Nahumu 3 - IBAYIBOLO 2024

Ichighune pa Ninive

¹ Chighune kukaya akakulu nkani kako kakukupula ibanda, kako kizuye nu bumyasi sona nivyakufyula umwakusita kumala!

² Ivwa ukulila ukwa ndisa nichongo ichavingelengele, umulinto uwa nyayo izya falasi nukulila ukwa vyela ivya ngolo izya bwite!

³ Abakukwela pafalasi bakuchimbila, abapanga bakumekuka sona impalala zikung'azimila! Imivimba yibunganite bulo yiyo yitakubelengiwa, abantu bakwipunula kumivimba.

⁴ Zyosi zinizi zyabombiwa pachifukwa icha bunyazu ubwa Ninive, umukolo umalaya yula. Akubadeba abantu nukuboneka akiza kwache ukwabuzimbuli, akuzideba inko nubwamalaya bwache pakubombezya ivipandwa vyache.

⁵ U Mwene Uwamaka Ghosi akuti, “Wee Ninive, nkwiza pakukusambukila. Nkwiza pakukuvula amenda ghako, nukuzilangizya inko inkule yako, po ukwiza pakuba nisoni pamaso pa inko.

⁶ Nkwiza pakukupulila ubunyazu, sona nkwiza pakukobezya, nukukupela pakuba chintu ichakusesya.

⁷ Bosi babo bakukwennya bakwiza pakukuchimbila nukuti, ‘Akaya akakulu nkani aka Ninive kaba chisami. Nkimba wewenu yuyo akwiza pakukalilila? Nkimba ningamwagha kwiyi uwakukusangalusya?’ ”

⁸ Nkimba we mwizapo ukukachila akaya aka Tebesi, kako kali mulubazu ulwa lusoko ulwa Nayilo, sona kako kazyunguliliwe na mizi? Ulusoko lukaba lupaso lwache, sona amizi ghakaba lubumba lwache.

⁹ Ichisu icha Etiyopiya ni icha Ijiputi vikaba maka ghache ghagho ghatakumala. Ichisu icha Puti nicha Libiya vikamwavwanga u Tebesi.

¹⁰ Pope bulo bakasendiwa nukubuka kubukayidi. Bakatukomezya pasi utwabonda po tukasata mosi mumisebo. Amayele ghakabombiwa ukuti bagabane amakambala ghache sona abantu bache bosi abapamwanya bakapinyiwa ni minyololo.

¹¹ Nawe bulo Ninive ukwiza pakukolwa, sona ukwiza pakubavwama abalwani bako.

¹² Amalinga ghako ghosi ghali ngati makwi agha makuyu, ghagho ghali ni vikomwa ivyakwanda pakutona. Bo ghayinganiziwa, ivikomwa vikuwila mumulomo uwa yuyo akuvilya.

¹³ Ennya abasilikali bako, bosi bali ngati bakolo! Imilyango iya chisu chako yibighukiye abalwani bako, sona umoto wazilungulizya impingwi zyabo.

¹⁴ Sembela zila amizi aghakukwana, ghagho ungabombezya bo abalwani bakuzyunguliye, bo bachili batakazyunguliye akaya kako. Ulikazye nkani ilinga lyako, sona kanya itope ilyakukomela injelwa, izyakuzengela amalinga ghako.

¹⁵ Kulakula umoto ghukwiza pakubalungulizya. Mukwiza pakughoghiwa kubwite, sona mukwiza pakuzimila ngati mumo umakanta akulyela ivibyalwa. Mupapanaye ngati we kanta sona mubalaye ngati mpazi!

¹⁶ Monjelezya abaghulizi binyu, mupaka baba binji nkani ukuzichila intondwa. Loli ilelo babuka nukubuluka ngati we kanta.

¹⁷ Abalindilili binyu bali ngati mpazi, amakambala ghinyu ghali ngati we kanta, babo bamamatiye kulubumba pisiku ikatazu. Loli bo izuba lyafuma bakubuluka, po atalipo nayumoyumo yuyo akumanya kuko babuka.

¹⁸ Wee mwene uwamu Asiliya, abadimi bako bapitiye, amakambala ghako ghalambalaye ghakutuzya. Abantu bako banyampanite pighamba, atalipo nayumoyumo uwakubabungannya.

¹⁹ Chitalipo nachimochimo ichakupozya ichilonda chako, sona ukuvulala kwako kutangapola. Wesi yuyo akwivwa nizya ipangwi lyako, akuhoboka nukukoma inkufi pachifukwa icha kuwa kwako. Nkimba alipo yumo umuntu yuyo aponite kubukali bwako ubusita kumala?