Mika 5 - IBAYIBOLO 2024

¹ Mwee bantu aba mu Yelusalemu, babungannye abasilikali binyu! Pakuti abalwani batuzyunguliye nubwite. Bakulwa ubwite nu mulongozi uwa Izilayeli.

Ilayizyo ilya mulaghili uwakufuma mu Betelehemu

² U Mwene akuti, “Wee Betelehemu Efulati, napapo we munandi pakasi pa luko ulwa Yuda, mumwako mukwiza pakufumamo weka yuyo akwiza pakuba mulaghili uwa Izilayeli, ichifumo chache chakale, ichamasiku aghakale nkani.”

³ Polelo u Mwene akwiza pakubabika aba Izilayeli munyobe izya balwani, mupaka pakabalilo kako umukolo yuyo ali nulwanda asayiwe, sona abanji bosi abaluko lwache bakwiza pakunyokela nukwikala poka naba Izilayeli.

⁴ Akwiza pakwiyula nkani nukudima ivitekwa vyache na maka agha Mwene, sona nu buchindamu ubwa litabwa ilya Mwene u Chala wache. Sona bakwiza pakwikala umwakufwasa, po ubukulu bwache bukwiza pakufika kubumalilo ubwa chisu ichapasi.

⁵ Sona akwiza nu mutende. Akwiza pakutupoka kuba Asiliya bo bakwiza nu bwite muchisu chitu nukwinjila mumalinga ghitu, tukwiza pakutuma abadimi seveni, pamo abalaghili eyiti.

Ubupoki nu lufundo

⁶ Bakwiza pakuchimala ichisu icha Asiliya nupanga, sona ni chisu icha Nimulodi. Akwiza pakutupoka munyobe izya Asiliya, bo bakwiza muchisu chitu nukwenda mumpaka zyitu.

⁷ Abakusyalako aba Yakobo, bakwiza pakwikala pakasi pabantu abinji, ngati nganda iyakufuma kwa Mwene, ngati vula iyakusalasata pisote, bakwiza pakusubila u Chala, batakwiza pakumusubila umuntu.

⁸ Abakusyalako aba Yakobo bakwiza pakwikala pakasi pa inko, pakasi pabantu abinji nkani, ngati nkalamu yiyo yili pakasi pa vinyanama ivya mumusitu, ngati mwana uwa nkalamu yuyo ali pakasi pa mudimo uwa ng'ozi, yuyo akuzikanyankila nukuzizepulannya mutuvigaba, sona atalipo nayumoyumo uwakuzipoka.

⁹ Mukwiza pakubapota abalwani binyu, sona bosi babo bakubabenga bakwiza pakunanganika.

¹⁰ Loli u Mwene akababuzya aba Izilayeli akati, “Pisiku linilyo nkwiza pakuzighogha ifalasi zyinyu, nukuzinangannya ingolo zyinyu izya bwite.

¹¹ Nkwiza pakutunangannya utwaya twinyu utwa chisu chinyu, nukughamongolannya amalinga ghinyu ghosi.

¹² Nkwiza pakumazya ivipandwa vyinyu vyosi, sona amayele ghatakwiza pakubako.

¹³ Nkwiza pakuvinangannya ivifwani vyinyu, sona na mabwe ghinyu amazelu agha vikumbusyo pakasi papinyu. Po mutakwiza pakuvifughamilila sona, ivintu vivyo muvipangite ni nyobe zyinyu.

¹⁴ Nkwiza pakughanyunkula amakwi agha chifwani icha Ashela, nukutumongolannya utwaya twinyu utukulu nkani.

¹⁵ Mubukalale sona na mubukali bwane, nkwiza pakuzitanizya inko zyosi zizyo zitakanyivwila.”