Masalimo 96 - IBAYIBOLO 2024

U Chala we Mwene umukulu nkani

¹ Mumwimbilaye u Mwene ulwimbo ulupya, mwee bantu bosi aba pachisu ichapasi, mwimbile u Mwene

² Mumwimbilaye u Mwene, sona mulipalaye itabwa lyache, lumbilila nizya bupoki bwache isiku ni siku.

³ Mufumusyanje ubuchindamu bwache pakasi pa inko, sona ni mbombo zyache izyakuswighisya pakasi pabantu bosi.

⁴ Pakuti u Mwene we mukulu, yuyo amapalo ghope ghamubaghiye nkani, sona abantu bosi bamunyilaye ukubachila abachala abanji.

⁵ Pakuti abachala abanji bosi aba inko vifwani bulo, loli u Mwene weyuyo akapela kumwanya.

⁶ Ubuchindamu nu bumwene vili pamaso papache, sona amaka nukuboneka akiza vili mubuzilo bwache ubuzelu.

⁷ Mwee inko izya pachisu ichapasi, mumupalaye u Mwene, mubupalaye ubuchindamu na maka ghache.

⁸ Mubupalaye ubuchindamu ubwa Mwene pachifukwa icha itabwa lyache, mwizaye ni vyakwiyipa mu mulubinjilo ulwa munyumba yache.

⁹ Mumwiputaye u Mwene, yuyo muchindamu, sona muzelu, Wee chisu chapasi, tetemagha pamaso papache. Ichisu ichapasi chikalanite nkani, sona chitangayingana.

¹⁰ Mubabuzye abantu aba inko izinji mutinji, “U Mwene akulaghila.” Ichisu ichapasi chikalanite nkani, sona chitangayingana napo panandi. Akwiza pakubalonga abantu aba inko zyosi umwakuyana bulo.

¹¹ Kumwanya kusekelaye, chope ichisu ichapasi chihobokaye. Inyanja yipomaye poka na vyosi vivyo vili mumo.

¹² Amaghunda ghahobokaye poka na vyosi vivyo vili mumo. Amakwi agha mumusitu ghimbaye pachifukwa icha buhobosu.

¹³ Vikwiza pakwimba pamaso pa Mwene, bo akwiza pakuchilonga ichisu ichapasi. Akwiza pakuchilongela ichisu ichapasi mubugholosu, sona akwiza pakuzilonga inko mubwanaloli.