Mika 4 - IBAYIBOLO 2024

U Mwene akulaghila mumutende pachisu chosi

¹ Mumasiku aghabumalilo, ighamba ilya Nyumba iya Mwene likwiza pakuba litali nkani pakasi pamaghamba ghosi. Likwiza pakuboneka pamwanya pamaghamba ghosi, sona inko zikwiza pakuchimbilila kulakula.

² Inko inyinji zikwiza pakunena ukuti, “Zagha, twende tukwele pighamba ilya Mwene, ku Nyumba iya Chala uwa Yakobo. Akwiza pakutumanyisya izila zyache, umwakuti twendaye mumo.” Pakuti ululaghilo lukwiza pakufumila ku Ziyoni, sona ivimanyisyo ivya Mwene vikwiza pakufumila mu Yelusalemu.

³ Akwiza pakulonga pakasi pa inko inyinji, pakasi pa inko izyamaka, izya papipi nizya kubutali bulo. Abantu bakwiza pakusyana abapanga babo pakuba majembe, sona impalala zyabo pakuba sengo. Inko zitakwiza pakulwa ubwite ninko izinji, pamo pakumanyila sona akalwile aka bwite.

⁴ Umuntu wesi akwiza pakwikala mukazundila aka mampesya ghache, sona na mukazundila aka makuyu ghache. Po atalipo nayumoyumo yuyo akwiza pakuboghofya, pakuti u Mwene Uwamaka Ghosi anena.

⁵ Inko zyosi zikumuchindika, nukumwivwila u chala wabo, loli aswe tukwiza pakumwiputa nukumwivwila u Mwene u Chala witu bwila na bwila.

Aba Izilayeli bakubwelako kubuzya

⁶ U Mwene akuti, “Pakabalilo kalakala nkwiza pakubabungannya abalemazu, nkwiza pakubabungannya abazya, sona na babo imbapeleye ichitima.

⁷ Abantu abalemazu nkwiza pakubapela pakuba bakusyalako, po babo bakaba bazya lubanje luko ulwa maka. U Mwene akwiza pakubalaghila Pighamba ilya Ziyoni, ukwandila pisiku lilalila mupaka bwila na bwila.

⁸ Ukunena nizya awe, wee chitembe icha mudimo, wee ilinga ilya Ziyoni, ubumwene ubwakale bukwiza pakunyokela kukwako, ubumwene bukwiza pakunyokela mu Yelusalemu.”

⁹ Nkimba choni chicho ukulila umwakukwezya amazyu? Nkimba ute nu mwene? Nkimba uwakukumanyisya amahala afuye, pakuti ububavu bwakulema ngati mukolo yuyo akupapa?

¹⁰ Mwee bantu aba mu Ziyoni, ghalaghata nukukoloma, ngati mukolo yuyo akupapa, losi ulu mwepaye mukaya aka, nukwikala munkolongo. Mukwiza pakubuka ku Babiloni, kulakula mukwiza pakupokiwa. U Mwene akwiza pakubatabula munyobe izya balwani binyu.

¹¹ Loli inko inyinji zyakubunganila ukuti zilwe namwe ubwite. Bakuti, “Muleke abanje munyazu, ghaleke amaso ghitu ghamulolotele u Ziyoni!”

¹² Loli batazimenye inyinong'ono izya Mwene, sona batakuzivwisya imbatiko zyache, izya yuyo akubabungannya ngati ngano iya kukomiwa.

¹³ U Mwene akuti, “Wee Ziyoni, nyamuka nukukoma, pakuti nkwiza pakukupa impembe izya chela. Nkwiza pakukupa inyayo izya chela icha mukuba, po ukwiza pakuzipyolannya inko inyinji mu tunanditunandi.” Ukwiza pakumupa u Mwene ubukabi bwabo bubo ukamufyula, sona ukwiza pakumupa ubukabi bwabo bosi u Mwene uwa chisu chosi ichapasi.