatuwisizya aswe sona nakaya akakulu nkani aka intamyo zyosi zinizi? Polelo mukulonda pakunyamusya ubukali ubwa Chala paba Izilayeli pakulinyazya Isiku Ilyakutuzya.”

¹⁹ Po nkabalamula abalindilili aba pamulyango ukuti bighalilaye imilyango mupaka papo Isiku Ilyakutuzya lyamala. Nkababika abantu bane bamo pamulyango umwakuti abantu batakizaye nu katundu nayumoyumo pisiku Ilyakutuzya.

²⁰ Po abantu abakughula nukughulizya ukatundu wabo uwalekanalekana, bakaghonagha kuzi ukwa kaya akakulu nkani aka Yelusalemu.

²¹ Loli nkabasoka pakubalalusya ukuti, “Nkimba choni chicho mukughona papipi nulubumba? Nanti mukubomba sona bunubu, nkwiza pakubapinya.” Po ukwanda pakabalilo kalakala abantu bala batakiza sona Pisiku Ilyakutuzya.

²² Po nkabalamula aba Levi ukuti biswefye nukubuka pakulindilila pamulyango, umwakuti Isiku Ilyakutuzya libanje lizelu. Wee Chala wane, unkumbukaye sona unsungaye nu lughano lwako ulukulu nkani.

²³ Mumasiku ghalaghala, nkabennya abanavuli aba mu Yuda babo bakasenda abakolo aba mu Ashidodi naba mu Amoni sona naba mu Mowabu pakuba bachi babo.

²⁴ Bamo abana babo bakanenagha ineno iya muchisu icha Ashidodi pamo ineno iya bantu aba inko izinji, batakamanyagha pakunena Ichihebeli.

²⁵ Nkabachemela nukubaghuna. Nkabakoma bamo abanavuli nukunyunkula isisi zyabo. Po nkabalapizya ichilapo pamaso pa Chala nukuti, “Mutakabitikizyanje abana binyu abalindu ukuti babanje balasagha babo, pamo ukubitikizya abana babo abalindu ukuti babanje balasagha binyu.

²⁶ Nkimba chitakaba chifukwa icha sendwa zinizi, chicho chikamupela u Solomoni ukuti anange? Patakabapo nayumoyumo umuntu uyunji pakasi pa inko izinji uwakuyana nawe. U Chala wache akamughana nkani sona akamwimika pakuba we mwene uwa ba Izilayeli bosi, loli pope bulo akananga pachifukwa icha bakolo abayeni.

²⁷ Po ilelo twivwanje ukuti namwe bulo mukubomba ivintu ivibibi vinivi, sona nukuti mutakuba mwe basubiliwa kwa Chala pakubasenda bakolo abayeni pakuba bachi binyu?”

²⁸ Weka umwana uwa Yoyada akaba, mwana uwa muputi usongo u Eliyashibu akaba mukwalima uwa Sanibalati uwamu Holoni. Po nkamwefyapo umwana wache pamaso papane.

²⁹ Wee Chala wane, utakaluvyanje namumo abantu bala bakanyazizya imbombo yako iya buputi sona nu lufingo lulo ukafingana naba Levi.

³⁰ Po nkubaswefya abaputi naba Levi ukubefya ivintu vyosi iviyeni sona nkamupa umuntu wesi imbombo iyakuti abombaye.

³¹ Nkalamula sona ukuti abantu babikaye pakabalilo kache inkwi ni vikomwa ivyakwanda pakutona. Wee Chala wane, ukumbukaye vyosi vinivi, sona umpelelaye ichisa.