Masalimo 98 - IBAYIBOLO 2024

U Chala umulaghili uwa chisu ichapasi

Isalimo.

¹ Mumwimbilaye u Mwene ulwimbo ulupya, pakuti abomba ivintu ivyakuswighisya. Inyobe yache indilo, sona inyobe yache izelu, vyamupa ubupoti.

² U Mwene abuvumbula ubupoki bwache, sona abavumbuliye ubugholosu bwache abantu aba inko izinji.

³ Alukumbuka ulughano lwache, sona abalanjizya aba Izilayeli ubusubiliwa bwache. Po abantu bosi aba kubumalilo ubwa chisu ichapasi babwennya ubupoki ubwa Chala witu.

⁴ Wee chisu ichapasi, kolomokagha pamaso pa Mwene, pachifukwa icha buhobosu, mumwimbilaye umwakuhoboka inyimbo izya mapalo.

⁵ Mwimbilaye u Mwene ni chinanda, lizya ichinanda bo mukwimba inyimbo.

⁶ Lizya amapati ni mpembe izya ng'ozi, mukolomokaye pamaso pa Mwene, yuyo we mwene witu.

⁷ Inyanja yipomaye, poka na vyosi vivyo vili mumo, sona ichisu ichapasi, poka na bosi babo bakwikalamo.

⁸ Isoko zikomaye inkufi, amaghamba ghimbaye poka pachifukwa icha buhobosu.

⁹ Vileke vyimbaye pamaso pa Mwene, pakuti akwiza pakuchilonga ichisu. Akwiza pakuchilonga ichisu mubugholosu, sona akwiza pakuzilonga inko zyosi umwakuyana bulo.