Mika 2 - IBAYIBOLO 2024

Ukufundiwa ukwa babo bakubayivya abapina

¹ Chighune ku bantu babo bakubatika pakubomba ububibi, sona nababo bakubatika ivibibi bo bali pavitala vyabo! Pandabindabi bakubomba zizyo babatika, pachifukwa ichakuti amaka aghakubombela zinizi ghali munyobe zyabo.

² Bakughanyonywa amaghunda agha bantu nukughafyula, sona ni nyumba izya bantu nukuzisenda. Bakumufyula umwenenyumba sona ni mpyana yache.

³ Polelo, u Mwene akuti, “Nkubatika ukunanganika pabantu banaba, kuko mutangipoka mwebene Mutakwiza pakwenda nalumolumo umwakwituvya, pakuti kakwiza pakuba kabalilo akapalapala.

⁴ Mwisiku lilalila abantu bakwiza pakukusamula sona bakwiza pakubobezya ni nyimbo izya chililo izyakuti: ‘Mwee twananganika nkani ukatundu uwa bantu bitu afyuliwa. Anfyula ukatundu wane wesi! Akubapa abalwani amaghunda ghitu ghosi.’ ”

⁵ Polelo atakwiza pakubapo nayumoyumo mulukomano ulwa Mwene yuyo akwiza pakugabiliwa ichisu pakubombezya amayele.

⁶ Abantu bakulumbilila kukwane bakuti, “Mutakalumbililaye kukwitu. Mutakalumbililaye ukuyana nazinizi. U Chala atakwiza pakutukozya isoni.”

⁷ Wee Izilayeli, nkimba Umuzimu uwa Mwene akalaye? Nkimba akuvibomba ivintu ngati vinivi? Fwandi amazyu ghane ghatakubomba inyiza, ku muntu yuyo izila zyache ngolosu?

⁸ Loli u Mwene akamula akati, “Amwe mukabasambukila abantu bane ngati balwani. Mukubavula inkazo inyiza abantu babo bakudumusannya ukusita kupasya, bakunyokako kubwite umwakufwasa.

⁹ Mukubachimbizya abachi aba bantu bane munyumba zyabo izyakuboneka akiza nkani, mukwefyapo ulusayo lwane pabana babo abanandi bwila na bwila.

¹⁰ Nyamuka, bukagha! Pakuti ubu te buzilo bwinyu ubwakutuzyapo, pachifukwa ichakuti bunyazu, sona bwananganika ukuchilapo.

¹¹ Nanti umuntu umumyasi sona umuzimbuli akwiza nukunena ukuti, ‘Nkwiza pakubalaghulila ukuti: Mukwiza pakuba nu vinyo umwinji, sona ni vyakungw'ela vivyo umuntu angakolwa navyo,’ umuntu yunuyu angaba mulaghuzi winyu!

¹² Wee Izilayeli, naloliloli nkwiza pakubabungannya mwebosi poka, naloliloli nkwiza pakubabungannya abantu abakusyalako aba Izilayeli. Nkwiza pakubabungannya ngati ng'ozi muchibagha, sona ngati gho mudimo apakudimilapo, ubuzilo bukwiza pakwizula na bantu abinji nkani.

¹³ Umuntu yuyo akulongolela, weyuyo akubalanjizya izila pantazi papabo, bakwiza pakupankula umulyango nukufumamo. U mwene wabo akwiza pakudumusannya pantazi papabo, u Mwene akwiza pakubalongozya.”