Matayi 25 - IBAYIBOLO 2024

Ichili icha balindu teni

¹ “Pakabalilo kalakala Ubumwene ubwa Kumwanya bukwiza pakuyana bulo na balindu bamo teni, babo bakasenda inyale zyabo nukubuka pakulindilila umwenesendwa.

² Abalindu fayivi bakaba bapunganu, sona abamwabo fayivi bakaba bamahala.

³ Abapunganu bala bakasenda inyale zyabo, loli batakapaya amafuta.

⁴ Loli abamahala bala bakapaya amabotolo, ghagho ghakizula na mafuta agha nyale zyabo.

⁵ Umwenesendwa akakaba pakwiza, po abalindu bakanda pakusyupila nukughona utulo.

⁶ “Pakasi pabusiku ukukolomoka kukivwika ukuti, ‘Umwenesendwa afika! Zagha mumupokele!’

⁷ Abalindu 10 bala bakanyamuka nukukwezya ivisunda ivya nyale zyabo.

⁸ Po abapunganu bakababuzya abamahala bala bakati, ‘Tupeko amafuta ghamo, ennya inyale zyitu zikuzima.’

⁹ Abamahala bala bakamula bakati, ‘Awe, ghalipo aghakutuyana twebene. Bukagha mwighulile mwebene kuko bakughulizya.’

¹⁰ Loli bo abalindu abapunganu bala babuka pakughula amafuta, umwenesendwa akafika. Abalindu fayivi bala babo bakiyannya, bakinjila nawe munyumba iya lusekelo nukwighalila umulyango.

¹¹ “Pisinda pache abalindu abanji fayivi bala bakafika nukuti, ‘Wee Mwene, wee Mwene, twighulileko!’

¹² Umwenesendwa akamula akati, ‘Awe! Naloli intabamenye!’ ”

¹³ Pabumalilo u Yesu akati, “Mubanje maso pakuti mutalimenye isiku pamo akabalilo.”

Ichili icha bambombo batatu

¹⁴ “Pakabalilo kalakala Ubumwene ubwa Kumwanya bukwiza pakuyana bulo nu muntu yuyo akalondagha pakuchula. Bo atabukite, akabitizya abambombo bache nukubalekela ukatundu wache.

¹⁵ Akamupa umuntu wesi indalama ukuyana na mahala ghache. Weka akamupa isalabazya 5,000, uwamwabo akamupa 2,000, uyunji akamupa 1,000. Po akanyamuka nukubuka pabulendo bwache.

¹⁶ Uwambombo yuyo akapokela isalabazya 5,000 akabuka umwalubilolubilo nukubombezya imbombo indalama zila nukukabilapo izinji 5,000.

¹⁷ Bunubu sona uwambombo yuyo akapokela isalabazya 2,000, akakabilapo 2,000 izinji.

¹⁸ Loli uwambombo yuyo akapokela isalabazya 1,000, akabuka nukukumba ichiliba nukufisamo indalama izya mwene wache zila.

¹⁹ “Bo pachilapo akabalilo akatali, u mwene uwa bambombo bala akabwelako, akennya mumo bakabombezya indalama zila.

²⁰ Uwambombo yuyo akapokela isalabazya 5,000 akiza nukumupa 5,000 izinji zizyo akakabilapo. Akati, ‘Wee mwene, ukampa isalabazya 5,000. Ennya, ilelo nakabilapo izinji 5,000.’

²¹ Umwene wache yula akati, ‘Wabomba akiza, we wambombo umwiza nu musubiliwa! We musubiliwa patuntu utunandi, po ukwiza pakuba we songo uwa vintu ivikulu. Zagha kuno tusekelele poka!’

²² Uwambombo yuyo akapokela isalabazya 2,000 akiza nukuti, ‘Wee mwene, ukampa 2,000. Ennya, ilelo nakabilapo izinji 2,000.’

²³ U mwene yula akati, ‘Wabomba akiza, we wambombo umwiza nu musubiliwa! We musubiliwa patuntu utunandi, po ukwiza pakuba we songo uwa vintu ivikulu. Zagha kuno tusekelele poka!’

²⁴ “Uwambombo yuyo akapokela isalabazya 1,000 akiza nukuti, ‘Wee Mwene inzimenye ukuti we muntu umukali, ukuvuna papo utabyalite, ukubungannya papo utapesite imbeyu.

²⁵ Nkanyilagha, po nkakumbila pasi indalama yako. Ennya, indalama yako iyi.’

²⁶ “U mwene yula akati, ‘We wambombo umubibi nu mukata! Ukazimanya ukuti nkwinula papo intabyalite nukubungannya papo intapesite imbeyu.

²⁷ Po chikaba chizapo ngali wabikite indalama yane kunyumba iyakusungilamo indalama ukuti bo nkubwela impokele poka na yiyo yakabilapo.

²⁸ Losi ulu, mufyule indalama nukumupa uwambombo yuyo ali ni salabazya teni.

²⁹ Pakuti umuntu wesi yuyo ali nako kale kamo, akwiza pakumonjelezyapo ivyinji ukuchila, sona akwiza pakuba navyo ivyinji nkani. Loli umuntu yuyo ate nako nakamo, na kanandi kako ali nako kale kakwiza pakufyuliwa.

³⁰ Po uwambombo uwabulo uyu mumusumbile kuzi muchisi, kuko akwiza pakulila nukusyeketula amino ghache.’

Ubulongi ubwabumalilo

³¹ “Bo u Mwana uwa Muntu akwiza pakuba we Mwene poka na bantumi bosi, akwiza pakwikala pachitengo icha bumwene icha buchindamu.

³² Po abantu aba inko zyosi bakwiza pakubungana poka pamaso papache. Akwiza pakubagaba pabili ukuyana namumo umudimi akupaghulila ing'ozi ni mbuzi.

³³ Akwiza pakubika ing'ozi kunyobe yache indilo nukubika imbuzi kunyobe yache iyamongo.

³⁴ Po u Mwene akwiza pakubabuzya abantu aba kunyobe indilo ukuti, ‘Zagha kuno, mwe basayiwa nu Tata wane! Zagha mupokele ubumwene bubo buyaniziwe pakuba bwinyu ukwandila pakabalilo kako akapelelagha ichisu ichapasi.

³⁵ Nkaba nizala mukampa ichakulya, nkaba ni nyota mukampa amizi; nkaba muyeni, mukampokela munyumba zyinyu;

³⁶ nkaba nkule, mukanvwika; nkaba mubine, mukansungilila akiza; nkaba mujele, mukanyendela.’

³⁷ “Po abagholosu bakwiza pakwamula ukuti, ‘Mwene, nkimba tukakwennyapo liyi, bo uli nizala nukukupa ichakulya, pamo uli ni nyota nukukupa amizi?

³⁸ Nkimba tukakwennyapo liyi, bo we muyeni nukukupokela munyumba zyitu, pamo uli nkule nukukuvwika?

³⁹ Nkimba tukakwennyapo liyi, bo we mubine, pamo uli mujele nukukwendela?’

⁴⁰ U Mwene akwiza pakwamula ukuti, ‘Naloli nkubabuzya ukuti akabalilo kosi kako ukamubombela ichiza umuntu weka uwa bakamu bane yuyo munandi nkani, ukambombela nene!’

⁴¹ “Po akwiza pakubabuzya abantu aba kunyobe imongo ukuti, ‘Epako kukwane mwe baghuniwa. Bukagha mumoto uwa bwila na bwila ghugho bamuyanizye u Satana na bantumi bache!

⁴² Nkaba nizala, mutakampa ichakulya. Nkaba ni nyota, mutakampa amizi.

⁴³ Nkaba muyeni, mutakampokela munyumba zyinyu. Nkaba nkule, mutakanvwika. Nkaba mubine na mujele, mutakansungilila.’

⁴⁴ “Po bakwiza pakwamula ukuti, ‘Mwene, nkimba tukakwennyapo liyi uli nizala pamo uli ni nyota, pamo we muyeni, pamo uli nkule, pamo we mubine, pamo uli mujele nukukana pakukwavwa?’

⁴⁵ U Mwene akwiza pakwamula ukuti, ‘Naloli nkubabuzya ukuti akabalilo kosi kako mukukana pakumwavwa umuntu weka uwa bakamu bane yuyo munandi nkani, po mukakana pakunyavwa.’

⁴⁶ Po abantu bala bakwiza pakufundiwa bwila na bwila, loli abagholosu bakwiza pakwinjila mubumi ubwa bwila na bwila.”