Nehemiya 1 - IBAYIBOLO 2024

Ulwiputo ulwa Nehemiya

¹ Amazyu agha Nehemiya umwana uwa Hakaliya gho agha: Mumwezi uwa Kisilevi mumwaka uwa 20, bo indi mukaya akakulu nkani aka Susa,

² uwamwitu u Hanani akiza poka na bantu bamo aba mu Yuda. Po nkabalalusya nizya ba Yuda babo bakasyala bumi nukunyokako kubuzya sona nizya kaya akakulu nkani aka Yelusalemu.

³ Bakanyamula bakati, “Abantu babo bakasyala bumi nukunyokela ku chisu chabo bali muntamyo inkulu nkani sona bali pakusamuliwa nkani. Lope ulupaso ulwa kaya akakulu nkani aka Yelusalemu lwamongoliwa sona inyiyi zyache zyochiwa.”

⁴ Bo nivwa amazyu ghanagha, nkikala pasi nukulila. Naloli nkalila nukutuzya pakulya sona nkiputa kwa Chala uwakumwanya amasiku aminji nkani.

⁵ Po nkati, “Wee Mwene Chala uwakumwanya, we Chala umukulu nu wakoghofya, sona we ukusunga ulufingo. Ukubaghana abantu babo bakukughana nukughakonka amalamulo ghako.

⁶ Ivwa sona wennye namumo ne mubombi wako nkwiputila pamaso papako umusanya nu busiku ukubiputila ababombi bako aba Izilayeli. Nkwilata imbibi zizyo aswe twe ba Izilayeli poka nane sona na banyenya bane twakunangila.

⁷ Twakunangila nkani sona tutakaghakonka amalamulo ghako ni ndaghilo sona ni vimanyisyo vyako vivyo ukamupa umubombi wako u Mozesi.”

⁸ “Kumbuka amazyu ghagho ukamubuzya umubombi wako u Mozesi ukuti, ‘Nanti mutakuba mwe basubiliwa nkwiza pakubanyampannya pakasi pa inko izinji.

⁹ Loli nanti munganyokela kukwane nukughakonka amalamulo ghane, napapo abantu binyu babo bali kubuzya bangaba kubutali nkani, nkwiza pakubabungannya poka nukwiza nabo kubuzilo bubo nkabusala ukuti inchindikiliwanjemo.’

¹⁰ “Banaba bo babombi bako sona bantu bako, babo ukabatabula na maka ghako amakulu nkani.

¹¹ Wee Mwene ivwa ulwiputo lwane ne mubombi wako sona nulwa babombi bako, babo bakulichindika itabwa lyako. Itikizya ukuti ivintu vinyendelaye akiza ne mubombi wako pakumpelela ichisa pamaso pa mwene.” Pakabalilo kalakala nkaba ne wakumupa uvinyo u mwene.