Matayi 26 - IBAYIBOLO 2024

Ulubatiko ulwa kumughoghela u Yesu

¹ Bo u Yesu amala bulo pakumanyisya ivintu vyosi ivi akababuzya abamanyili bache akati,

² “Muzimenye ukuti bo ghachilapo amasiku mabili kukwiza pakuba Lusekelo ulwa Pasa, po u Mwana uwa Muntu akwiza pakubikiwa ukuti akomeliwe pachipinjika.”

³ Po Abaputi abasongo na balongozi aba Chiyuda bakabungana poka munyumba iya Kayafa, umuputi usongo.

⁴ Bakanenezannya mumo bangamulemela u Yesu kubusyefu nukumughogha.

⁵ Bakati, “Tutakachibombe pakabalilo aka lusekelo pachifukwa ichakuti abantu banganda ivyongo.”

Umukolo akumupakazya u Yesu amafuta mu Betaniya

⁶ U Yesu akaba mukaya aka Betaniya munyumba iya Simoni, umuntu yuyo akatamiwapo na mambombo.

⁷ Bo u Yesu ali pakulya, umukolo yumo akiza ni botolo ilya alabasita ilyizule na mafuta aghamutengo nkani aghakununkila nukumupungulila u Yesu pamutu.

⁸ Loli bo abamanyili bache bennya zinizi, bakakalala. Bakalalusya bakati, “Nkimba choni chicho akunangannya bulo amafuta agha?

⁹ Amafuta agha ngali ghaghuliziwa ni ndalama inyinji nukubapazyo abapina!”

¹⁰ U Yesu akazimanya zizyo bakanenagha, po akababuzya akati, “Nkimba choni chicho mukumutamya umukolo uyu? Chiza nkani chicho ambombela.

¹¹ Akabalilo kosi muli nabo abapina, loli mute mubanje nane akabalilo kosi.

¹² Umukolo uyu apungulila amafuta pamubili wane pakughuyannya zila bo akabalilo akakusyiliwa kwane katakwanite.

¹³ Naloli nkubabuzya ukuti kosi kuko Amazyu Amiza agha ghakulumbililiwa muchisu chosi ichapasi, chicho abomba umukolo uyu chikwiza pakuneniwa ukuti abantu bamukumbukilayepo.”

U Yudasi akumubika u Yesu munyobe izya baputi abasongo

¹⁴ Po yumo uwa bamanyili 12 bala yuyo akitiziwanga Yudasi Sikaliyoti akabuka pakukomana na baputi abasongo.

¹⁵ Akabalalusya akati, “Nanti namubika u Yesu munyobe zyinyu, nkimba mukwiza pakumpa ichoni?” Bakabelengela isalabazya izya siliva 30 nukumupa.

¹⁶ Ukwandila pakabalilo kalakala u Yudasi akanda pakulondelezya akabalilo akiza akakumubikila u Yesu munyobe zyabo.

U Yesu na bamanyili bache bakulya ivya pa Lusekelo ulwa Pasa

¹⁷ Pisiku ilyakwanda ilya Lusekelo ulwa Chibama chicho chite ni chilungo, abamanyili bakiza kwa Yesu nukumulalusya ukuti, “Nkimba ukulonda ukuti tukuyanizizye kwiyi Ulusekelo ulwa Pasa?”

¹⁸ Akababuzya akati, “Bukagha mukaya akakulu nkani pakukomana nu muntu yumo nukumubuzya ukuti, ‘Umumanyisi akuti, akabalilo kane kakwana. Ane na bamanyili bane tukulonda pakusekelelamo Ulusekelo ulwa Pasa munyumba yako.’ ”

¹⁹ Abamanyili bakabomba vivyo u Yesu akababuzya nukuyannya Ulusekelo ulwa Pasa.

²⁰ Pachamabwila, u Yesu na bamanyili bache 12 bakikala nukulya.

²¹ Bo bali pakulya, u Yesu akati, “Naloli nkubabuzya ukuti umuntu weka pakasi papinyu akwiza pakumbika munyobe izya balwani.”

²² Abamanyili bala bakayimba nkani mumoyo nukwanda wekaweka pakumulalusya u Yesu ukuti, “Wee Mwene, naloli ningaba nene?”

²³ U Yesu akabamula akati, “Umuntu yuyo akusazila poka nane ichibama mumbale weyuyo akwiza pakumbika munyobe izya balwani.

²⁴ U Mwana uwa Muntu akwiza pakufwa ukuyana na Masimbo. Loli chighune nkani nu muntu yuyo akumubika u Mwana uwa Muntu munyobe izya balwani! Chikaba chizapo ukuti umuntu yula ngali atakapapiwanga!”

²⁵ U Yudasi yuyo akamubika munyobe izya balwani akati, “Wee Mumanyisi, naloli ningaba nene.” U Yesu akamula akati, “Wanena wemwene.”

Ichakulya icha Mwene

²⁶ Bo bali pakulya, u Yesu akasenda ichibama, akamupalizya u Chala nukuchimenyannya. Akabapa abamanyili bache nukuti, “Ughu gho mubili wane, senda, lyanga.”

²⁷ Po akasenda ulubako lula, akamupalizya u Chala nukubapa. Akati, “Ng'wela mwebosi.

²⁸ Pakuti ili libanda lyane ilyakusimikizya ulufingo ulwa Chala, lilyo lyatonya ukuti abantu abinji bahobokeliwe imbibi zyabo.

²⁹ Nkubabuzya ukuti ntakwiza pakung'welapo nalumolumo uvinyo uyu mupaka pisiku lilyo nkwiza pakung'wela uvinyo umupya poka namwe mu Bumwene ubwa Tata wane.”

³⁰ Po bakimba ulwimbo ulwakumuchindika u Chala nukubuka Pighamba ilya Misyunguti.

U Yesu akunenela zila ukuti u Pitala akwiza pakumukana

³¹ U Yesu akababuzya akati, “Ubusiku ubu mwebosi mukwiza pakuntoloka, pakuti Amasimbo ghakuti, ‘Nkwiza pakumughogha umudimi, po ing'ozi zyosi zikwiza pakunyampana.’

³² Loli bo nazyuka kubufwe, nkwiza pakulongolela ku Galileya.”

³³ U Pitala akamula akati, “Ntakwiza pakukuleka nalumo, napapo abanji bosi bangachibomba!”

³⁴ U Yesu akamubuzya u Pitala akati, “Nkukubuzya ukuti bo ukolwe atakokolikite ubusiku ubu, ukwiza pakunkana katatu.”

³⁵ Loli u Pitala akamula akati, “Napapo imbaghiye pakufwa poka nawe ntakwiza pakunenapo nalumolumo bunubu.” Bope abamanyili abanji bosi bala bakanena bunubu.

U Yesu akwiputa mu Getisemani

³⁶ U Yesu akabuka na bamanyili bache kubuzilo bubo bukwitiziwanga ukuti Getisemani, po akababuzya abamanyili bache akati, “Ikala pano, nabuka pakwiputa pala.”

³⁷ Akamusenda u Pitala poka na bana babili aba Zebediya. Akaba ni chitima nukuyimba nkani mumoyo wache.

³⁸ Akababuzya akati, “Umoyo wane wizuye ni chitima ichikulu nkani ichakufwa nacho. Ikala pano nukuchelezya poka nane.”

³⁹ Akatantama panandi nukwisumba pasi nukwiputa ukuti, “Tata wane, nanti zingabombiwa, efya ulubako ulwa ntamyo ulu kukwane. Chitakabe mumo nkulondela awe, loli mumo ukulondela.”

⁴⁰ Po akanyokela ku bamanyili batatu bala nukubagha baghonite. Akamulalusya u Pitala akati, “Nkimba mupotizwe pakuchelezya nane akabalilo akanandi aka?

⁴¹ Mubanje maso nukwiputa ukuti mutakawile munjelo. Umuzimu ghukulonda, loli ubuntu bute na maka.”

⁴² U Yesu akabuka sona nukwiputa ukuti, “Tata wane, nanti ulubako ulwa ntamyo ulu lutangepako kukwane pene papo nang'wela, ubwighane bwako bubombiwe.”

⁴³ Akanyokela sona nukubagha baghonite pakuti amaso ghabo ghakizula nu tulo.

⁴⁴ U Yesu akabaleka nukubuka sona pakwiputa akabutatu na mazyu ghali ghoka.

⁴⁵ Akanyokela ku bamanyili bache nukuti, “Nkimba muchili mughonite nukutuzya? Akabalilo kakwana, u Mwana uwa Muntu ali pakubikiwa munyobe izya bantu abambibi.

⁴⁶ Nyamuka, twende tubukaye. Umuntu yuyo akumbika munyobe izya balwani uyo afika!”

Bakumulema u Yesu

⁴⁷ Bo u Yesu achili akunena, u Yudasi weka uwa bamanyili 12 bala, akafika. Akiza poka ni chilundilo chicho chikanyamula abapanga ni ntughu, chicho chikatumiwa na baputi abasongo na balongozi aba Chiyuda.

⁴⁸ Umuntu yuyo akamubika u Yesu munyobe izya balwani akachipa ichilundilo ichimanyilo ichakuti, “Umuntu yuyo nkumulamuka pakumufyofyonta, weyuyo mukumulonda. Mumuleme.”

⁴⁹ Umwalubilolubilo u Yudasi akabuka kwa Yesu nukuti, “Wee Mumanyisi, umutende ghubanje nawe.” Po akamufyofyonta.

⁵⁰ U Yesu akamula akati, “Wee mumanyani, lubilo bomba chicho wiziye pano.” Po bakiza, bakamulema nukumupinya nkani u Yesu.

⁵¹ Weka uwa bantu babo bakaba poka nu Yesu akawesa upanga wache, akamukoma umuzya uwa muputi usongo nukudumula ikutu lyache.

⁵² U Yesu akamubuzya akati, “Nyosezya upanga wako mubuzilo bwache. Pakuti abantu bosi babo bakubombezya upanga bakwiza pakufwa nupanga.

⁵³ Nkimba mutazimenye ukuti ningalaba kwa Tata ukuti anyavwe, po umwalubilolubilo ngali antumila utubukatila utwa abantumi ukuchila 12?

⁵⁴ Loli Amasimbo ghangakwanilisiwa bulibuli ghagho ghakuti izi zibaghiye pakubombiwa?”

⁵⁵ Po u Yesu akabalalusya abantu akati, “Nkimba choni chicho mwiza na bapanga ni ntughu pakundema ngati ne livyondongo? Isiku lyosi nkikala namwe nukubamanyisya mu Nyumba iya Chala, loli mutakandema.

⁵⁶ Loli vyosi vinivi vyabombiwa ukuti vivyo abalaghuzi bakasimba vikwanilisiwe.” Po abamanyili bache bosi bakamuleka nukuchimbila.

U Yesu pamaso pa balongi

⁵⁷ Abantu babo bakamulema u Yesu bakabuka nawe kunyumba iya Kayafa, umuputi usongo. Kulakula abamanyisi aba Ndaghilo na balongozi aba Chiyuda bakabungana poka.

⁵⁸ U Pitala akamukonkagha pabutalipo mupaka mulubinjilo ulwa nyumba iya muputi usongo. Akinjila mulubinjilo nukwikala pasi poka na balindilili ukuti ennye mumo vingamalila.

⁵⁹ Abaputi abasongo na balongi bosi bakayezya pakubwagha ubwakaboni ubwabumyasi ubwakumughoghela u Yesu.

⁶⁰ Loli batakabwagha nabumobumo, napapo abakaboni abamyasi bakiza pantazi nukumutamantila. Pabumalilo abantu babili bakiza pantazi

⁶¹ nukuti, “Umuntu uyu akati, ‘Ningayimongolannya Inyumba iya Chala nukuyizenga sona mumasiku matatu.’ ”

⁶² Umuputi usongo akimilila nukumulalusya u Yesu ukuti, “Nkimba ute ni lyamulo pa zizyo abantu banaba bakukunenela?”

⁶³ Loli u Yesu akaba myee. Umuputi usongo akamubuzya sona akati, “Nkukulamula mwitabwa ilya Chala umumi ukuti ulape nanti we Kilisitu, u Mwana uwa Chala.”

⁶⁴ U Yesu akamula akati, “Wanena wemwene. Loli nkubabuzya mwebosi ukuti ukwandila pakabalilo aka mukwiza pakumwennya u Mwana uwa Muntu ikaye kunyobe indilo iya Chala Uwamaka Ghosi akwiza mumabingu.”

⁶⁵ Po umuputi usongo yula mubukalale akazepula inkazo yache nukuti, “Akumusamula u Chala! Nkimba tukulonda sona abakaboni abanji? Mwivuye mwebene mumo amusamuliye u Chala.

⁶⁶ Nkimba mukuti choni?” Bakamula bakati, “Aghoghiwanje.”

⁶⁷ Po bakamufwinila amati kumaso nukumukoma. Abanji bakamukomagha na mapi,

⁶⁸ nukuti, “Wee Kilisitu, sakizya wewenu akukoma!”

U Pitala akumukana u Yesu

⁶⁹ U Pitala akikalagha mulubinjilo, po weka uwambombo umulindu uwa muputi usongo akiza nukumubuzya ukuti, “Nawe bulo ukabanga poka nu Yesu uwamu Galileya.”

⁷⁰ Loli akakana pamaso pa bosi. Akati, “Ntazimenye zizyo ukunena.”

⁷¹ Akabuka pamulyango uwa lubinjilo, po umulindu uyunji akamwennya nukubabuzya abantu babo bakaba palapala nukuti, “Usongo uyu akabanga poka nu Yesu uwamu Nazaleti.”

⁷² U Pitala akakana sona nukwamula ukuti, “Naloli nkulapa ukuti intamumenye umuntu uyu.”

⁷³ Bo pachilapo bulo akabalilo, abantu babo bakimilila palapala bakiza nukumubuzya u Pitala ukuti, “Naloli nawe bulo we uwa bantu banaba pakuti ululimi lwako lukukulanjizya pabuzelu.”

⁷⁴ Po u Pitala akati, “Nkulapa ukuti nkunena ubwanaloli! U Chala anfunde nanti nkutamanta. Naloli intamumenye umuntu yuyo mukumunena.” Panapo ukolwe akakokolika.

⁷⁵ Po u Pitala akakumbuka zizyo u Yesu akamubuzya ukuti, “Bo ukolwe atakokolikite ukwiza pakunkana katatu ukuti utamenye.” Akafuma kuzi nukulila nkani na masozi.