Matayi 6 - IBAYIBOLO 2024

U Yesu akumanyisya nizya kubavwa abantu abapotwe

¹ “Muchebaye, mutakabombaye imbombo zyinyu ingolosu pabuzelu ukuti abantu babapale. Nanti mukubomba bunubu mutakwiza pakupokela umuvwalo uwakufuma kwa Ghuso uwakumwanya.

² “Nanti mukumupa chimo umuntu umupotwe, mutakifumusyanje ukuyana namumo bakubombela abazimbuli munyumba izyakwiputilamo na muminalo. Bakubomba bunubu ukuti abantu babapale. Naloli nkubabuzya ukuti bapokelela zila umuvwalo wabo.

³ Loli nanti mukumwavwa umuntu umupotwe, mutakazibombaye pabuzelu, umwakuti umumanyani wako uwa pamoyo atakazimanye.

⁴ Po vivyo mwabomba vikwiza pakuba vya kubusyefu. Ughuso yuyo akwennya izyakubusyefu akwiza pakubapa umuvwalo.

U Yesu akumanyisya nizya nyiputo

⁵ “Bo mukwiputa, mutakayane na bazimbuli! Bighanite pakwimilila nukwiputa munyumba izyakwiputilamo, na munkomano izya misebo ukuti abantu babennye. Naloli nkubabuzya ukuti bapokelela zila umuvwalo wabo.

⁶ Loli bo mukulonda pakwiputa, mwinjile muchipinda chinyu, mwighalile umulyango nukwiputa kwa Ghuso, yuyo atakuboneka. Po Ughuso yuyo akwennya vivyo mukubomba kubusyefu, akwiza pakubapa umuvwalo.

⁷ “Bo mukwiputa, mutakapyanizyanje amazyu ghokaghoka ukuyana namumo bakubombela abantu abakuzi, babo bakwinong'ona ukuti u Chala akwiza pakwivwa inyiputo zyabo intali.

⁸ Mutakabanje ngati bo babo pakuti Ughuso azimenye kale zizyo mukulonda bo muchili pakulaba.

⁹ Bo mukwiputa mutinji, ‘Tata witu uwakumwanya; itabwa lyako lichindikiwanje.

¹⁰ Ubumwene bwako bwizaghe, ubwighane bwako bubombiwanje pachisu ichapasi pano ukuyana namumo kubeleye kumwanya.

¹¹ Utupe ilelo ichakulya icha isiku ni siku.

¹² Utuhobokele imbibi zyitu ukuyana namumo naswe bulo tukubahobokela abantu babo bakutunangila.

¹³ Utakitikizyanje ukuti tuwile munjelo, loli utupoke kwa Satana, Umubibi yula.’

¹⁴ “Nanti mukubahobokela abantu abanji zizyo babanangila, Ughuso uwakumwanya akwiza pakubahobokela imbibi zyinyu.

¹⁵ Loli nanti mutakubahobokela abamwinyu, Ughuso wepe atakwiza pakubahobokela imbibi zyinyu.

U Yesu akumanyisya nizya kutuzya pakulya

¹⁶ “Nanti mukutuzya pakulya mutakalanjizyanje ichitima ukuyana namumo bakubombela abazimbuli. Bakulanjizya ukukalala pamaso ukuti abantu babennye ukuti bakutuzya pakulya. Naloli nkubabuzya ukuti bapokelela zila umuvwalo wabo.

¹⁷ Loli nanti mukutuzya pakulya, sukusula ku maso nukupesa isisi zyinyu kumutu

¹⁸ ukuti abantu batakazimanye ukuti mukutuzya pakulya, loli Ughuso mwene yuyo atakuboneka. Po Ughuso yuyo akwennya izyakubusyefu, akwiza pakubapa umuvwalo.

U Yesu akumanyisya nizya bukabi ubwa Kumwanya

¹⁹ “Mutakilundikilaye ubukabi pachisu ichapasi, pakuti impezu nu lusima vikubunangannya, sona na biba bope bakupankula nukwiba.

²⁰ Loli mwilundikilaye ubukabi bwinyu kumwanya, kuko impezu nu lusima vitakubunangannya, sona na biba bope batangapankula nukwiba.

²¹ Pakuti kuko kuli ubukabi bwako, ko kuko kuli nu moyo wako.

Ulukozyo ulwa mubili

²² “Amaso ghako yo nyale iya mubili wako. Nanti amaso ghako miza, kokuti nu mubili wako ghope ghukwiza pakuba mulukozyo.

²³ Loli nanti amaso ghako mabibi, kokuti nu mubili wako ghope ghukwiza pakuba muchisi. Po nanti ulukozyo mumwako lwipela pakuba chisi, ichisi chila chikwiza pakuba chakoghofya nkani.

U Chala nu bukabi

²⁴ “Atalipo uwambombo yuyo angababombela imbombo abamwene babili pakabalilo koka. Pakuti angamughana weka nukumubenga uyunji, pamo angamwivwila weka nukumusula uyunji. Utangabombela vyosi vibili akabalilo koka, u Chala ni ndalama.

²⁵ “Polelo nkubabuzya ukuti mutakapasyanje nizya bumi bwinyu ukuti mukwiza pakulya ichoni, pamo mukwiza pakung'wela ichoni, pamo nizya mabili ghinyu, ukuti mukwiza pakuvwala ichoni. Nkimba ubumi bute bwapamwanya ukuchila ichakulya? Nkimba umubili ghute wapamwanya ukuchila amenda?

²⁶ Ennya, iviyuni vitakupesa imbeyu, pamo ukwinula, pamo ukubika ivyakulya muntamba, loli Ughuso uwakumwanya akuvilyesya. Nkimba mute mwe bapamwanya nkani ukuchila iviyuni?

²⁷ Nkimba alipo umuntu pakasi papinyu yuyo angonjelezya isiku lyoka ilya bumi bwache pakupasya?

²⁸ “Po choni chicho mukupasya nizya menda aghakuvwala? Ennya ubwezya ubwa muzi mumo bukukulila. Butakubomba imbombo, pamo ukwipangila amenda.

²⁹ Loli nkubabuzya ukuti u Mwene u Solomoni nu bukabi bwache bosi, atakaba na menda amiza ghagho ghayanite bulo nubwezya limo ilya agha.

³⁰ Nanti u Chala angaghavwika amasote, ghagho ghaliko ilelo nukughasumbila pamoto indabi, nkimba atangabavwika amwe. Mwe bantu aba lwitiko ulunandi amwe?

³¹ “Polelo mutakapasyanje ukuti, ‘Tukwiza pakulya ichoni pamo, tukwiza pakung'wela ichoni, pamo tukwiza pakuvwala ichoni?’

³² Pakuti abantu abakuzi bo babo bakuvilonda ivintu vinivi. Ughuso uwakumwanya avimenye ivintu vyosi vivyo mukuvilonda.

³³ Loli amwe, mulondaye tasi Ubumwene ubwa Chala nukubomba zizyo akulonda, po akwiza pakubapa ivintu vyosi vinivi.

³⁴ Mutakapasyanje nizya ndabi pakuti ivya ndabi vya ndabi. Isiku lili lyosi lili nintamyo izyakuyana nalyo.