Masalimo 99 - IBAYIBOLO 2024

U Chala u Mwene umukulu nkani

¹ U Mwene weyuyo akulaghila po inko zitetemaye, po ichisu ichapasi chihobokaye. Ikaye pachitengo pakasi pa bakelubi, po ichisu ichapasi chiyinganaye.

² U Mwene mukulu mu Ziyoni, sona ali pamwanya pabantu aba inko zyosi.

³ Abantu balipalaye itabwa lyako ikulu ni lyakuswighisya, pakuti itabwa lyako lizelu.

⁴ U Mwene wamaka, sona abughanite ubwanaloli, ubwikazizye ubwanaloli. Wabomba ingolosu sona izyanaloli mwa Yakobo.

⁵ Mumukwezyanje u Mwene u Chala witu, sona mumwiputaye pantazi panyayo zyache, pakuti muzelu.

⁶ U Mozesi nu Aloni bope bakaba pakasi pabaputi bache, u Samuweli wepe akaba weka uwa bamo babo bakamwiputagha. Bakamulilila u Mwene, po akabamula.

⁷ Akanena nabo ukufuma mumpanda iya libingu, po bakazikonka indaghilo na malamulo ghagho akabapa.

⁸ Wee Mwene Chala witu, ukabamula abantu bako, sona ukaba we Chala uwa luhobokelo, napapo ukabafunda pachifukwa icha mbibi zyabo.

⁹ Mumukwezyanje u Mwene u Chala witu, sona mumwiputaye pighamba lyache izelu, pakuti u Mwene u Chala witu muzelu.