Mika 3 - IBAYIBOLO 2024

U Mika akubasusya abalongozi aba ba Izilayeli

¹ Po nkati, “Mwe balongozi aba Yakobo, mwe balaghili aba Izilayeli, teghelezya, nkimba te mwemwe mubaghiye pakubumanya ubwanaloli?

² Amwe mwe mububengite ubwiza nukubughana ububibi? Amwe mwe mukughakasa amabili agha bantu bane, sona mukwefyamo inyama mumafupa ghabo.

³ Amwe mwe mukulya inyama iya bantu bane, nukughakasa amabili ghabo, sona bakughapyolannya amafupa mutunanditunandi. Amwe mwe mukughapyolannya mutugabatugaba amafupa ghabo nukughadumulannya ukuti mughakazinge sona ukuti baghapiye musonta ngati yo nyama.”

⁴ Po bakwiza pakumulilila u Mwene, loli atakwiza pakubamula. Pakabalilo kalakala akwiza pakubapa inkonto, pachifukwa icha bubibi bubo babombite.

⁵ U Mwene akuti, “Abalaghuzi babo bakubasovya abantu bane, nanti yumo akubapa ichakulya, kokuti bakulumbilila ‘umutende.’ Nanti atakubomba bunubu, kokuti bakwiyannya pakulwa nawe ubwite.

⁶ Polelo ubusiku bukwiza pakubizila mutakwiza pakwennya ivisetuka, sona ichisi chabawila, mutakwennya ivyamuntazi. Izuba likwiza pakubinjilila abalaghuzi, sona umusanya ghukwiza pakubabela chisi.

⁷ Abakwennya ivyamuntazi bakwiza pakukoziwa isoni, bope abakulaghula bakwiza pakusamuliwa. Bakwiza pakuvwinka ivyeni vyabo, pachifukwa ichakuti u Chala atakubamula.”

⁸ Loli ane, nizuye na maka, nu Muzimu uwa Mwene, sona nu bwanaloli na maka, ukuti imbabuzye abaluko ulwa Yakobo imbibi zyabo, sona nukunanga ukwa Izilayeli.

⁹ Ivwa kuno, mwe balongozi abaluko ulwa Yakobo, mwe balaghili aba Izilayeli, babo bakubusula ubwanaloli, nukuchinyongannya chosi chicho chigholosu,

¹⁰ mwe mukukazenga akaya akakulu nkani aka Ziyoni pakukupula ibanda, sona mukumuzenga u Yelusalemu nububibi.

¹¹ Abalongozi bache bakulonga pachifukwa icha mabeko, abaputi bache bakumanyisya pachifukwa icha malipilo, sona abalaghuzi bakulaghula pachifukwa icha ndalama. Loli pope bulo beghamiye kwa Mwene nukuti, “Nkimba u Mwene ate pakasi papitu? Chitalipo ichiwaya chicho chingatuwila.”

¹² Polelo pachifukwa icha mwemwe, u Ziyoni akwiza pakulimiwa ngati mughunda, u Yelusalemu akwiza pakuba chisami, sona ighamba ilya Nyumba iya Chala likwiza pakuba ngati musitu.