Matayi 13 - IBAYIBOLO 2024

Ichili icha mupesambeyu

¹ Pisiku lilalila u Yesu akepapo panyumba yila nukubuka pakwikala pasi mulubazu ulwa nyanja.

² Abantu babo bakamuzyungulila bakaba binji nkani, umwakuti akinjila mubwato nukwikala mulamula, bo abantu bimiliye mulubazu ulwa nyanja.

³ Akababuzya ivintu ivyinji muvyili akati, “Kukabako umuntu yumo yuyo akabuka pakupesa imbeyu mumughunda wache.

⁴ Bo ali pakupesa, imbeyu zimo zikawila muzila, po iviyuni vikiza nukuzizompola.

⁵ Zimo zikawila pilyalabwe pakuti pakaba itope linandi. Umwalubilolubilo imbeyu zila zikamela pakuti patakabapo itope ilyinji.

⁶ Loli bo izuba lyakwela, imbeyu zila zikababuka pakuti amagululuzi ghakaba ghachili ghatayiye nkani pasi, sona imbeyu zila zikuma.

⁷ Imbeyu zimo zikawila pakasi pamivwa, ghagho ghakakula nukufyululusya imbeyu zila.

⁸ Loli imbeyu zimo zikawila pitope ilyiza, po imbeyu zikela ivikomwa, zimo zikela ivikomwa 100, zimo 60, izinji 30.”

⁹ U Yesu akati, “Yuyo ali na makutu aghakwivwila, ivwe!”

Ifundo iya vyili

¹⁰ Pisinda pache abamanyili bala bakamulalusya u Yesu bakuti, “Nkimba choni chicho ukubombezya ivyili nanti ukunena na bantu?”

¹¹ U Yesu akamula akati, “U Chala abavumbulila vivyo vifisiwe ivya Bumwene ubwa Kumwanya, loli abantu bosi abanji, awe.

¹² Pakuti umuntu yuyo ali nako kale kamo, akwiza pakumonjelezyapo ivyinji, ukuti abanje navyo ivyinji ukuchila. Loli umuntu yuyo ate nako kamo akwiza pakufyuliwa na kanandi bulo kako ali nako kale.

¹³ Ifundo yiyo nkubombezya ivyili, bo nkunena na bantu yakuti, bakwennya loli batakwennya kamo, bakuteghelezya loli batakwivwa pamo ukuvwisya.

¹⁴ Amazyu agha mulaghuzi u Yesaya ghakwanilisiwe kukwabo ukuti, ‘Abantu banaba naloli bakwiza pakwivwa, loli bate bakivwisye. Bakwiza pakwennya, loli bate bakennye nakamokamo.

¹⁵ Pakuti amoyo ghabo makafu nkani, sona basindiye amakutu ghabo, basizilite amaso ghabo. Pakuti ngali amaso ghabo ghakwennya, amakutu ghabo ngali ghakwivwa ni nyinong'ono zyabo ngali zikwivwisya. Po ngali bapindukila kukwane, u Chala akunena, ngali imbapozizye.’

¹⁶ “Loli mwe basayiwa pakuti amaso ghinyu ghakwennya, sona amakutu ghinyu ghakwivwa.

¹⁷ Naloli nkubabuzya ukuti abalaghuzi abinji na bantu abinji aba Chala bakalondagha nkani pakwennya zizyo mukwennya, loli batakazyennya. Bakalongagha nkani pakwivwa zizyo mukwivwa, loli batakazyivwa.”

U Yesu akulingannya ichili icha mupesambeyu

¹⁸ “Polelo ivwa kuno nukumanyila ukuti ichili icha mupesambeyu chikung'anamula ichoni.

¹⁹ Abantu babo bakwivwa amazyu ghagho ghakunena nizya Bumwene ubwa Kumwanya loli batakwivwisya bayanite bulo ni mbeyu zizyo zikawila muzila. Umubibi yula akwiza nukuzompola vivyo vikapesiwa mumoyo ghabo.

²⁰ Imbeyu zizyo zikawila pilyalabwe, zikwimilila babo bakupokela amazyu nu buhobosu pakabalilo kako baghivwila.

²¹ Loli ghatakwinjila nkani mumwabo, sona ghatakwikala akabalilo akatali. Po nanti intamyo pamo ukuvwimiwa kwafika pachifukwa icha mazyu, bakuwa umwalubilolubilo.

²² Imbeyu zizyo zikawila pakasi pamivwa zikwimilila abantu babo bakwivwa amazyu agha Chala. Loli ukwikolezannya nivya bumi ubu, ukuchighana ichuma vikufyululusya amazyu ghala, po batakupa ivikomwa.

²³ Imbeyu zizyo zikapesiwa mwitope ilyiza zikwimilila abantu babo bakwivwa amazyu nukughivwisya: Bakupa ivikomwa, bamo 100, abanji 60, sona bamo 30.”

Ichili icha ndezye

²⁴ U Yesu akababuzya ichili ichinji akati, “Ubumwene ubwa Kumwanya buyanite bulo nu muntu yuyo akapesa imbeyu inyiza mumughunda wache.

²⁵ Ubusiku bumo, bo umuntu wesi aghonite, umulwani akiza nukupesa indezye mu ngano nukwepapo.

²⁶ Bo imbeyu zyakula nukwanda pakufuma utumitu, po zyope ni ndezye zikaboneka.

²⁷ Abambombo aba muntu yula bakiza nukumubuzya ukuti, ‘Wee Mwene, imbeyu zizyo ukapesa mumughunda mula zikaba nyiza. Nkimba indezye zyafuma kwiyi?’

²⁸ Akamula akati, ‘Akaba mulwani yumo yuyo akabomba zinizi.’ Bakamulalusya bakati, ‘Nkimba ukulonda ukuti tubuke pakunyunkulamo indezye?’

²⁹ Akamula akati, ‘Awe, pachifukwa ichakuti bo mukunyunkula indezye munganyunkulila poka ni ngano.

³⁰ Yileke ingano ni ndezye vikulile poka mupaka pakabalilo akakwinulila. Po nkwiza pakubabuzya abinuli ukuti banyunkule tasi indezye nukuzipinya munkose nukuzyocha. Pisinda pache babungannye ingano nukubika muntamba yane.’ ”

Ichili icha kambeyu akanandi aka ikwi

³¹ U Yesu akababuzya ichili ichinji akati, “Ubumwene ubwa Kumwanya buyanite bulo nu muntu yuyo akusenda akambeyu akanandi aka ikwi nukukapesa mumughunda wache.

³² Kambeyu kanandi patumbeyu tosi, loli nanti kakula kakuba kakulu nkani ukuchila imbeyu zyosi, umwakuti utuyuni tukwiza nukulukamo ivivumbo vyabo musamba zyache.”

Ichili icha chilungo

³³ U Yesu akababuzya sona ichili ichinji akati, “Ubumwene ubwa Kumwanya buyanite bulo nu mukolo yuyo akusenda ichilungo nukongannya ni ndobo zibili izya busu mupaka ichinyenya chosi chikatutumuka.”

U Yesu akubombezya ivyili pakubamanyisya abantu

³⁴ U Yesu akabombezya ivyili vyosi vinivi pakunena na bantu bala. Atakanenaghapo nachimochimo pakusita ukubombezya ichili.

³⁵ Akabomba zinizi pakukwanilisya zizyo umulaghuzi akalaghula ukuti, “Nkwiza pakunenela muvyili, bo nkunena nabo. Nkwiza pakubabuzya ivintu vivyo batavimenyepo nalumolumo ukwandila pakabalilo kako ichisu ichapasi chikapeliwa.”

U Yesu akulingannya ichili icha ndezye

³⁶ Po u Yesu akepapo pachilundilo icha bantu chila nukwinjila munyumba. Abamanyili bache bakiza nukumulaba ukuti, “Tubuzye, nkimba ichili icha ndezye mumughunda chikung'anamula ichoni?”

³⁷ U Yesu akamula akati, “Umuntu yuyo akapesa imbeyu inyiza Mwana uwa Muntu;

³⁸ umughunda cho chisu ichapasi, imbeyu inyiza bo bantu aba mu Bumwene, indezye bo bantu aba Mubibi yula;

³⁹ umulwani yuyo akapesa indezye we Satana. Inyinulo bo bumalilo ubwa chisu ichapasi, sona abinuli bala bo bantumi.

⁴⁰ Indezye zikunyunkuliwa nukochiwa pamoto, umwakuyana bulo, umu momumo kukwiza pakubela pabumalilo ubwa chisu ichapasi.

⁴¹ U Mwana uwa Muntu akwiza pakutuma abantumi bache ukwefya abantu bosi mu Bumwene bwache, babo bakupuvya abantu na babo bakubomba ivibibi.

⁴² Bakwiza pakusumbiwa pamoto, mumo bakwiza pakulila nukusyeketula amino ghabo.

⁴³ Po abantu aba Chala bakwiza pakulama ngati lyo lizuba mu Bumwene ubwa Tata wabo. Yuyo ali na makutu aghakwivwila, ivwe!

Ichili icha bukabi bubo bufisiwe

⁴⁴ “Ubumwene ubwa Kumwanya buyanite bulo nu bukabi bubo bufisiwe mumughunda, bubo umuntu akabwagha nukubufisa sona, po mubuhobosu bwache akubuka nukughulizya vyosi vivyo ali navyo, akunyokela nukughula umughunda ghulaghula.

Ichili icha bwambo ubwamutengo

⁴⁵ “Ubumwene ubwa Kumwanya buyanite sona nu muntu yuyo akulonda ubwambo ubwamutengo.

⁴⁶ Bo abwagha boka ubwamutengo, akabuka nukughulizya vyosi vivyo akaba navyo nukughula ubwambo bula.

Ichili icha chilepa

⁴⁷ “Sona, Ubumwene ubwa Kumwanya buyanite bulo na balobaswi babo bakusumbila ichilepa chabo munyanja nukuloba iswi izyakulekanalekana.

⁴⁸ Bo ichilepa chizula, bakuchiwesela kulubazu ulwa nyanja, bakwikala pasi nukugaba iswi: Iswi inyiza bakuzibika muchizanga, loli imbibi bakuzisumba.

⁴⁹ Momumo kukwiza pakubela pabumalilo ubwa chisu ichapasi: Abantumi bakwiza pakubuka pakwefya abantu ababibi pakasi pabantu abiza,

⁵⁰ nukubasumbila ababibi pamoto, mumo bakwiza pakulila nukusyeketula amino ghabo.”

Ivimanyisyo ivipya ni vyakale

⁵¹ U Yesu akabalalusya akati, “Nkimba mukwivwisya ivintu vyosi ivi?” Bakamula bakati, “Eee.”

⁵² Po akabamula akati, “Ichi chikung'anamula ukuti umumanyisi wesi uwa Ndaghilo yuyo akuba mumanyili mu Bumwene ubwa Kumwanya ayanite bulo nu mwenecho uwa nyumba, yuyo akuvyefyamo ivintu ivipya ni ivyakale muchipinda chache ichakusungilamo ivintu.”

U Yesu bakumukana mu Nazaleti

⁵³ Bo u Yesu amala pakubabuzya ivyili vinivi, akepapo pabuzilo bula.

⁵⁴ Akabwela nukwanda pakumanyisya munyumba izyakwiputilamo, po abantu babo bakamwivwa bakaswigha nukulalusya ukuti, “Nkimba amahala na maka aghakubombela ivintu vinivi akaghagha kwiyi?

⁵⁵ Nkimba yunuyu ate mwana uwa mupalamatabwa? Nkimba unyina ate we Maliya? Nkimba ate we wamwabo uwa Yakobo, u Yosefu, u Simoni nu Yudasi?

⁵⁶ Nkimba abayemba bache batakwikala naswe kuno? Akavyagha kwiyi vyosi vinivi?”

⁵⁷ Po bakamukana. U Yesu akababuzya akati, “Umulaghuzi akuchindikiwa kosi na kosi, loli kwene kukaya kache, sona bantu abamunyumba yache.”

⁵⁸ Atakabombako ivyika ivyinji pakuti batakaba nu lwitiko.