Matayi 3 - IBAYIBOLO 2024

Ubulumbilili ubwa Yohani Uwalozyo

¹ Pakabalilo kalakala u Yohani Uwalozyo akiza munkolongo muchigaba icha Yudeya nukwanda pakulumbilila.

² Akati, “Pinduka nukuzileka imbibi zyinyu, pakuti Ubumwene ubwa Kumwanya buli papipi!”

³ U Yohani akaba muntu yuyo umulaghuzi u Yesaya akamunenagha ukuti, “Izyu ilya muntu yumo likukolomoka munkolongo likuti, ‘Yannya izila iya Mwene, gholosya izila ukuti endemo!’ ”

⁴ U Yohani akavwalagha amenda aghameya agha ngamila nulamba uwikwela mumusana wache, po ichakulya chache chikaba we kanta nu buchi.

⁵ Abantu bosi aba mu Yelusalemu naba muchigaba chosi icha Yudeya, naba muvigaba vyosi ivya papipi nulusoko ulwa Yolodani bakiza kukwache.

⁶ Bakilata imbibi zyabo nukoziwa nu Yohani mulusoko ulwa Yolodani.

⁷ U Yohani akabennya aba Falisayi naba Sadukayi abinji bakwiza kukwache ukuti boziwe. Po akababuzya akati, “Amwe mwe bana aba njoka! Nkimba wewenu abasokite pakuluchimbila ulufundo ulwa Chala lulo lukwiza?

⁸ Bombagha imbombo izyakulanjizya ukuti naloli mwapinduka nukuzileka imbibi zyinyu.

⁹ Mutakinong'onaye ukuti, ‘U Abulahamu we munyenya witu.’ Nkubabuzya ukuti u Chala angaghapela amabwe agha pakuba baluko aba Abulahamu.

¹⁰ Intemo yiyaniziwe kale pakudumula amakwi pasi pamagululuzi. Ikwi lyosi lilyo litakwela ivikomwa ivyiza likwiza pakudumuliwa nukusumbiwa pamoto.

¹¹ Ane nkubozya na mizi pakulanjizya ukuti naloli mwapinduka nukuzileka imbibi zyinyu. Loli pisinda papane akwiza yumo yuyo ali namaka ukunchila. Ane intabaghiye na panandi pakunyamula inkwato zyache. Akwiza pakubozya nu Muzimu Umuzelu numoto.

¹² Ali nuluselo munyobe zyache ulwakupetela ingano. Po akwiza pakubika ingano muntamba, loli ilyelelo likwiza pakochiwa numoto, ghugho ghutakuzimapo nalumolumo.”

Ukoziwa ukwa Yesu

¹³ Pakabalilo kalakala u Yesu akafuma mu Galileya nukwiza kulusoko ulwa Yolodani ukuti oziwe nu Yohani.

¹⁴ Loli u Yohani akayezya pakumukanila ukuti, “Ane ne nabaghiye pakoziwa nawe, loli choni chicho wiza kukwane?”

¹⁵ U Yesu akamwamula akati, “Vileke vibanje bunubu pakabalilo aka, pakuti tukwiza pakubomba zyosi zizyo u Chala akulonda.” Po u Yohani akitika.

¹⁶ Bo u Yesu oziwa bulo, akazubuka mumizi. Palapala kumwanya kukighuka, akennya u Muzimu uwa Chala akumwikila ngati yo nkunda.

¹⁷ Po izyu likivwika kumwanya likati, “Uyu Mwana wane umughaniwa, yuyo ihobokite nkani nawe.”