Nahumu 1 - IBAYIBOLO 2024

¹ Agha gho mazyu aghabulaghuzi agha Mwene aghakunena nizya kaya aka Ninive. Ibuku ilya chisetuka icha Nahumu umu Elikoshi.

Ubukali ubwa Mwene pa Ninive

² U Mwene wabuzuba sona we Chala uwakutanizya. U Mwene akutanizya sona izuye nu bukali. U Mwene akubatanizya abalwani bache sona mukali pa balwani bache.

³ U Mwene atakukalala lubilolubilo, sona wamaka nkani. U Mwene atakwiza pakubaleka bulo ababomba mbibi. Akwenda mwakankungu, na mumpepo iyamaka, sona amabingu lufumbi ulwa kunyayo zyache.

⁴ Akuyichemela inyanja nukuyikamusya, sona akuzikamusya isoko zyosi. Ivimelwa ivya mu Bashani nivya mu Kalimeli vikufoka, bope ubwezya ubwa mu Lebanoni bukumila.

⁵ Amaghamba ghakuneng'ena pamaso papache, sona utumaghamba tukusunguluka. Ichisu chikutetema pamaso papache, ichisu chosi ichapasi sona na babo bakwikala mulamula.

⁶ Nkimba wewenu yuyo angimilila bo akalaye? Nkimba wewenu yuyo angajimba ubukali bwache ubwakoghofya? Ubukali bwache bukwaka ngati moto, sona ilyalabwe likulepunkana pamaso papache.

⁷ U Mwene mwiza, wakuponelamo mukabalilo akantamyo. Akubasungilila babo bamusubiye,

⁸ loli na mizi aghakwizula, akwiza pakumunangannya u Ninive, sona akwiza pakubachimbizizya abalwani bache muchisi.

⁹ Nkimba bubibi boni bubo mukubatika pakumubombela u Mwene? Akwiza pakubanangannya, batakwiza pakujimba sona pamaso papache.

¹⁰ Bakwiza pakochiwa mumoto ngati mivwa, sona ngati mapelele amumizu. Abaching'wela bakwiza pakochiwa mumoto.

¹¹ Mu Ninive mukufuma umuntu yumo, yuyo akubatika pakumusambukila u Mwene, nukubamanyisya abantu ububibi.

¹² U Mwene akubabuzya aba Izilayeli akuti, “Napapo aba Asiliya bangaba bamaka nkani sona binji, pope bulo bakwiza pakunanganika nukuzimila. Napapo nkabayivya nkani abantu bane, loli ntakwiza pakubayivya sona.

¹³ Ilelo nkwiza pakulipyola ikoli, lilyo lili pasingo zyinyu nukulyefyapo, sona nkwiza pakuyidumula iminyololo yinyu.”

¹⁴ U Mwene abika ilamulo, lilyo likunena nizya amwe mweba Ninive ilyakuti, “Mutakwiza pakuba nabaluko babo bakwiza pakumanyikwa nitabwa lyinyu. Nkwiza pakuvinangannya ivifwani ivyakubiza, vivyo vili munyumba izya bachala binyu. Nkwiza pakuliyannya ipumpa lyinyu, pakuti mutabaghiye pakuba nubumi.”

¹⁵ Ennya, kumaghamba kula, inyayo izya muntu yuyo akwiza na mazyu amiza, yuyo akulumbilila umutende! Mwee bantu aba mu Yuda, banga nu lusekelo lwinyu, nukukwanilisya ivilapo vyinyu. Abantu ababibi batakwiza pakulwa namwe sona ubwite bakwiza pakuzimila zila.