Matayi 10 - IBAYIBOLO 2024

Abatumiwa 12

¹ U Yesu akabitizya poka abamanyili bache 12 bala nukubapa ubulaghili ubwakwefesezya imizimu imibibi nukupozya ububine bosi ubwakulekanalekana.

² Amatabwa agha batumiwa 12 bala gho agha: Uwakwanda we Simoni yuyo akitiziwanga ukuti we Pitala nu wamwabo u Andeleya nu Yakobo nu wamwabo nu Yohani abana aba Zebediya,

³ nu Filipu nu Batolomeyo nu Tomasi nu Matayi umusonkezya sonko nu Yakobo umwana uwa Alufeyo nu Tadayi,

⁴ nu Simoni uwa akabukatila, kako kakalondagha ukuti mu Izilayeli mubanje ubusatuke nu Yudasi Sikaliyoti, yuyo pisinda pache akamubika u Yesu munyobe izya balwani.

U Yesu akubatuma 12 bala

⁵ U Yesu akabatuma abatumiwa 12 bala nukubabuzya ukuti, “Mutakabukaye pakasi pabantu babo bate ba Yuda, pamo mutwaya tosi utwa mu Samaliya.

⁶ Loli mubuke pakasi paba Izilayeli, babo bayanite bulo ni ng'ozi zizyo zisobelite.

⁷ Bukagha mulumbilile ukuti, ‘Ubumwene ubwa Kumwanya buli papipi!’

⁸ Pozya ababine, zyusya abafwe, swefya abamambombo nukwefya imizimu imibibi. Mwapokela umwakusita ukulipila, po namwe mupe ukusita ukulipiliwa.

⁹ Mutakasende indalama izya golide pamo izya siliva pamo izya mukuba munyambi zyinyu,

¹⁰ pamo inyambi iya pabulendo, pamo ilaya ilya palubazu, pamo inkwato, pamo indisa iyakwendela, pakuti uwambombo abaghiye pakupokela vivyo akusobelwa.

¹¹ “Nanti mwafika mukaya, mumulonde umuntu yuyo iyanizye pakubapokela akiza, mwikale nawe mupaka papo mukwiza pakwepapo pabuzilo bula.

¹² Bo mukwinjila munyumba munenaye ukuti, ‘Umutende ghubanje namwe.’

¹³ Nanti abantu abamunyumba yila bakubapokela akiza, ukulamuka kwinyu ukwa mutende kubanje nabo, loli nanti batakubapokela akiza, nyokela nu mutende winyu.

¹⁴ Nanti abantu bamo munyumba, pamo mukaya batakubapokela akiza pamo ukubateghelezya, epapo pabuzilo bula nukukung'unta ulufumbi munyayo zyinyu pakulanjizya ukuti mwabakana.

¹⁵ Naloli nkubabuzya ukuti pisiku lilyo u Chala akwiza pakubalonga abantu, u Chala akwiza pakubapelela ichisa nkani abantu aba mu Sodomu nu Gomola ukuchila abantu aba mukaya kala.

Ukuvwimiwa kuko kukwiza

¹⁶ “Ivwa kuno! Nkubatuma amwe ngati zyo ng'ozi pakasi pa mpumpi. Po mubanje mwe bachevu ngati yo njoka, sona mubanje bololo ngati yo nkunda.

¹⁷ Muchebaye na bantu pakuti bakwiza pakubalema nukubabika pamaso pa balongi, po bakwiza pakubasyempa munyumba izyakwiputilamo.

¹⁸ Pachifukwa icha nene bakwiza pakubasitaka pamaso pa balaghili napa bamwene na bantu abakuzi ukuti mubikile ubwakaboni nizya ane.

¹⁹ Loli bo babasitaka, mutakapasyanje ukuti, ‘Nkimba tukwiza pakunena ichoni?’ Pamo ukuti, ‘Nkimba tukwiza pakwiyimila bulibuli.’ Bo akabalilo kala kakwana, mukwiza pakupeghiwa amazyu aghakunena.

²⁰ Pakuti amazyu ghagho mukwiza pakunena ghatakwiza pakuba ghinyu, loli ghakwiza pakuba gha Muzimu uwa Ghuso uwakumwanya, ukunenela mumwinyu.

²¹ “Abantu bakwiza pakubabika abawamwabo ukuti baghoghiwe, sona na bawise bope bakwiza pakubabombela bunubu abana babo. Abana bakwiza pakubasambukila abapapi babo ukuti baghoghiwe.

²² Abantu bosi bakwiza pakubabenga pachifukwa ichakuti mwe bakonki bane. Loli umuntu wesi yuyo ajimba mupaka pabumalilo akwiza pakupokiwa.

²³ Nanti bakubavwima mukaya koka, chimbilila mukaya akanji. Naloli nkubabuzya ukuti mute mukamalizye imbombo zyinyu mutwaya tosi utwa mu Izilayeli, bo u Mwana uwa Muntu atizite.

²⁴ Umumanyili ate wapamwanya ukumuchila umumanyisi wache, awe, sona uwambombo ate wapamwanya ukumuchila u mwene wache, awe.

²⁵ Umumanyili atabaghiye pakuyana nu mumanyisi wache, sona umuzya ngati we mwene wache. Nanti usongo uwa nyumba akwitiziwa ukuti we Belezebuli, kokuti abantu abamunyumba yila bakwiza pakwitiziwa ni tabwa ibibi ukuchilapo.

Wewenu yuyo tumunyilaye

²⁶ “Po mutabakanyilaye abantu. Ichintu chosi chicho chivwinkiwe chikwiza pakuvwinkuliwa, sona ichintu chosi chicho chakubusyefu chikwiza pakuboneka pabuzelu.

²⁷ Zyosi zizyo nkubabuzya kubusyefu mukwiza pakuzinena pabuzelu, sona zyosi zizyo mwivwa pakuteketa mukwiza pakufumusya pachisonje.

²⁸ Mutakabanyilaye abantu babo bakughogha umubili, loli batangaghogha umuzimu. Nkaninkani mumunyile u Chala yuyo anganangannya vyosi umubili nu muzimu mu Gehena.

²⁹ Nkimba utwatiti tubili tungaghuliziwa ni salabazya yoka? Loli nakamo akatiti kako kakuwa pasi ukusita Ughuso uwakumwanya ukuzimanya.

³⁰ Loli amwe, zyope ni sisi izya kumitu yinyu zibelengiwe.

³¹ Po mutakanyilaye pakuti amwe mwe bapamwanya nkani ukuchila utwatiti utwinji!

Nizya kumwitika nukumukana u Kilisitu

³² “Umuntu wesi yuyo akunyitika pamaso pabantu, nane bulo nkwiza pakumwitika pamaso pa Tata wane uwakumwanya.

³³ Loli umuntu wesi yuyo akunkana pamaso pabantu, nane bulo nkwiza pakumukana pamaso pa Tata wane uwakumwanya.

Ghute mutende, loli bwite

³⁴ “Nkimba mukwinong'ona ukuti niza pakubika umutende pachisu ichapasi? Awe, intakizila pakubika umutende, loli bwite.

³⁵ Nkiza pakubika ubulwani pakasi pa mwana umulumendo nu wise, pakasi pa mwana umulindu nu nyina, sona pakasi pa mulasagha nu nyinavyala.

³⁶ Abalwani aba muntu bakwiza pakuba bantu abamunyumba yache.

³⁷ “Umuntu wesi yuyo amughanite nkani uwise pamo unyina ukunchila, atabaghiye pakuba mumanyili wane; umuntu wesi yuyo amughanite nkani umwana umulumendo pamo umulindu ukunchila, atabaghiye pakuba mumanyili wane.

³⁸ Umuntu wesi yuyo atiyanizye pakuyimba mupaka nukufwa nukunkonka, atabaghiye pakuba mumanyili wane.

³⁹ Umuntu wesi yuyo akulonda pakubupoka ubumi bwache, akwiza pakubutagha. Loli umuntu wesi yuyo akubutagha ubumi bwache pachifukwa icha nene, akwiza pakubupoka.

Nizya muvwalo

⁴⁰ “Umuntu wesi yuyo akubapokela akiza akumpokela nene. Umuntu wesi yuyo akumpokela akiza, akumupokela wepe bulo yuyo akantuma.

⁴¹ Umuntu wesi yuyo akumupokela umulaghuzi pachifukwa ichakuti we mulaghuzi, akwiza pakupokela umuvwalo uwakuyana nuwa mulaghuzi; sona umuntu wesi yuyo akumupokela umugholosu pachifukwa ichakuti we mugholosu akwiza pakupokela umuvwalo uwakuyana nuwa mugholosu.

⁴² Umuntu wesi yuyo akumupa ulubako ulwa mizi amakatazu yumo uwa bamanyili bane pachifukwa ichakuti mumanyili wane, naloli nkubabuzya ukuti akwiza pakupokela umuvwalo wache.”