Nahumu 2 - IBAYIBOLO 2024

Ukuwa ukwa Ninive

¹ Mwee bantu aba mukaya aka Ninive, ababwite bakwiza pakulwa namwe. Lindilila amalinga ghinyu, sona mwenelezye umusebo. Muvwale ivilwilo ivya bwite, sona pinya abalamba binyu!

² U Mwene akwiza pakumunyosezya u Yakobo ubuchindamu bwache ngati bo buchindamu ubwa Izilayeli, napapo abalwani bamupela pakuba chisami, sona baghanangannya amampesya ghache.

³ Ingulu izya basilikali bache nchesamu, ababwite bavwalite ivichesamu. Ingolo zyabo zikung'azimila ngati ndimi izya moto, pisiku lilyo biyannya, abendezya ifalasi bakuchimbila, bo bimikite impalala zyabo mumwanya.

⁴ Ingolo izya bwite zikuchimbilachimbila mumisebo, zikuchimbila uku na uku ukwendela pakasi pamunalo. Zikulama ngati vikoka ivya moto, sona zikwaka lubilolubilo ngati kamesya.

⁵ Usongo uwa basilikali akubitizya abasilikali, loli bo bakwenda bakwipunula. Bakuchimbilila kwilinga ilya kaya akakulu nkani, pakuzenga ulubumba ulwa kwipokelamo.

⁶ Imilyango iya lusoko yighuka sona inyumba iya mwene yawa.

⁷ U mwene umukolo alemiwa ukubuka kubuzya, abambombo bache bakumulilila ngati nkunda, nukukoma pa vifuba vyabo pachifukwa icha chitima.

⁸ Akaya aka Ninive kali ngati chiziba, sona amizi ghache ghakukamuka. Bakukolomoka bakuti, “Imilila! Imilila!” Loli atalipo nayumo uwa kunyokela.

⁹ Fyula u siliva! Fyula u golide! Akaya akakulu nkani kizuye nubukabi bubo bwapamwanya.

¹⁰ Akaya aka Ninive kananganika, kaba chisami sona abantu bepamo, amoyo ghabo ghasunguluka, ivimpevu vyabo vyawa ubwazi, amabili ghabo ghakutetema, ivyeni vyosi vili nichitima.

¹¹ Nkimba yili ko kwiyi impako iya nkalamu, ubuzilo bubo zikalyesezyangako utwana twabo, kuko inkalamu inyanavuli ni nkolo zikabuka, sona utwana tutakunyila nachimochimo?

¹² Inkalamu yikatughoghela utwana twache inyama iyakukwana, nukuyinyongela inyama inkalamu inkolo, yikizuzya iviliba vyache nivya kughogha impako zyache zikizula ninyama.

¹³ U Mwene Uwamaka Ghosi akuti, “Ane imbasambukiye amwe. Nkwiza pakuzyocha numoto ingolo zyinyu izya bwite, sona abana binyu abalumendo bakwiza pakughoghiwa kubwite. Nkwiza pakubafyula vyosi vivyo mukabafyula abantu abanji muchisu ichapasi. Izyu ilya ntumi zyinyu litakwiza pakwivwika sona.”