Nehemiya 12 - IBAYIBOLO 2024

Abaputi naba Levi

¹ Abaputi, naba Levi babo bakanyokako kubukayidi poka nu Zelubabeli umwana uwa Sheyalitiyeli sona nu Yeshuwa bakaba bo aba: U Selaya nu Yelemiya nu Ezila

² nu Amaliya nu Maluka nu Hatushi

³ nu Shekaniya nu Lehumu nu Melemoti

⁴ nu Ido nu Ginetoni nu Abiya

⁵ nu Miyamini nu Mowadiya nu Biliga

⁶ nu Shemaya nu Yoyalibi nu Yedaya

⁷ nu Salu nu Amoki nu Hilikiya sona nu Yedaya. Banaba bakaba balongozi pakasi pa baputi na bamwabo pakabalilo ka Yeshuwa.

⁸ Aba Levi bakaba bo aba: U Yeshuwa nu Binuyi nu Kadimiyeli nu Shelebiya nu Yuda sona nu Mataniya poka na bamwabo babo bakalongozyanga inyimbo izyakupalizikizya.

⁹ U Bakibukiya nu Uni poka na bamwabo bakimililagha umwakwenannya nabo, bo bali pakubomba imbombo.

¹⁰ U Yeshuwa akapapa u Yoyakimu, u Yoyakimu akapapa Eliyashibu, u Eliyashibu akapapa u Yoyada,

¹¹ u Yoyada akapapa u Yonatani sona u Yonatani akapapa u Yaduwa.

¹² Pakabalilo aka Yoyakimu abalongozi abanyumba izya buputi bakaba bo aba: Munyumba iya Selaya mukabamo u Melaya, munyumba iya Yelemiya mukabamo u Hananiya,

¹³ munyumba iya Ezila mukabamo u Meshulamu, munyumba iya Amaliya, mukabamo u Yehohanani,

¹⁴ munyumba iya Maluka, mukabamo u Yonatani, munyumba iya Shebaniya mukabamo u Yosefu.

¹⁵ Munyumba iya Halimu mukabamo u Adina, munyumba iya Melayoti mukabamo u Helikayi.

¹⁶ Munyumba iya Ido mukabamo u Zekaliya, munyumba iya Ginetoni mukabamo u Meshulamu,

¹⁷ munyumba iya Abiya mukabamo u Zikili, munyumba iya Miniyamini nu Modiya mukabamo u Pilitayi.

¹⁸ Munyumba iya Biliga mukabamo u Shamuwa, munyumba iya Shemaya mukabamo u Yehonatani.

¹⁹ Munyumba iya Yoyalibi mukabamo u Matenayi. Munyumba iya Yedaya mukabamo u Uzi,

²⁰ munyumba iya Salu mukabamo u Kalayi, munyumba iya Amoki mukabamo u Ebeli.

²¹ Munyumba iya Hilikiya mukabamo u Hashabiya. Munyumba iya Yedaya mukabamo u Netaneli.

²² Abalongozi abanyumba izya ba Levi, babo bakabapo pakabalilo aka Eliyashibu nu Yoyada nu Yohanani nu Yaduwa poka na balongozi abanyumba izya buputi, bakasimbiwa pakabalilo aka Daliyasi uwamu Peleziya.

²³ Abalongozi abanyumba izya ba Levi mupaka pakabalilo aka Yohanani umwana uwa Eliyashibu, bakasimbiwa mwibuku ilya Mbili.

²⁴ Abalongozi aba Levi bakaba bo aba: U Hashabiya nu Shelebiya nu Yeshuwa umwana uwa Kadimiyeli poka na bamwabo, babo bakimilila umwakwenannya nabo, umwakuti bamupalaye nukumupalizya u Chala, umwakupokelana, ukuyana namumo akalamulila u Devedi umubombi uwa Chala.

²⁵ Abalindilili babo bakalindiligha pamulyango uwa vipinda ivyakusungilamo ivintu bakaba bo aba: U Mataniya nu Bakibukiya nu Obadiya nu Meshulamu nu Talimoni sona nu Akubu.

²⁶ Bakabombagha imbombo yabo pakabalilo aka Yoyakimu umwana uwa Yeshuwa, umwizukulu uwa Yozadaki sona na pakabalilo aka Nehemiya, umulaghili uwa chisu sona nu muputi u Ezila, yuyo akaba musimbi.

Ukupaghuliwa ukwa lupaso ulwa Yelusalemu

²⁷ Pakabalilo akakupaghulila ulupaso ulwa Yelusalemu, aba Levi bakitiziwa ukufuma kuko bakikalagha ukuti bize ku Yelusalemu kulusekelo ulwakupaghulila ulupaso pakwimba inyimbo izyakupalizikizya nukulizya amalimba ni vinanda sona na mapango.

²⁸ Abimbi bakitiziwa ukufuma muvigaba ivyakuzyungulila akaya akakulu nkani aka Yelusalemu, kokuti utwaya utwa ba Netofa

²⁹ nakaya aka Beti Giligali sona na muvigaba ivya Geba na mu Azimaveti, pakuti abimbi banaba bakizengela utwaya ukuzyungulila akaya akakulu nkani aka Yelusalemu.

³⁰ Bo abaputi naba Levi babomba inyiho izyakwiswefezya, bakabaswefya abantu, ni milyango sona nu lupaso lula.

³¹ Nkababungannya abalongozi aba Yuda pamwanya palupaso sona nkatusala utubukatila tubili utwa bimbi ukuti bimbaye inyimbo izyakupalizikizya. Akabukatila koka kakendagha pamwanya palupaso mupaka ku Mulyango uwa Chintuntululu.

³² Po u Hoshaya poka na balongozi bamo aba mu Yuda bakabakonkagha

³³ poka nu Azaliya nu Ezila nu Meshulamu

³⁴ nu Yuda nu Benjamini nu Shemaya nu Yelemiya

³⁵ poka na baputi bamo babo bakalizyanga amapati sona nu Zekaliya umwana uwa Yonatani, umwana uwa Shemaya, umwana uwa Mataniya, umwana uwa Mikaya, umwana uwa Zakuli, umwana uwa Asafu

³⁶ poka na bamwabo, kokuti u Shemaya nu Azaleli nu Milalayi nu Gilalayi nu Maayi nu Netaneli nu Yuda sona nu Hanani, babo bakaba ni vyakwimbila ukuyana namumo akalamulila u Devedi umubombi uwa Chala. Umusimbi u Ezila akaba weyuyo akabalongozyanga.

³⁷ Bakadumusannya pa Mulyango uwa Chiziba nukukwela pamakwelelo agha Kaya akakulu nkani aka Devedi, pachikwezya icha lupaso sona bakadumusannya panyumba iya Devedi mupaka kubufumilo bwizuba ku Mulyango uwa Mizi.

³⁸ Po akabukatila akabubili aka bimbi kako kakimbagha inyimbo izyakupalizikizya umwakwenannya nabo. Nkabakonka pamwanya palupaso lula poka na bantu bamo. Tukadumusannya ichitembe icha Mivuno mupaka ku Lubumba Ulukulu

³⁹ nukudumusannya pa Mulyango uwa Efulayimu nuwa Yeshana nu waswi ni chitembe icha Hananeli sona ni chitembe icha 100, mupaka ku Mulyango uwa Ng'ozi. Po bakimilila pa Mulyango uwa Balindilili.

⁴⁰ Utubukatila tubili utwa bimbi, tuto tukimbagha inyimbo izyakupalizikizya tukikala mubuzilo bwabo mu Nyumba iya Chala. Po nane bulo poka na makambala ghamo tukikala mubuzilo bwitu

⁴¹ nu muputi u Eliyakimu nu Maseya nu Miniyamini nu Mikaya nu Eliyonayi nu Zekaliya sona nu Hananiya, babo bakalizyanga amapati ghabo,

⁴² poka nu Maseya nu Shemaya nu Eleyazala nu Uzi nu Yehohanani nu Malikiya nu Elamu nu Ezeli. Utubukatila utwa bimbi utu tukalongoziwa nu Yezilahiya.

⁴³ Pisiku lilalila abantu bakabika ivyakwiyipa ivyinji nkani, pachifukwa ichakuti u Chala weyuyo akabapela ukuti bahobokaye. Abakolo na bana bope bakahoboka nkani, umwakuti ichongo icha kusekela ukwa bantu mu Yelusalemu chikivwikagha kubutali nkani.

Ichigaba icha baputi naba Levi

⁴⁴ Pakabalilo kalakala, abantu bamo bakasaliwa ukuti benelezyanje ivipinda ivyakusungilamo ivintu, vivyo abantu bakasangula ni seke izyakwanda pakutona sona ni chigaba choka pavigaba teni. Abantu bala bakiyipa ivintu vivyo vikalondiwanga nukwiza navyo muvipinda ivyakusungilamo ivintu ukuti vibanje vya baputi naba Levi ukuyana ni Ndaghilo, pakuti abantu aba mu Yuda bakahobokagha nkani na baputi sona naba Levi babo bakabombagha imbombo.

⁴⁵ Bakaba ni chiputo icha Chala wabo sona bakabombagha inyiho izyakwiswefezya. Po abimbi na balindilili aba pamulyango bope bakabomba bunubu, ukuyana namumo akalamulila u Devedi poka nu mwana wache u Solomoni.

⁴⁶ Ukwandila pakabalilo aka Devedi nu Asafu, pakabako abalongozi aba bimbi sona bakimbagha inyimbo izya mapalo ni zyakumupalizya u Chala.

⁴⁷ Po pakabalilo aka Zelubabeli naka Nehemiya, aba Izilayeli bosi bakasangulagha ivigaba vivyo vikalondiwanga isiku ni siku ukuti vibanje vya bimbi na balindilili aba pamulyango. Abantu bala bakabikagha palubazu ivigaba vimo ukuti vibanje vya ba Levi bamo, po bope aba Levi bakabikagha palubazu ivigaba vimo ukuti vibanje vya baluko ulwa Aloni.