Mika 7 - IBAYIBOLO 2024

Ukunanga ukwa ba Izilayeli

¹ Mwee, chighune kukwane! Naba ngati muntu yuyo akubungannya ivikomwa muchisanya, sona ngati po nkusalala amampesya. Kute na mampesya aghakulya, pamo ukuba nikwilu ni vikomwa ivya makuyu ghamo.

² Abantu abakumwiputa u Chala bamalamo muchisu ichapasi, mutasyalamo nayumoyumo umuntu umusubiliwa. Abantu bosi bakuvwamilila pakukupula ibanda, umuntu wesi akumuvwima umukamu wache, ngati chinyamana chicho bakuchichimbizizya ku chilepa.

³ Inyobe zyabo zyosi zimenye nkani pakubomba ububibi, abalaghili bakulaba ivyabupi, abalongi bakwitika amabeko, abantu abamaka nkani bakunena ivintu ivibibi vivyo vyizuye mumoyo ghabo. Po bosi bakubatikila poka.

⁴ Umuntu umwiza nkani mumwabo ali ngati we ntolovu, umugholosu nkani ukuchilapo mumwabo ali ngati lupaso ulwa mivwa. Isiku ilyakufundiwa abalindilili bako lyafika lilyo u Chala akubendela. Ilelo kanaka ko kabalilo akakuvulungana.

⁵ Utakamusubilaye umupalamani wako, sona utakeghamilaye ku mumanyani wako. Napapo angaba muchi wako, uchebaye pakunena.

⁶ Pakuti umwana umulumendo akumusamula uwise, umulindu akumusambukila unyina, sona wepe umulasagha akumusambukila unyinavyala. Abalwani aba muntu wesi bo bamunyumba iyache ni yache.

⁷ Loli ane, nkwiza pakubikapo nkani umoyo wane pa Mwene wane. Nkumulindilila u Chala Umupoki wane, u Chala wane akwiza pakunyivwa.

U Mwene akwiza nu bupoki

⁸ We mulwani wane utakansekaye, awe! Napapo ingwiye, nkwiza pakunyamuka. Napapo nkwikala muchisi, u Mwene akwiza pakuba lukozyo lwane.

⁹ Pachifukwa ichakuti imunangiye u Mwene, nkwiza pakujimba kubukali bwache mupaka alonge inongwa yane nukuyidumula. Akwiza pakunyinjizya mulukozyo, po nkwiza pakubwennya ubugholosu bwache.

¹⁰ Po umulwani wane akwiza pakuchennya chinichi, sona isoni zikwiza pakumulema, akundalusya akuti, “Nkimba u Mwene u Chala wako ali ko kwiyi?” Amaso ghane ghakwiza pakwennya ukuwa kwache, nilelo bulo akwiza pakukanyankiliwa ngati matope agha mumisebo.

¹¹ Wee Yelusalemu, akabalilo akakuzengela amalinga ghako kakwiza pakufikila, isiku ilyakonjelezya impaka zyako likwiza pakufikila.

¹² Pisiku linilyo abantu bakwiza pakwiza kukwako, ukwandila ku Asiliya sona nutwaya utwa Ijiputi, nukwandila mu Ijiputi mupaka ku Yufuleti, ukwandila kunyanja mupaka kunyanja iyinji, sona ukwandila kwighamba mupaka kwighamba ilinji.

¹³ Ichisu chikwiza pakuba chisami, pachifukwa icha bantu babo bakwikalamo sona pachifukwa icha mbombo zyabo.

Ichililizi icha Mwene paba Izilayeli

¹⁴ Wee Mwene, badime abantu bako ni ndisa yako, umudimo uwampyana yako, ghugho ghukwikala wene mumusitu. Ghuleke ghulyanje apakudimilapo, ghuleke ghulyanje mu Bashani, na mu Giliyadi ngati mo mumasiku aghakale.

¹⁵ U Mwene akamula akati, “Ngati mo mumasiku ghagho mukepaghamo muchisu icha Ijiputi, nkwiza pakubalanjizya iviswigho vyane.”

¹⁶ Inko zikwiza pakwennya, nukukoziwa isoni, pachifukwa icha maka ghabo. Bakwiza pakubika inyobe zyabo pamalomo ghabo, sona amakutu ghabo ghakwiza pakuba na mapuli.

¹⁷ Bakwiza pakumyanta ulufumbi ngati njoka, ngati vipeliwa vivyo vikwavula pasi. Vikwiza pakwepa mumpako bo vikutetema, vikwiza pakunyokela kwa Mwene u Chala witu, sona vikwiza pakukunyila nkani.

¹⁸ Nkimba we Chala wenu yuyo ayanite nawe, yuyo akuhobokela imbibi sona nukunanga ukwa bantu abakusyalako pakuba mpyana yache? Utakukalala bwila na bwila, loli akuhoboka nkani pakubapelela ichisa.

¹⁹ Ukwiza pakuba ni chililizi naswe, sona ukwiza pakuzikanyilila imbibi zyitu, nukubusumbila pasi panyanja ububibi bwitu.

²⁰ Ukwiza pakuba musubiliwa kwa Yakobo, nukuba wachisa kwa Abulahamu, ngati mumo ukalapila ichilapo na banyenya bitu mumasiku aghakale.