Mika 1 - IBAYIBOLO 2024

¹ Pakabalilo kako u Yotamu nu Ahazi, sona nu Hezekiya bakalaghilagha muchisu icha Yuda, u Mwene akamulanjizya u Mika uwaku Molesheti ichisetuka, chicho chikunena nizya kaya aka Samaliya naka Yelusalemu.

Ukumulilila u Samaliya nu Yelusalemu

² Mwee bantu aba inko zyosi, ivwa kuno, wee chisu ichapasi, na mwebosi mwe mukwikalamo, tegha amakutu ghinyu, ukuti u Mwene Uwamaka Ghosi akubasusya. U Mwene akunena mu Nyumba yache izelu.

³ Ennya! U Mwene akwiza ukufuma pabuzilo bwache ubwakwikalapo, akwika pasi nukwenda patunenela utwa maghamba.

⁴ Amaghamba ghakusunguluka muntende mwa Mwene. Ghope amakombe ghakulepunkana, ngati mpula pamoto, sona ngati mizi aghakwika pighamba.

⁵ Zyosi zinizi zili bunubu pachifukwa icha kunanga ukwa baluko ulwa Yakobo, sona na pachifukwa icha mbibi izya ba Izilayeli. Nkimba ukunanga ukwa Izilayeli ko koni? Fwandi te we Samaliya? Nkimba bo bawenu babo bakabapela abantu aba mu Yuda ukuti biputaye ivifwani? Fwandi batakaba bantu aba ku Yelusalemu?

⁶ Po u Mwene akuti, “Nkwiza pakukapela akaya akakulu nkani aka Samaliya pakuba chisami, pakuba maghunda agha mampesya. Nkwiza pakughasumbila amabwe ghache mwikombe, sona nukulufukula ulwalo lwache.

⁷ Ivifwani vyache vyosi vikwiza pakutiziwa tunanditunandi, sona ni vyabupi vyache vyosi, ivya mu Nyumba iya Chala vikwiza pakochiwa numoto. Nkwiza pakuvinangannya ivifwani vyache vyosi. Pakuti akavyaghila ivyabupi vyache mumuvwalo uwa bwamalaya, pakuba muvwalo uwa bwamalaya bakwiza pakuvibombezya sona.”

⁸ U Mika akati, “Pachifukwa chinichi, nkwiza pakulila nukufwifwitila, sona nkwiza pakwenda nyayo zyene nukuba nkule, Nkwiza pakukuta ngati we kambwe sona nkwiza pakulila ngati lisisimusi.

⁹ Pakuti ichilonda chache chitangapola, sona chafika mupaka kuchisu icha Yuda, Chafika mupaka pamulyango uwa kaya aka bantu bane, sona mupaka ku Yelusalemu.”

Abalwani bakwiza ku Yelusalemu

¹⁰ Mutakababuzye zinizi abantu aba mu Gati, mutakafwifwitilaye napo panandi. Mwee bantu aba Beti Ofula, mughalaghataye mulufumbi pachifukwa icha chitima.

¹¹ Mwee bantu aba mu Shafili, bukagha kuchisu icha buzya bo muli nkule sona nisoni. Abantu aba mu Zanani batakwiza pakwepamo mukaya kabo. Abantu aba mu Beti Ezeli bakulila, mumanye ukuti batangabavwa.

¹² Abantu babo bakwikala mu Maloti bakulindilila ubwavwilizi umwakupasya, pakuti u Mwene abatumila ichiwaya, chicho chafika mupaka ku Yelusalemu.

¹³ Amwe mwe mukwikala mu Lakishi, pinya ifalasi zyinyu kungolo izya bwite. Mukaba mwe bakwanda pakubapela abantu aba mu Ziyoni ukuti banangaye, pakuti imbibi izya ba Izilayeli zikaghiwa mumwinyu.

¹⁴ Polelo mukwiza pakulaghana na bantu aba mukaya aka Molesheti Gati, sona abantu aba mukaya akakulu aka Akizibi bakwiza pakubazimbula abamwene aba mu Izilayeli.

¹⁵ Mwe bantu baku Malesha, nkwiza pakubabika munyobe izya mulwani yuyo akwiza pakubafyula akaya. Abalongozi aba mu Izilayeli bakwiza pakuvwama mu mpako iya Adulamu.

¹⁶ Mumwanje isisi zyinyu pakubalilila abana binyu, babo mubaghanite nkani, Mumwanje ulupala ngati lizwanga, pakuti abana binyu bakwiza pakusendiwa kukwinyu nukubuka nabo kubuzya.