Matayi 11 - IBAYIBOLO 2024

¹ Bo u Yesu amala pakumanyisya abamanyili bache 12 bala ivintu vinivi, akepapo pabuzilo bula, akabuka pakumanyisya nukulumbilila mutwaya tuto tukaba papipi.

U Yohani Uwalozyo akubatuma abamanyili bache kwa Yesu

² Bo u Yohani Uwalozyo ali mujele, akivwa zyosi zizyo u Kilisitu akabombagha, po akatuma abamanyili bache bamo kwa Yesu.

³ Bakamulalusya bakati, “Tubuzye, nkimba awe weyuyo akaneniwanga ukuti akwiza, pamo tulindililaye uyunji?”

⁴ U Yesu akamula akati, “Nyokela kamubuzye u Yohani zizyo mukwivwa nukuzyennya.

⁵ Abafwamaso bakwennya, babo bafuye ivinama bakwenda, na bamambombo bakuswepa, na bamapuli bakwivwa, na bantu abafwe bakuzyuka kubufwe, sona Amazyu Amiza ghakulumbililiwa pakasi pabantu abapina.

⁶ Basayiwa babo batakwilamwa nane.”

⁷ Bo abamanyili aba Yohani bepapo, u Yesu akanda pakuchilalusya ichilundilo icha bantu nizya Yohani ukuti, “Bo mwabuka kwa Yohani munkolongo, nkimba mukalindililagha pakwennya ichoni? Nkimba ulutete lulo lukatetema ni mpepo?

⁸ Nkimba mukabuka pakwennya ichoni? Nkimba umuntu yuyo avwalite amenda amiza nkani? Awe, abantu babo bakuvwala amenda amiza bakwikala munyumba izya bumwene?

⁹ Mumbuzye, nkimba mukabuka pakwennya ichoni? Umulaghuzi? Naloli momumo, mukennya yumo uwakumuchila umulaghuzi.

¹⁰ Pakuti u Yohani weyuyo Amasimbo ghakumunena ukuti, ‘U Chala akati, “Nkwiza pakuyituma intumi yane kuntazi kukwako pakukuyanizizya izila.”

¹¹ Naloli nkubabuzya ukuti pakasi pabantu bosi babo bakapapiwa muchisu ichapasi, nayumo umuntu uyunji uwakumuchila u Yohani Uwalozyo. Loli umuntu yuyo munandi nkani mu Bumwene ubwa Kumwanya mukulu ukumuchila u Yohani.

¹² Ukwanda pakabalilo aka Yohani Uwalozyo mupaka ilelo, Ubumwene ubwa Kumwanya bwayimba nkani, sona abantu abamaka bakuyezya pakubunangannya.

¹³ Abalaghuzi bosi poka ni Ndaghilo izya Mozesi bakanenela zila nizya Bumwene ubwa Kumwanya mupaka pakabalilo aka Yohani Uwalozyo;

¹⁴ sona nanti mukulonda pakusubila amazyu ghabo, u Yohani we Eliya, yuyo akaneniwa ukuti akwiza.

¹⁵ Yuyo ali na makutu aghakwivwila, ivwe!

¹⁶ “Nkimba ningafwanikizya ni choni abantu abankulilo iyi? Bayanite bulo na bana babo bikaye muminalo. Akabukatila koka kakukabuzya akanji ukuti,

¹⁷ ‘Tukabimbila inyimbo izya pasendwa, loli mutakimba. Tukabimbila inyimbo izya pafwa, loli mutakalila!’

¹⁸ Bo u Yohani Uwalozyo iza, akatuzya pakulya, sona atakang'wela uvinyo. Po abantu bakati ali nu muzimu umubibi!

¹⁹ U Mwana uwa Muntu akiza, akalya nukung'wela, po abantu bakati, ‘Ennya, umuntu umupafu nu ching'wela uyu, sona umumanyani uwa basonkezya umusonko na bantu abambibi!’ Loli amahala agha Chala ghakulanjiziwa ukuti ghanaloli ni mbombo zyache.”

Nizya twaya tuto tughuniwe

²⁰ Po u Yesu akanda pakutuchemela utwaya tuto akabombaghamo ivyika ivyinji pakuti abantu batakapinduka nukuzileka imbibi zyabo nukuti,

²¹ “Chighune kukwako Kolazini! Chighune kukwako Betisayida! Nanti ivyika vivyo vibombiwe mumwinyu, vyabombiwe mutwaya utwa Tile nu Sidoni, ngali abantu mulamula bavwalite kale amasaka nukwikupulila itoyi mumubili ukulanjizya ukuti naloli bapinduka nukuzileka imbibi zyabo!

²² Nkubabuzya ukuti pisiku lilyo u Chala akwiza pakubalonga abantu, u Chala akwiza pakubapelela ichisa nkani abantu aba mu Tile nu Sidoni ukuchila amwe.

²³ Nawe Kapelinahumu! Nkimba ukwinong'ona ukuti ukwiza pakukweziwa mupaka kumwanya? Awe, loli ukwiza pakusumbiwa kubuzilo ubwa bantu abafwe! Ivyika vivyo vibombiwe kukwako, nanti vibombiwe mukaya aka Sodomu, ngali akaya kalakala kaliko nilelo?

²⁴ Nkubabuzya ukuti pisiku lilyo u Chala akwiza pakubalonga abantu, u Chala akwiza pakubapelela ichisa ichikulu abantu aba mukaya aka Sodomu ukuchila amwe!”

Ukutuzya mwa Yesu

²⁵ Pakabalilo kalakala u Yesu akati, “Wee Tata, Mwene uwakumwanya na pachisu ichapasi! Nkukupalizya pachifukwa ichakuti wabavumbulila abantu babo batamanyiye ivintu vivyo ukabafisa abantu abamahala na bamanyi.

²⁶ Eee, Tata, umu momumo ukalondela ukuti chibombiwanje.

²⁷ “Utata wane ampiye ubulaghili ubwa vintu vyosi. Nayumo umuntu yuyo amumenye u Mwana, loli Uwise mwene, sona atalipo umuntu yuyo amumenye Uwise, loli u Mwana mwene, sona na bantu babo u Mwana akubasala ukuti abavumbulile Uwise.

²⁸ “Zagha kukwane, mwebosi mwe mulitite nukung'wamilwa nintamyo, po nkwiza pakubapa ubutuzyo.

²⁹ Nyamula ikoli lyane, manyila kukwane pakuti ane ne mololo nu wakwiyisya. Po mukwiza pakubwagha ubutuzyo.

³⁰ Pakuti ikoli lilyo nkwiza pakubapa lipepe nu katundu yuyo nkwiza pakubika papinyu mupepusu.”