Mika 6 - IBAYIBOLO 2024

U Mwene akubalonga aba Izilayeli

¹ Teghelezya ku zizyo u Mwene akunena: “Nyamuka, lingannya inongwa yako pamaso pamaghamba; leka utughamba twivwe zizyo ukulonda pakunena.

² Mwee maghamba, ivwa ubulongi ubwa Mwene, teghelezya, mwee lwalo ulwa bwila na bwila ulwa chisu chosi ichapasi. Pakuti u Mwene abapiye inongwa abantu bache; akubasusya aba Izilayeli.

³ “Mwee bantu bane, nkimba imbabombeye ichoni? Nkimba nabalitizya bulibuli? Munyamule.

⁴ Nkabefyamo muchisu icha Ijiputi, sona nkabatabula muchisu icha buzya. Nkabatumila u Mozesi nu Aloni, sona nu Miliyamu ukuti babalongozye.

⁵ Mwee bantu bane, kumbuka zizyo u Balaki u mwene uwamu Mowabu, akabatika pakubabombela sona namumo u Balamu umwana uwa Bewoli akamwamulila. Kumbuka ubulendo bwinyu ubwakufuma ku Shitimu ukubuka ku Giligali, ukuti mumanye namumo u Mwene akabapokela.”

⁶ Nkimba ningiza ni choni pamaso pa Mwene, nukumufughamilila u Chala uwakumwanya? Nkimba ningiza pamaso papache nivyakwiyipa ivyakocha ivya ngwata iya mwaka ghoka?

⁷ Nkimba u Mwene akwiza pakuhoboka na badubi amasabuzani, sona nisoko izya mafuta 10,000? Nkimba nkwiza pakwiyipa umwana wane ukatote pachifukwa icha mbibi zyane? Pamo ivikomwa ivya mubili wane pachifukwa icha kunanga ukwa mumuzimu wane?

⁸ Wee muntu, u Mwene akulanjizya kale chicho chiza. Nkimba u Mwene akulonda choni kukwako? Ukuti ubombaye ubwanaloli, ubanje we wachisa, sona wiyisyanje pamaso pa Chala wako.

⁹ Umulaghuzi akuti, “Teghelezya! Pakulinyila itabwa ilya Mwene gho mahala.” U Mwene akwitizya ku kaya akakulu nkani akuti, “Muyivwile indisa sona na yuyo akayisala.

¹⁰ Nkimba ningaluvya ubukabi bubo buli munyumba iya bantu ababibi, bubo batakabwaghila mubwanaloli, bakubombezya ivipimilo ivyabumyasi, chinichi cho chintu chicho inchibengite nkani?

¹¹ Nkimba ningamuhobokela umuntu yuyo akubombezya vipimilo ivyabumyasi, sona yuyo akubombezya inyambi izyabuzimbuli?

¹² Abantu bache abakabi bavyongo, abantu bache bamyasi, sona bakutamanta bulo.

¹³ Polelo, nanda pakukunangannya, pakukupela chisami pachifukwa icha mbibi zyako.

¹⁴ Ukwiza pakulya loli utakwiza pakwikuta, sona izala yikwiza pakukulema. Ukwiza pakubunganika, loli utakwiza pakusungapo nachimochimo, pachifukwa ichakuti vivyo wasunga, nkwiza pakuvinangannya pakabalilo aka bwite.

¹⁵ Ukwiza pakubyala loli utakwiza pakwinula. Ukwiza pakukanyankila imisyunguti, loli utakwiza pakubombezya wemwene amafuta ghanagha. Ukwiza pakukanyankila amampesya loli utakwiza pakung'wela uvinyo.

¹⁶ Pakuti mwayikonka inkalo iya Omuli ni mbombo nakikalile aka mbumba iya Ahabu sona nukuti mwazikonka inyiho zyabo. Polelo nkwiza pakubanangannya, abantu binyu bakwiza pakubatuka, mukwiza pakusamuliwa na bantu aba inko zyosi.”