Masalimo 97 - IBAYIBOLO 2024

U Chala we mulaghili umukulu

¹ U Mwene weyuyo akulaghila, po ichisu ichapasi chihobokaye, bope abantu babo bakwikala mulubazu ulwanyanja bahokaye.

² Amabingu ni chisi vimuzyunguliye, ubugholosu nu bwanaloli vyo vivyo vikwikazya ichitengo chache.

³ Umoto ghukubuka pantazi papache, nukubalungulizya abalwani bache kumbazu zyosi.

⁴ Akamesya kache kakuchilamizya ichisu ichapasi, sona ichisu ichapasi chikukennya nukutetema.

⁵ Amaghamba ghakusunguluka ngati mpula pamaso pa Mwene, pamaso pa Mwene uwa ichisu chosi ichapasi.

⁶ Kumwanya kukulumbilila nizya bugholosu bwache, sona inko zyosi zikubwennya ubuchindamu bwache.

⁷ Bosi babo bakuvyiputa ivifwani bakoziwanje isoni, kokuti bakwituvikizya mu bachala. Mwee bachala, mwebosi mumufughamililaye.

⁸ Wee Mwene, abantu aba mu Ziyoni bakwivwa nukuhoboka, sona bope abantu aba mutwaya utwa mu Yuda basekelaye, pachifukwa icha bulongi bwako.

⁹ Wee Mwene, we Wakumwanya Nkani pachisu chosi ichapasi, we wamaka ukubachila abachala bosi.

¹⁰ Babo bamughanite u Mwene, babubengaye ububibi. Pakuti akubuvighilila ubumi ubwa bantu bache abasubiliwa, sona akubapoka munyobe izya bantu ababibi.

¹¹ Ulukozyo lwapesiwa pa bagholosu, po bakwizula nu buhobosu.

¹² Mwebosi mwe bagholosu, muhobokaye mwa Mwene, sona mumupalizyanje pakulitambula itabwa lyache izelu.